ਭੋਗਪੁਰ : ਵੀਰਵਾਰ ਸਵੇਰੇ ਮੌਸਮ ਵਿੱਚ ਆਈ ਇੱਕ ਦਮ ਤਬਦੀਲੀ ਤੇ ਧੁੰਧ ਪੈਣ ਕਰਕੇ ਜਿਥੇ ਸੜਕੀ ਆਵਾਜਾਈ ਦੀ ਰਫਤਾਰ ਮੱਠੀ ਹੁੰਦੀ ਨਜ਼ਰ ਆਈ, ਉਥੇ ਹਵਾਈ ਆਵਾਜਾਈ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ। ਇਕੱਤਰ ਜਾਣਕਾਰੀ ਅਨੁਸਾਰ ਸੈਂਟ ਮੈਰੀ ਕਾਨਵੈਂਟ ਸਕੂਲ ਸੱਧਾ ਚੱਕ (ਭੋਗਪੁਰ) ਦੀ ਗਰਾਊਂਡ ਵਿਖੇ ਜ਼ਿਆਦਾ ਧੁੰਧ ਤੇ ਬੱਦਲ ਹੋਣ ਕਰਕੇ ਹੈਲੀਕਾਪਟਰ ਦੀ ਐਮਰਜੈਂਸੀ ਲੈਂਡਿੰਗ ਕਰਵਾਈ ਗਈ, ਜਿਸ ਵਿੱਚ ਪਾਇਲਟ ਗੁਰਪ੍ਰੀਤ ਸਿੰਘ ਤੇ ਇੰਜੀਨੀਅਰ ਸਤਨਾਮ ਸਿੰਘ ਸਵਾਰ ਸਨ। ਪਾਇਲਟ ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਕੇਂਦਰ ਸਰਕਾਰ ਦੇ ਪਵਨ ਹੰਸ ਹੈਲੀਕਾਪਟਰ ਨੇ ਜੰਮੂ ਤੋਂ ਉਡਾਣ ਭਰ ਕੇ ਚੰਡੀਗੜ੍ਹ ਲੈਂਡਿੰਗ ਕਰਨੀ ਸੀ। ਪ੍ਰੰਤੂ ਅੱਜ ਮੌਸਮ ਖਰਾਬ ਹੋਣ ਤੇ ਧੁੰਧ ਪੈਣ ਕਰਕੇ ਜ਼ਿਲ੍ਹਾ ਜਲੰਧਰ ਆਕਾਸ਼ ‘ਚ 25 ਕਿੱਲੋਮੀਟਰ ਦੇ ਘੇਰੇ ਤਕ ਦਿਖਾਈ ਨਹੀ ਦੇ ਰਿਹਾ ਸੀ, ਜਿਸ ਲਈ ਹੈਲੀਕਾਪਟਰ ਉਡਾਉਣ ਵਿੱਚ ਦਿੱਕਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ, ਜਿਸ ਲਈ ਕੋਈ ਖਤਰਾ ਲਏ ਬਿਨਾ ਹੈਲੀਕਾਪਟਰ ਨੂੰ ਭੋਗਪੁਰ ਦੇ ਸਕੂਲ ਵਿਖੇ ਉਤਾਰਿਆ ਗਿਆ। ਹੈਲੀਕਾਪਟਰ ਦੀ ਸੁਰੱਖਿਆ ਲਈ ਪ੍ਰਸ਼ਾਸਨ ਵੱਲੋਂ ਪੁਲਿਸ ਤੈਨਾਤ ਕਰ ਦਿੱਤੀ ਗਈ ਹੈ।
