ਅੰਮ੍ਰਿਤਸਰ : ਟਾਟਾ ਕੰਪਨੀ ਤੇ ਪੁਲਿਸ ਨੇ ਸਾਂਝਾ ਅਪਰੇਸ਼ਨ ਚਲਾ ਕੇ ਅੰਮ੍ਰਿਤਸਰ ਵਿਚ ਚਾਰ ਥਾਂ ਨਕਲੀ ਲੂਣ ਬਣਾਉਣ ਦੀ ਫੈਕਟਰੀ ਫੜੀਆਂ ਹਨ। ਚਾਰਾਂ ਥਾਵਾਂ ਸਸਤੇ ਲੂਣ ਨੂੰ ਟਾਟਾ ਦੇ ਪੈਕੇਟਸ ਵਿਚ ਪਾ ਕੇ ਵੇਚਿਆ ਜਾ ਰਿਹਾ ਸੀ। ਜਬਤ ਕੀਤੇ ਗਏ ਲੂਣ ਦਾ ਭਾਰ ਕੁਵਿੰਟਲਾਂ ਵਿਚ ਹੈ।
ਪੁਲਿਸ ਨੇ ਚਾਰੇ ਫੈਕਟਰੀ ਮਾਲਕਾਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ। ਕੰਪਨੀ ਦੇ ਅਧਿਕਾਰੀ ਰਮੇਸ਼ ਦੱਤ ਨੇ ਦੱਸਿਆ ਕਿ ਕਾਫ਼ੀ ਸਮੇਂ ਤੋਂ ਇਲਾਕੇ ਵਿਚ ਨਕਲੀ ਲੂਣ ਦੇ ਵਿਕਣ ਦੀ ਸੂਚਨਾ ਮਿਲ ਰਹੀ ਸੀ। ਇਸ ’ਤੇ ਕੰਪਨੀ ਵਲੋਂ ਜਾਂਚ ਕੀਤੀ ਗਈ ਤੇ ਚਾਰੇ ਲੋਕੇਸ਼ਨਾਂ ਬਾਰੇ ਪੁਖ਼ਤਾ ਜਾਣਕਾਰੀ ਹਾਸਲ ਹੋ ਗਈ। ਇਸ ਤੋਂ ਬਾਅਦ ਦਿਹਾਤੀ ਪੁਲਿਸ ਐੱਸਐੱਸਪੀ ਦੇ ਨਾਲ ਸੰਪਰਕ ਕੀਤਾ ਗਿਆ, ਜਿਨ੍ਹਾਂ ਵੱਲੋਂ ਤਿੰਨ ਟੀਮਾਂ ਬਣਾ ਕੇ ਰੇਡ ਮਾਰੀ ਗਈ। ਤਿੰਨਾਂ ਟੀਮਾਂ ਨੇ ਇਕੱਠੇ ਚਾਰ ਥਾਵਾਂ ’ਤੇ ਰੇਡ ਮਾਰ ਕੇ ਕੁਵਿੰਟਲਾਂ ਦੇ ਹਿਸਾਬ ਨਾਲ ਨਕਲੀ ਲੂਣ ਜਬਤ ਕੀਤਾ ਹੈ।
ਜਾਨਵਰਾਂ ਨੂੰ ਪਾਉਣ ਵਾਲਾ ਲੂਣ ਕਰ ਰਹੇ ਸਨ ਪੈਕ
ਮੁਲਜ਼ਮ ਜਾਨਵਰਾਂ ਨੂੰ ਪਾਉਣ ਵਾਲਾ ਲੂਣ ਵਰਤ ਰਹੇ ਸਨ। ਕੰਪਨੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਟਾਟਾ ਸਾਲਟ 20 ਤੋਂ 25 ਰੁਪਏ ਪ੍ਰਤੀ ਕਿੱਲੋਗ੍ਰਾਮ ਮਿਲਦਾ ਹੈ। ਪਰ ਮੁਲਜ਼ਮ 6-7 ਰੁਪਏ ਕਿੱਲੋਗ੍ਰਾਮ ਜਾਨਵਰਾਂ ਨੂੰ ਪਾਇਆ ਜਾਣ ਵਾਲਾ ਲੂਣ ਖਰੀਦ ਕੇ ਟਾਟਾ ਦੇ ਪੈਕੇਟ ਵਿਚ ਪੈਕ ਕਰ ਰਹੇ ਸਨ, ਜਿਸ ਦੀ ਨਾ ਤਾਂ ਠੀਕ ਢੰਗ ਨਾਲ ਸਫਾਈ ਹੁੰਦੀ ਹੈ ਤੇ ਨਾ ਹੀ ਉਹ ਆਯੋਡਾਇਜਡ ਹੁੰਦਾ ਹੈ। ਅਜਿਹਾ ਲੂਣ ਖਾਣ ਨਾਲ ਗੰਭੀਰ ਬੀਮਾਰੀਆਂ ਦਾ ਵੀ ਖ਼ਤਰਾ ਬਣਿਆ ਰਹਿੰਦਾ ਹੈ।
