ਲੁਧਿਆਣਾ : ਬਾਲ ਸੁਧਾਰ ਘਰ ਦੇ ਅੰਦਰ ਇੱਕ ਹੋਰ ਨਾਬਾਲਗ ਨਾਲ ਬਦਫੈਲੀ ਹੋਣ ਦਾ ਸ਼ਰਮਨਾਕ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਵਾਰ ਅਣਪਛਾਤੇ ਅਪਰਾਧੀਆਂ ਨੇ ਨਾਬਾਲਗ ਨੂੰ ਲਗਾਤਾਰ ਪੰਜ ਮਹੀਨੇ ਤਕ ਹਵਸ ਦਾ ਸ਼ਿਕਾਰ ਬਣਾਇਆ। ਇਸ ਮਾਮਲੇ ਵਿਚ ਥਾਣਾ ਸ਼ਿਮਲਾਪੁਰੀ ਦੀ ਪੁਲਿਸ ਨੇ ਆਬਜ਼ਰਵੇਸ਼ਨ ਹੋਮ ਸ਼ਿਮਲਾਪੁਰੀ ਦੇ ਸੁਪਰਡੈਂਟ ਤਰੁਣ ਅਗਰਵਾਲ ਦੇ ਬਿਆਨਾਂ ਉਪਰ ਅਣਪਛਾਤੇ ਮੁਲਜ਼ਮਾਂ ਦੇ ਖਿਲਾਫ ਮੁਕੱਦਮਾ ਦਰਜ ਕਰ ਲਿਆ ਹੈ। ਜਾਣਕਾਰੀ ਮੁਤਾਬਕ ਨਾਬਾਲਗ ਮੁਲਜ਼ਮ ਪਿਛਲੇ ਕੁਝ ਮਹੀਨਿਆਂ ਤੋਂ ਅਪਰਾਧਕ ਮਾਮਲੇ ਵਿਚ ਆਬਜ਼ਰਵੇਸ਼ਨ ਹੋਮ ਚ ਬੰਦ ਹੈ।ਸੁਪਰੀਡੈਂਟ ਨੂੰ ਸ਼ਿਕਾਇਤ ਦਿੰਦਿਆਂ ਨਾਬਾਲਗ ਨੇ ਜੋ ਕੁੱਝ ਦੱਸਿਆ ਉਹ ਹੈਰਾਨ ਕਰ ਦੇਣ ਵਾਲਾ ਸੀ। ਉਸ ਨੇ ਸ਼ਿਕਾਇਤ ਦਿੰਦਿਆਂ ਦੱਸਿਆ ਕਿ 1 ਮਈ ਤੋਂ ਲੈ ਕੇ 30 ਅਕਤੂਬਰ ਤਕ ਅਣਪਛਾਤੇ ਅਪਰਾਧੀ ਡਰਾ ਧਮਕਾ ਕੇ ਉਸ ਨਾਲ ਬਦਫੈਲੀ ਕੀਤੀ। ਬੁਰੀ ਤਰ੍ਹਾਂ ਡਰੇ ਸਹਿਮੇ ਨਾਬਾਲਗ ਨੇ ਇਸ ਸਬੰਧੀ ਕਿਸੇ ਨੂੰ ਕੁਝ ਨਾ ਦੱਸਿਆ। ਇਸ ਵਾਰ ਹੌਂਸਲਾ ਕਰਕੇ ਉਸ ਨੇ ਆਪਣੇ ਨਾਲ ਹੋ ਰਹੇ ਜ਼ੁਲਮ ਬਾਰੇ ਸੁਪਰਡੈਂਟ ਤਰੁਣ ਅਗਰਵਾਲ ਨੂੰ ਦੱਸਿਆ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਥਾਣਾ ਸ਼ਿਮਲਾਪੁਰੀ ਦੀ ਪੁਲਿਸ ਨੇ ਜੇਲ ਸੁਪਰੀਡੈਂਟ ਦੇ ਬਿਆਨਾਂ ਉਪਰ ਅਣਪਛਾਤੇ ਮੁਲਜ਼ਮਾਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ ।
ਕੁਝ ਦਿਨ ਪਹਿਲੋਂ ਵੀ ਆਇਆ ਸੀ ਅਜਿਹਾ ਮਾਮਲਾ ਸਾਹਮਣੇ
ਤਕਰੀਬਨ ਡੇਢ ਹਫਤਾ ਪਹਿਲੋਂ ਚੋਰੀ ਦੇ ਮਾਮਲੇ ਵਿੱਚ ਬਾਲ ਸੁਧਾਰ ਘਰ ਵਿੱਚ ਰਹਿ ਰਹੇ ਇਕ ਨਾਬਾਲਗ ਨੇ ਜੇਲ ਸੁਪਰੀਡੈਂਟ ਨੂੰ ਸ਼ਿਕਾਇਤ ਵਿੱਚ ਦੱਸਿਆ ਸੀ ਕਿ ਕਤਲ ਕੇਸ ਦੇ ਮਾਮਲੇ ਦੇ 10 ਮੁਲਜ਼ਮ ਡਰਾ ਧਮਕਾ ਕੇ ਉਸ ਨਾਲ ਲਗਾਤਾਰ 10 ਦਿਨਾਂ ਤਕ ਬਦਫੈਲੀ ਕਰਦੇ ਰਹੇ ।
ਤਿੰਨ ਦਿਨ ਪਹਿਲੋਂ ਨੈਸ਼ਨਲ ਚਾਈਲਡ ਰਾਈਟਸ ਕਮਿਸ਼ਨ ਦੀ ਟੀਮ ਨੇ ਆਬਜ਼ਰਵੇਸ਼ਨ ਹੋਮ ਦਾ ਕੀਤਾ ਸੀ ਦੌਰਾ
ਅਜਿਹੇ ਮਾਮਲਿਆਂ ਨੂੰ ਦੇਖਦੇ ਹੋਏ ਨੈਸ਼ਨਲ ਚਾਈਲਡ ਰਾਈਟਸ ਕਮਿਸ਼ਨ ਨੇ ਤਿੰਨ ਦਿਨ ਪਹਿਲੋਂ ਬਾਲ ਸੁਧਾਰ ਘਰ ਦਾ ਦੌਰਾ ਕਰਕੇ ਸੁਰੱਖਿਆ ਪ੍ਰਬੰਧਾਂ ਅਤੇ ਨਾਬਾਲਗਾਂ ਦੇ ਹੱਕਾਂ ਦਾ ਜਾਇਜ਼ਾ ਲਿਆ ਸੀ। ਨੈਸ਼ਨਲ ਚਾਈਲਡ ਰਾਈਟਸ ਕਮਿਸ਼ਨ ਦੇ ਦੌਰੇ ਤੋਂ ਕੁਝ ਦਿਨ ਬਾਅਦ ਹੀ ਫਿਰ ਤੋਂ ਨਾਬਾਲਗ ਨਾਲ ਬਦਫੈਲੀ ਹੋਣ ਦਾ ਮਾਮਲਾ ਸਾਹਮਣੇ ਆ ਗਿਆ ਹੈ ।
