ਅਜਨਾਲਾ (ਅੰਮ੍ਰਿਤਸਰ) : ਅਜਨਾਲਾ ਦੇ ਲਕਸ਼ਮੀ ਨਾਰਾਇਣ ਮੰਦਰ ਵਿਖੇ ਮੰਗਲਵਾਰ ਅੱਧੀ ਰਾਤ ਨੂੰ ਚੋਰ ਗਿਰੋਹ ਦੇ ਮੈਂਬਰਾਂ ਨੇ ਧਾਰਮਿਕ ਪੁਸਤਕਾਂ ਦੀ ਬੇਅਦਬੀ ਕੀਤੀ ਅਤੇ ਨਕਦੀ ਤੇ ਸੋਨੇ ਦੇ ਗਹਿਣੇ ਚੋਰੀ ਕਰ ਕੇ ਫਰਾਰ ਹੋ ਗਏ। ਘਟਨਾ ਤੋਂ ਬਾਅਦ ਲੋਕਾਂ ‘ਚ ਦਹਿਸ਼ਤ ਤੇ ਰੋਸ ਹੈ। ਐੱਸਐੱਸਪੀ ਰਾਕੇਸ਼ ਕੌਸ਼ਲ ਨੇ ਦੱਸਿਆ ਕਿ ਮਾਮਲੇ ਦੀ ਜਾਂਚ ਕਰਵਾਈ ਜਾ ਰਹੀ ਹੈ। ਸੀਸੀਟੀਵੀ ਫੁਟੇਜ ਖੰਗਾਲੇ ਜਾ ਰਹੇ ਹਨ। ਉਨ੍ਹਾਂ ਦਾਅਵਾ ਕੀਤਾ ਹੈ ਕਿ ਮੁਲਜ਼ਮ ਨੂੰ ਜਲਦ ਕਾਬੂ ਕਰ ਲਿਆ ਜਾਵੇਗਾ।
ਪੁਜਾਰੀ ਦੀ ਬਾਈਕ ਵੀ ਲੈ ਗਏ ਚੋਰ
ਸਤਯਦੇਵ ਨੇ ਦੱਸਿਆ ਕਿ ਉਹ ਸਤਯਨਾਰਾਇਣ ਮੰਦਰ ‘ਚ ਪਿਛਲੇ ਕਈ ਸਾਲਾਂ ‘ਚ ਬਤੌਰ ਪੁਜਾਰੀ ਕੰਮ ਕਰ ਰਹੇ ਹਨ। ਮੰਗਲਵਾਰ ਦੇਰ ਰਾਤ ਉਹ ਮੰਦਰ ਦੇ ਦਰਵਾਜ਼ੇ ‘ਤੇ ਦੋ ਤਾਲੇ ਲਗਾ ਕੇ ਘਰ ਚਲੇ ਗਏ ਸਨ। ਬੁੱਧਵਾਰ ਦੀ ਸਵੇਰ ਜਹਦੋਂ ਉਹ ਮੰਦਰ ਪੁੱਜੇ ਤਾਂ ਤਾਲੇ ਟੁੱਟੇ ਹੋਏ ਸਨ, ਉਨ੍ਹਾਂ ਤੁਰੰਤ ਆਸਪਾਸ ਦੇ ਲੋਕਾਂ ਨੂੰ ਘਟਨਾ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਅੰਦਰ ਜਾ ਕੇ ਦੇਖਿਆ ਤਾਂ ਧਾਰਮਿਕ ਪੁਸਤਕਾਂ ਜ਼ਮੀਨ ‘ਚ ਖਿੱਲਰੀਆਂ ਪਈਆਂ ਸਨ ਤੇ ਠਾਕੁਰ ਜੀ ਦੇ ਕੰਨਾਂ ਦੇ ਝੁਮਕੇ ਵੀ ਚੋਰੀ ਹੋ ਚੁੱਕੇ ਸਨ। ਇਸ ਦੇ ਨਾਲ ਹੀ ਮੰਦਰ ‘ਚ ਰੱਖੇ 30000 ਰੁਪਏ ਤੇ ਦਾਨ ਪੇਟੀ ਵੀ ਗ਼ਾਇਬ ਸੀ। ਮੰਦਰ ਦੇ ਪੁਜਾਰੀ ਨੇ ਦੱਸਿਆ ਕਿ ਚੋਰ ਗਿਰੋਹ ਦੇ ਮੈਂਬਰ ਫਰਾਰ ਹੁੰਦੇ ਸਮੇਂ ਮੰਦਰ ਦੇ ਬਾਹਰ ਲੱਗੀ ਉਨ੍ਹਾਂ ਦੀ ਬਾਈਕ ਵੀ ਚੋਰੀ ਕਰ ਕੇ ਫਰਾਰ ਹੋ ਗਏ।
