ਸ਼ੰਭੂ : ਦਿੱਲੀ ਦੇ ਕਿਸਾਨੀ ਮੋਰਚੇ ਤੋਂ ਪਰਤੇ ਕਿਸਾਨਾਂ ਦਾ ਸ਼ੰਭੂ ਬਾਰਡਰ ‘ਤੇ ਸਵਾਗਤ ਕੀਤਾ ਗਿਆ। ਇਸ ਦੌਰਾਨ ਏਅਰ ਕਰਾਫਟ ਰਾਹੀਂ ਫੁੱਲ ਵਰਸਾਉਣ ਦੇ ਨਾਲ ਬੈਂਡ ਵਾਜੇ ਤੇ ਢੋਲ ਦੀ ਥਾਪ ‘ਤੇ ਭੰਗੜੇ ਪਾਏ ਗਏ। ਕਿਸਾਨ ਮੋਰਚੇ ਦੇ ਆਗੂ ਬਲਬੀਰ ਸਿੰਘ ਰਾਜੇਵਾਲ ਦਾ ਸ਼ੰਭੂ ਬਾਰਡਰ ‘ਤੇ ਸਵਾਗਤ ਹੋਇਆ। ਜਿਉਂ ਹੀ ਰਾਜੇਵਾਲ, ਸ਼ੰਭੂ ਬਾਰਡਰ ‘ਤੇ ਆਪਣੀ ਕਾਰ ਵਿੱਚੋਂ ਨਿਕਲੇ ਉਨ੍ਹਾਂ ਦੇ ਸਵਾਗਤ ਲਈ ਪਹੁੰਚੇ ਕਿਸਾਨ ਇਰਦ-ਗਿਰਦ ਇਕੱਤਰ ਹੋ ਗਏ।
ਇਸ ਮੌਕੇ ਕਿਸਾਨਾਂ ਨੇ ਆਤਿਸ਼ਬਾਜ਼ੀ ਕੀਤੀ ਤੇ ਢੋਲ ਦੀ ਥਾਪ ‘ਤੇ ਕਿਸਾਨਾਂ ਨੇ ਭੰਗੜੇ ਪਾਏ। ਸ਼ੰਭੂ ਬਾਰਡਰ ‘ਤੇ ਸਵੇਰ ਤੋਂ ਕਿਸਾਨਾਂ ਦਾ ਆਪਣੇ ਵਾਹਨਾਂ, ਟਰੈਕਟਰ ਟਰਾਲੀਆਂ ਤੇ ਆਪਣੇ ਤੰਬੂ ਲੈ ਕੇ ਪਰਤਣਾ ਸ਼ੁਰੂ ਹੋ ਗਏ ਤੇ ਦੇਰ ਸ਼ਾਮ ਤਕ ਕੌਮੀ ਸ਼ਾਹਮਾਰਗ ‘ਤੇ ਹਜ਼ਾਰਾਂ ਦੀ ਗਿਣਤੀ ਵਿਚ ਕਿਸਾਨਾਂ ਦੇ ਵਾਹਨਾਂ ਦੀਆਂ ਕਤਾਰਾਂ ਲੱਗ ਗਈਆਂ।
ਇਸ ਮੌਕੇ ਕਿਸਾਨ ਆਗੂ ਬਲਬੀਰ ਸਿੰਘ ਰਾਜੇਵਾਲ ਦੇ ਪੁੱਤਰ ਤਜਿੰਦਰ ਸਿੰਘ ਰਾਜੇਵਾਲ ਨੇ ਕਿਹਾ ਕਿ ਇਹ ਇਤਿਹਾਸਕ ਜਿੱਤ ਹੋਈ ਹੈ। ਇਸ ਅੰਦੋਲਨ ਨੇ ਇਹ ਦਰਸਾਇਆ ਕਿ ਕੋਈ ਵੀ ਹੁਕਮਰਾਨ ਅਜਿਹੇ ਕਾਨੂੰਨ ਨਾ ਬਣਾਏ ਜਿਹੜੇ ਲੋਕਾਂ ਨੂੰ ਪ੍ਰਵਾਨ ਨਾ ਹੋਣ। ਉਨ੍ਹਾਂ ਨੇ ਕਿਸਾਨੀ ਅੰਦੋਲਨ ਦੇ ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਦਿੰਦਿਆਂ ਕਿਹਾ ਕਿ ਅੰਦੋਲਨ ਦੌਰਾਨ ਬਜ਼ੁਰਗਾਂ, ਬੀਬੀਆਂ, ਬੱਚਿਆਂ, ਨੌਜਵਾਨਾਂ ਨੇ ਜਿੰਨੇ ਸਬਰ ਸੰਤੋਖ ਨਾਲ ਰੋਸ ਜ਼ਾਹਰ ਕੀਤਾ ਹੈ, ਨੇ ਕਾਮਯਾਬੀ ਦਿਵਾਈ। ਉਨ੍ਹਾਂ ਕਿਹਾ ਕਿ ਕੇਂਦਰ ਦੇ ਹੁਕਮਰਾਨਾਂ ਨੇ ਕਿਸਾਨਾਂ ਨੂੰ ਅੱਤਵਾਦੀ, ਵੱਖਵਾਦੀ, ਨਕਸਲੀ, ਨਸ਼ੇੜੀ ਸਮੇਤ ਹੋਰ ਸ਼ਬਦਾਂ ਦਾ ਇਸਤਮਾਲ ਕਰ ਕੇ ਭੰਡਿਆ ਸੀ। ਜਦਕਿ ਹੁਣ ਓਹੀ ਕਿਸਾਨ ਪੰਜਾਬ ਦੇ ਨੌਜਵਾਨਾਂ ਨੇ ਇਸ ਜਿੱਤ ਵਿਚ ਅਹਿਮ ਰੋਲ ਅਦਾ ਕੀਤਾ ਹੈ।
