ਤਰਨਤਾਰਨ ਚ‌‌’ ਦੁਕਾਨ ‘ਤੇ ਚੌਥੀ ਵਾਰ ਹੱਥ ਸਾਫ

ਹਰੀਕੇ ਪੱਤਣ : ਕਸਬੇ ਦੇ ਮੱੁਖ ਬਾਜ਼ਾਰ ਅਤੇ ਨੇੜਲੇ ਪਿੰਡਾਂ ‘ਚ ਚੋਰਾਂ ਦਾ ਬੋਲਬਾਲਾ ਇਸ ਕਦਰ ਹੋ ਰਿਹਾ ਹੈ ਕਿ ਲੋਕਾਂ ‘ਚ ਸਹਿਮ ਦਾ ਮਾਹੌਲ ਪਾਇਆ ਜਾ ਰਿਹਾ ਹੈ।

ਤਾਜ਼ਾ ਮਿਸਾਲ ਦੌਰਾਨ ਅਣਪਛਾਤਿਆਂ ਵੱਲੋਂ ਤਰਨਤਾਰਨ ਰੋਡ ‘ਤੇ ਸਥਿਤ ਮਕੈਨੀਕਲ ਦੁਕਾਨ ਨੂੰ ਚੌਥੀ ਵਾਰ ਨਿਸ਼ਾਨਾ ਬਣਾਉਦਿਆਂ ਮੁਰੰਮਤ ਲਈ ਆਇਆ ਸੁਹਾਗਾ ਚੋਰੀ ਕਰ ਲਿਆ ਗਿਆ। ਪੀੜ੍ਹਤ ਵੱਲੋਂ ਥਾਣੇ ਸੂਚਨਾ ਦੇਣ ਮਗਰੋਂ ਸਥਾਨਕ ਪੁਲਿਸ ਨੇ ਜਲਦੀ ਚੋਰਾਂ ਨੂੰ ਕਾਬੂ ਕਰ ਲੈਣ ਦੀ ਗੱਲ ਕਹੀ। ਜਾਣਕਾਰੀ ਦਿੰਦਿਆ ਸੁਖਵਿੰਦਰ ਸਿੰਘ ਪੁੱਤਰ ਗੁਰਮੇਜ ਸਿੰਘ ਵਾਸੀ ਹਰੀਕੇ ਪੱਤਣ ਨੇ ਦੱਸਿਆ ਕਿ ਉਹ ਤਰਨਤਾਰਨ ਰੋਡ ਹਰੀਕੇ ਵਿਖੇ ਮਕੈਨੀਕਲ ਦੀ ਦੁਕਾਨ ਕਰਦਾ ਹੈ ਅਤੇ ਇਸ ਤੋਂ ਪਹਿਲਾਂ ਵੀ ਤਿੰਨ ਵਾਰ ਅਣਪਛਾਤਿਆਂ ਵੱਲੋਂ ਦੁਕਾਨ ਤੋਂ ਲੋਹਾ ਅਤੇ ਹੋਰ ਖੇਤੀ ਦੇ ਕੀਮਤੀ ਅੌਜਾਰ ਚੋਰੀ ਕੀਤੇ ਜਾ ਚੁੱਕੇ ਹਨ। ਲੰਘੀ ਰਾਤ ਚੋਰਾਂ ਨੇ ਦੁਕਾਨ ਦੇ ਬਾਹਰ ਪਿਆ ਸੁਹਾਗਾ ਚੋਰੀ ਕਰ ਲਿਆ। ਸਿਤਮਜ਼ਰੀਫੀ ਇਹ ਹੈ ਕਿ ਪਹਿਲੇ ਮਾਮਲਿਆਂ ‘ਚ ਚੋਰਾਂ ਦੀ ਸ਼ਨਾਖਤ ਹੋਣ ਦੇ ਬਾਵਜੂਦ ਉਸ ਦੇ ਨੁਕਸਾਨ ਦੀ ਭਰਪਾਈ ਨਹੀਂ ਹੋਈ ਚੋਹਲਾ ਸਾਹਿਬ ਪੁਲਿਸ ਨੇ ਚੋਰ ਨੂੰ ਕਾਬੂ ਕਰਕੇ ਕਥਿਤ ‘ਮਹਿਮਾਨਨਿਵਾਜ਼ੀ’ ਮਗਰੋਂ ਕਲੀਨ ਚਿੱਟ ਦੇ ਦਿੱਤੀ ਉਨਾਂ੍ਹ ਕਿਹਾ ਕਿ ਹੁਣ ਥਾਣਾ ਹਰੀਕੇ ਪੱਤਣ ਵਿਖੇ ਇਤਲਾਹ ਦਿੱਤੀ ਜਾ ਚੁੱਕੀ ਹੈ। ਸੰਪਰਕ ਕਰਨ ਤੇ ਥਾਣਾ ਮੁਖੀ ਇੰਸਪੈਕਟਰ ਭੁਪਿੰਦਰ ਕੌਰ ਨੇ ਕਿਹਾ ਕਿ ਸੁਹਾਗਾ ਚੋਰੀ ਦੇ ਮਾਮਲੇ ਦੀ ਪੜਤਾਲ ਲਈ ਸਬ ਇੰਸਪੈਕਟਰ ਹਰਦਿਆਲ ਸਿੰਘ ਨੂੰ ਨਿਰਦੇਸ਼ ਦਿੱਤੇ ਜਾ ਚੁੱਕੇ ਹਨ ਤੇ ਜਲਦੀ ਹੀ ਚੋਰ ਸੀਖਾਂ ਪਿੱਛੇ ਹੋਣਗੇ।