ਚੰਡੀਗੜ੍ਹ : ਪੀਜੀਆਈ ਚੰਡੀਗੜ੍ਹ (PGI Chandigarh) ‘ਚ ਨਰਸਾਂ ਦੀ ਭਰਤੀ ਸ਼ੁਰੂ ਹੋ ਗਈ ਹੈ। ਪੀਜੀਆਈ ਪ੍ਰਸ਼ਾਸਨ ਨੇ ਨਰਸਾਂ ਦੀਆਂ 211 ਅਸਾਮੀਆਂ ਦੀ ਭਰਤੀ ਲਈ ਆਨਲਾਈਨ ਅਰਜ਼ੀਆਂ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਇਨ੍ਹਾਂ ‘ਤੇ ਨਰਸਿੰਗ ਅਫ਼ਸਰ, ਸੀਨੀਅਰ ਨਰਸਿੰਗ ਅਫ਼ਸਰ, ਸਹਾਇਕ ਨਰਸਿੰਗ ਸੁਪਰਡੈਂਟ ਦੀਆਂ ਅਸਾਮੀਆਂ ਭਰੀਆਂ ਜਾਣਗੀਆਂ।
ਨਰਸਾਂ ਦੀ ਭਰਤੀ ਲਈ ਆਨਲਾਈਨ ਅਪਲਾਈ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਗਈ ਹੈ। ਇਨ੍ਹਾਂ ਅਹੁਦਿਆਂ ਲਈ 21 ਤੋਂ 35 ਸਾਲ ਤਕ ਦੇ ਉਮੀਦਵਾਰ ਅਪਲਾਈ ਕਰ ਸਕਦੇ ਹਨ। ਜਾਣਕਾਰੀ ਅਨੁਸਾਰ ਕੁੱਲ 211 ਅਸਾਮੀਆਂ ‘ਚੋਂ 195 ਅਸਾਮੀਆਂ ਨਰਸਿੰਗ ਅਫ਼ਸਰ, 13 ਅਸਾਮੀਆਂ ਸੀਨੀਅਰ ਨਰਸਿੰਗ ਅਫ਼ਸਰ, 2 ਅਸਿਸਟੈਂਟ ਨਰਸਿੰਗ ਸੁਪਰਡੈਂਟ ਤੇ ਇੱਕ ਅਸਾਮੀ ਡਿਪਟੀ ਨਰਸਿੰਗ ਸੁਪਰਡੈਂਟ ਲਈ ਰੱਖੀਆਂ ਗਈਆਂ ਹਨ।
ਭਰਤੀ ਪ੍ਰਕਿਰਿਆ ਲਈ ਇਹ ਸਰਟੀਫਿਕੇਟ ਜ਼ਰੂਰੀ
ਜਾਣਕਾਰੀ ਅਨੁਸਾਰ ਨਰਸਿੰਗ ਅਫ਼ਸਰ ਦੇ ਅਹੁਦੇ ‘ਤੇ ਭਰਤੀ ਲਈ ਬਿਨੈਕਾਰ ਕੋਲ ਬੀਐਸਸੀ ਨਰਸਿੰਗ ਜੀਐਨਐਮ, ਐਮਐਸਸੀ ਨਰਸਿੰਗ ਦੇ ਨਾਲ ਬੋਰਡ ਪ੍ਰੀਖਿਆ ਯੂਨੀਵਰਸਿਟੀ ਦੀ ਡਿਗਰੀ ‘ਚ 50 ਫੀਸਦੀ ਅੰਕ ਹੋਣੇ ਜ਼ਰੂਰੀ ਹਨ। ਇਸ ਤੋਂ ਇਲਾਵਾ ਐੱਮਐੱਸਸੀ ਬਿਨੈਕਾਰ ਪੰਜਾਬ ਨਰਸਿੰਗ ਕੌਂਸਲ ਨਾਲ ਰਜਿਸਟਰਡ ਹੋਣਾ ਲਾਜ਼ਮੀ ਹੈ। ਸੀਨੀਅਰ ਨਰਸਿੰਗ ਅਫਸਰ ਦੇ ਅਹੁਦੇ ‘ਤੇ ਭਰਤੀ ਹੋਣ ਲਈ ਬਿਨੈਕਾਰ ਕੋਲ ਬੀਐਸਸੀ ਨਰਸਿੰਗ, ਐਮਐਸਸੀ ਨਰਸਿੰਗ ਤੇ ਜੀਐਨਐਮ ਦੀ ਡਿਗਰੀ ਹੋਣੀ ਚਾਹੀਦੀ ਹੈ। ਡਿਪਟੀ ਨਰਸਿੰਗ ਸੁਪਰਡੈਂਟ ਦੇ ਅਹੁਦੇ ‘ਤੇ ਭਰਤੀ ਹੋਣ ਲਈ ਬਿਨੈਕਾਰ ਦਾ ਐਮਐਸਸੀ ਨਰਸਿੰਗ ਹੋਣਾ ਲਾਜ਼ਮੀ ਹੈ।
200 ਨੰਬਰ ਦੀ ਹੋਵੇਗੀ ਲਿਖਤੀ ਪ੍ਰੀਖਿਆ
211 ਅਸਾਮੀਆਂ ਦੀ ਭਰਤੀ ਲਈ ਪੀਜੀਆਈ ਪ੍ਰਸ਼ਾਸਨ ਵੱਲੋਂ 200 ਅੰਕਾਂ ਦਾ ਲਿਖਤੀ ਟੈਸਟ ਲਿਆ ਜਾਵੇਗਾ, ਇਹ ਟੈਸਟ ਆਨਲਾਈਨ ਮੋਡ ‘ਚ ਹੋਵੇਗਾ।ਇਸ ਟੈਸਟ ਵਿਚ ਵਿਸ਼ੇ ਦੇ 180 ਅੰਕਾਂ ਦੇ ਪ੍ਰਸ਼ਨ ਹੋਣਗੇ, ਜਦੋਂਕਿ ਜਨਰਲ ਅੰਗਰੇਜ਼ੀ ‘ਚ 10 ਅੰਕਾਂ ਦੇ ਪ੍ਰਸ਼ਨ ਅਤੇ ਜਨਰਲ ਅਵੇਅਰਨੈੱਸ ਤੇ ਐਪਟੀਟਿਊਡ ਟੈਸਟ ਦੇ ਵਿਸ਼ੇ ‘ਤੇ 10 ਅੰਕਾਂ ਦੇ ਪ੍ਰਸ਼ਨ ਹੋਣਗੇ। ਇਹ ਲਿਖਤੀ ਪ੍ਰੀਖਿਆ ਅਪਲਾਈ ਕਰਨ ਤੋਂ ਬਾਅਦ ਹੋਵੇਗੀ।
