ਕਰਤਾਰਪੁਰ : ਥਾਣਾ ਕਰਤਾਰਪੁਰ ਦੀ ਪੁਲਿਸ ਨੇ ਜਾਅਲੀ ਆਧਾਰ ਤੇ ਹੋਰ ਕਾਗਜ਼ਾਤ ਬਣਾ ਕੇ ਗੁਰੂ ਅਮਰਜੀਤ ਸਿੰਘ ਵਾਸੀ ਕਰਤਾਰਪੁਰ ਦੀ ਜ਼ਮੀਨ ਹੱੜਪਣ ਦੀ ਕੋਸ਼ਿਸ਼ ਕਰਨ ਵਾਲਾ ਮੁਲਜ਼ਮ ਗਿ੍ਫ਼ਤਾਰ ਕੀਤਾ ਹੈ। ਡੀਐੱਸਪੀ ਸੁਖਪਾਲ ਸਿੰਘ ਸਬ-ਡਵੀਜ਼ਨ ਕਰਤਾਰਪੁਰ ਜਲੰਧਰ ਦਿਹਾਤੀ ਨੇ ਦੱਸਿਆ ਏਐੱਸਆਈ ਤੀਰਥਪਾਲ ਸਿੰਘ ਨੂੰ ਅਮਰਿੰਦਰ ਸੋਢੀ ਪੁੱਤਰ ਕੰਵਰ ਚਰਨਜੀਤ ਸਿੰਘ ਵਾਸੀ ਕਿਲਾ ਕੋਠੀ ਕਰਤਾਰਪੁਰ ਨੇ ਦਰਖਾਸਤ ਦਿੱਤੀ ਸੀ ਕਿ ਉਸ ਦੇ ਦਾਦਾ ਗੁਰੂ ਅਮਰਜੀਤ ਸਿੰਘ ਪੁੱਤਰ ਗੁਰੂ ਸਰਦੂਲ ਸਿੰਘ ਜਿਨ੍ਹਾਂ ਦੀ ਸਾਲ 1998 ‘ਚ ਮੌਤ ਹੋ ਚੁੱਕੀ ਹੈ, ਦੇ ਨਾਂ ‘ਤੇ ਕਿਸੇ ਅਣਪਛਾਤੇ ਨੇ ਜਾਅਲੀ ਆਧਾਰ ਕਾਰਡ ਤੇ ਹੋਰ ਕਾਗਜ਼ਾਤ ਬਣਾ ਕੇ ਉਨ੍ਹਾਂ ਦੀ ਮਾਲਕੀ ਵਾਲੀ ਜ਼ਮੀਨ ਦੀ ਨਿਸ਼ਾਨਦੇਹੀ ਕਰਵਾਉਣ ਲਈ ਨਾਇਬ-ਤਹਿਸੀਲਦਾਰ ਕਰਤਾਰਪੁਰ ਨੂੰ ਦਰਖਾਸਤ ਦੇ ਕੇ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਕੀਤੀ। ਜਿਸ ‘ਤੇ ਮੁੱਕਦਮਾ ਨੰ. 98 ਮਿਤੀ 10 ਜੂਨ ਨੂੰ ਮੁਕੱਦਮਾ ਦਰਜ ਕੀਤਾ ਗਿਆ। ਇਸ ਸਬੰਧੀ ਦਰਖਾਸਤਕਰਤਾ ਅਮਰਿੰਦਰ ਸੋਢੀ ਉਕਤ ਦੀ ਸਨਾਖਤ ‘ਤੇ ਮੁਲਜ਼ਮ ਵਰਿੰਦਰ ਕੁਮਾਰ ਪਾਂਡੇ ਪੁੱਤਰ ਰਾਮ ਆਸਰੇ ਪਾਂਡੇ ਵਾਸੀ ਲੋਧੀਪੁਰ ਥਾਣਾ ਕੋਤਵਾਲੀ ਦਹਿਤ ਜ਼ਿਲਾ ਸੁਲਤਾਨਪੁਰ ਯੂਪੀ ਹਾਲ ਵਾਸੀ ਝੁੱਗੀ ਨੇੜੇ ਗੁਰਦੁਆਰਾ ਗੰਗਸਰ ਸਾਹਿਬ ਕਰਤਾਰਪੁਰ ਥਾਣਾ ਕਰਤਾਰਪੁਰ ਨੂੰ ਗਿ੍ਫਤਾਰ ਕਰ ਕੇ ਉਸ ਕੋਲੋਂ ਗੁਰੂ ਅਮਰਜੀਤ ਸਿੰਘ ਨਾਂ ਦਾ ਜਾਅਲੀ ਆਧਾਰ ਕਾਰਡ ਬਰਾਮਦ ਕੀਤਾ ਗਿਆ ਹੈ। ਮੁਲਜ਼ਮ ਕੋਲੋਂ ਪੁੱਛਗਿੱਛ ਕੀਤੀ ਜਾ ਰਹੀ। ਉਸ ਨੂੰ ਅਦਾਲਤ ‘ਚ ਪੇਸ਼ ਕਰ ਕੇ ਦੋ ਦਿਨਾ ਪੁਲਿਸ ਰਿਮਾਂਡ ਹਾਸਲ ਕੀਤਾ ਗਿਆ ਹੈ।
