ਜਲੰਧਰ, ਜੇਐੱਨਐੱਨ : ਕਿਸਾਨ ਅੰਦੋਲਨ ਖ਼ਤਮ ਹੋਣ ਤੋਂ ਬਾਅਦ ਪੰਜਾਬ ਵਿਚ ਤੇਜ਼ੀ ਨਾਲ ਐਕਟਿਵ ਹੋਈ ਭਾਜਪਾ ਵਿਧਾਨ ਸਭਾ ਚੋਣਾਂ ਲਈ ਸੂਬਾ ਚੋਣ ਦਫ਼ਤਰ ਜਲੰਧਰ ਵਿਚ ਖੋਲ੍ਹਣ ਜਾ ਰਹੀ ਹੈ। ਅਗਲੇ ਇਖ ਹਫ਼ਤੇ ਵਿਚ ਸ਼ਹਿਰ ਦੇ ਲਾਜਪਤ ਨਗਰ ਵਿਚ ਰੇਡਕਰਾਸ ਭਵਨ ਦੇ ਨਾਲ ਸਟੀ ਕੋਠੀ ਭਾਜਪਾ ਦੇ ਚੋਣ ਦਫ਼ਤਰ ਦਾ ਪਤਾ ਹੋਵੇਗਾ। ਪੰਜਾਬ ਚੋਣ ਇਨਚਾਰਜ ਗਜੇਂਦਰ ਸਿੰਘ ਸ਼ੇਖਾਵਤ ਤੇ ਪੰਜਾਬ ਪ੍ਰਧਾਨ ਅਸ਼ਵਨੀ ਸ਼ਰਮਾ ਦਾ ਉਦਘਾਟਨ ਲਈ ਸਮਾਂ ਮਿਲਦੇ ਹੀ ਚੋਣ ਦਫ਼ਤਰ ਹਰਕਤ ਵਿਚ ਆ ਜਾਵੇਗਾ।
ਹਰ ਬੂਥ ਤੋਂ ਲੈ ਕੇ ਕੇਂਦਰੀ ਲੀਡਰਸ਼ਿਪ ਦੇ ਵੱਡੇ ਆਗੂਆਂ ਤਕ ਇਸ ਦਫ਼ਤਰ ਤੋਂ ਹਰ ਯੋਜਨਾ ਤਿਆਰ ਕੀਤੀ ਜਾਵੇਗੀ। ਚੋਣ ਦਫ਼ਤਰ ਦੀ ਜ਼ਿੰਮੇਵਾਰੀ ਭਾਜਪਾ ਦੇ ਕੌਮੀ ਮੀਤ ਪ੍ਰਧਾਨ ਸੌਦਾਨ ਸਿੰਘ ਤੇ ਪੰਜਾਬ ਭਾਜਪਾ ਦੇ ਸੰਗਠਨ ਜਨਰਲ ਸਕੱਤਰ ਪਵਨ ਰਾਣਾ ਦੇ ਮੋਢਿਆਂ ’ਤੇ ਹੋਵੇਗੀ। ਪੰਜਾਬ ਭਾਜਪਾ ਦੇ ਜਨਰਲ ਸਕੱਤਰ ਤੇ ਦੋਆਬਾ ਦੇ ਇੰਚਾਰਜ ਡਾ. ਸੁਭਾਸ਼ ਸ਼ਰਮਾ ਦਾ ਦਾਅਵਾ ਹੈ ਕਿ ਸੂਬਾ ਚੋਣ ਦਫ਼ਤਰ ਪੂਰੀ ਤਰ੍ਹਾਂ ਹਾਈਟੈੱਕ ਹੋ ਜਾਵੇਗਾ| ਇਸ ਦਫ਼ਤਰ ਵਿਚ ਕਾਲ ਸੈਂਟਰ, ਸੋਸ਼ਲ ਮੀਡੀਆ ਵਿੰਗ, ਮੀਡੀਆ ਸੈਂਟਰ ਹੋਵੇਗਾ। ਕਰੀਬ ਇੱਕ ਸਾਲ ਤੱਕ ਕਿਸਾਨ ਅੰਦੋਲਨ ਕਾਰਨ ਭਾਜਪਾ ਵਰਕਰ ਆਪਣੀ ਪੂਰੀ ਤਾਕਤ ਨਾਲ ਕੰਮ ਨਹੀਂ ਕਰ ਸਕੇ ਪਰ ਹੁਣ ਅਗਲੇ ਤਿੰਨ ਮਹੀਨਿਆਂ ਵਿਚ ਭਾਜਪਾ ਆਪਣੀ ਪੂਰੀ ਵਾਹ ਲਾਉਣਾ ਚਾਹੁੰਦੀ ਹੈ।
