ਘਰ ਵੜ ਕੇ ਹਮਲਾ ਕਰਨ ਵਾਲੇ ਨਾਮਜ਼ਦ

ਲੁਧਿਆਣਾ : ਸਥਾਨਕ ਆਨੰਦ ਨਗਰ ਹੈਬੋਵਾਲ ਇਲਾਕੇ ਵਿਚ ਰਹਿਣ ਵਾਲੇ ਪੇਂਟ ਕਾਰੀਗਰ ਦੇ ਘਰ ਵੜ ਕੇ ਹਮਲਾ ਕਰਨ ਵਾਲੇ ਮੁਲਜ਼ਮਾਂ ਖ਼ਿਲਾਫ਼ ਥਾਣਾ ਹੈਬੋਵਾਲ ਪੁਲਿਸ ਵੱਲੋਂ ਵੱਖ-ਵੱਖ ਦੋਸ਼ਾਂ ਤਹਿਤ ਪਰਚਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਰਾਮ ਕੁਮਾਰ ਦੇ ਬਿਆਨਾਂ ‘ਤੇ ਅਨੰਦ ਨਗਰ ਵਾਸੀ ਮਨਦੀਪ ਕੁਮਾਰ, ਸ਼ੈਲੀ ਅਤੇ ਪ੍ਰਤਾਪ ਸਿੰਘ ਉਰਫ਼ ਮਾਲੀ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ। ਸ਼ਿਕਾਇਤਕਰਤਾ ਮੁਤਾਬਕ ਉਸਨੇ ਕਥਿਤ ਮੁਲਜਮ ਮਨਦੀਪ ਕੁਮਾਰ ਦੇ ਮਕਾਨ ਨੂੰ ਪੇਂਟ ਕਰਨ ਦਾ 25 ਹਜ਼ਾਰ ਰੁਪਏ ਵਿੱਚ ਠੇਕਾ ਲਿਆ ਸੀ। ਸਾਰੀ ਗੱਲਬਾਤ ਤੈਅ ਹੋਣ ਮਗਰੋਂ ਮੁੱਦਈ ਨੇ ਅਡਵਾਂਸ ਦੇ ਰੂਪ ਵਿੱਚ 6 ਹਜ਼ਾਰ ਰੁਪਏ ਮਨਦੀਪ ਕੁਮਾਰ ਕੋਲੋਂ ਲੈ ਲਏ। ਰਾਮ ਕੁਮਾਰ ਮੁਤਾਬਕ 5 ਅਕਤੂਬਰ ਨੂੰ ਉਸ ਦੀ ਤਬੀਅਤ ਖ਼ਰਾਬ ਹੋ ਗਈ ਅਤੇ ਉਹ ਆਪਣੇ ਘਰ ਵਿੱਚ ਵੀ ਮੌਜੂਦ ਸੀ। ਇਸ ਦੌਰਾਨ ਉਕਤ ਮੁਲਜ਼ਮ ਆਪਣੇ ਸਾਥੀਆਂ ਸਣੇ ਉਸ ਦੇ ਘਰ ਵੜ ਆਇਆ ਤੇ ਉਸ ਦੀ ਕੁੱਟਮਾਰ ਕੀਤੀ। ਰੌਲਾ ਪੈਣ ‘ਤੇ ਮੁਲਜ਼ਮ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਇਸ ਮਾਮਲੇ ਦੇ ਤਫਤੀਸ਼ੀ ਅਧਿਕਾਰੀ ਸਹਾਇਕ ਥਾਣੇਦਾਰ ਗੁਰਮੇਲ ਸਿੰਘ ਮੁਤਾਬਕ ਮੁਲਜ਼ਮਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ।