ਜਲੰਧਰ ਦੇ ਸ਼ਿਵ ਭਗਤਾਂ ’ਚ ਗੁੱਸਾ, ਸ਼ਿਵਲਿੰਗ ਦੀ ਚੋਰੀ ਅਤੇ ਬੇਅਦਬੀ ਦੇ ਵਿਰੋਧ ’ਚ ਕੈਂਟ ਦਾ ਬਾਜ਼ਾਰ ਕਰਵਾਇਆ ਬੰਦ

ਜਲੰਧਰ ਛਾਉਣੀ : ਪਿਛਲੇ ਦਿਨੀਂ ਰਾਮਬਾਗ ਸ਼ਮਸ਼ਾਨਘਾਟ ਦੇ ਮੰਦਿਰ ’ਚੋਂ ਸ਼ਿਵਲਿੰਗ ਚੋਰੀ ਕੀਤੇ ਜਾਣ ਦੇ ਵਿਰੋਧ ’ਚ ਵੀਰਵਾਰ ਸ਼ਿਵ ਭਗਤਾਂ ਨੇ ਬਾਜ਼ਾਰ ਬੰਦ ਕਰਵਾਇਆ। ਇਸਨੂੰ ਕੈਂਟ ਵਾਸੀਆਂ ਨੇ ਪੂਰਾ ਸਮਰਥਨ ਦਿੱਤਾ। ਸ਼ਿਵਭਗਤ ਸਵੇਰੇ 9 ਵਜੇ ਸ਼ਿਵ ਭੋਲੇ ਦੇ ਜੈਕਾਰੇ ਲਗਾਉਂਦੇ ਹੋਏ ਕੈਂਟ ਦੇ ਬਾਜ਼ਾਰਾਂ ’ਚੋਂ ਲੰਘੇ ਅਤੇ ਦੁਕਾਨਾਂ ਬੰਦ ਕਰਵਾਈਆਂ। ਇਸ ਮੌਕੇ ’ਤੇ ਕੈਂਟ ਦੇ ਕਈ ਮੰਦਿਰ ਪ੍ਰਧਾਨ ਅਤੇ ਜਲੰਧਰ ਦੀਆਂ ਹਿੰਦੂ ਸੰਸਥਾਵਾਂ ਦੇ ਅਧਿਕਾਰੀ ਵੀ ਮੌਜੂਦ ਸਨ। ਬਾਅਦ ’ਚ ਸ਼ਿਵਭਗਤ ਥਾਣਾ ਕੰਪਲੈਕਸ ਦੇ ਬਾਹਰ ਪਹੁੰਚੇ, ਜਿਥੇ ਉਨ੍ਹਾਂ ਨੇ ਸ਼ਿਲਲਿੰਗ ਦੀ ਬੇਅਦਬੀ ਅਤੇ ਚੋਰੀ ਕਰਨ ਵਾਲੇ ਦੋਸ਼ੀ ਨੂੰ ਹਾਲੇ ਤਕ ਨਾ ਫਡ਼ੇ ਜਾਣ ’ਤੇ ਰੋਸ ਪ੍ਰਗਟਾਇਆ। ਉਨ੍ਹਾਂ ਨੇ ਉਨ੍ਹਾਂ ਦੀ ਤੁਰੰਤ ਗ੍ਰਿਫ਼ਤਾਰੀ ਦੀ ਮੰਗ ਕੀਤੀ ਹੈ।

ਇਸ ਦੌਰਾਨ ਮਾਹੌਲ ਉਸ ਸਮੇਂ ਤਣਾਅਪੂਰਨ ਹੋ ਗਿਆ ਜਦੋਂ ਥਾਣਾ ਇੰਚਾਰਜ ਨੇ ਧਰਨਾਕਾਰੀਆਂ ਨੂੰ ਕਿਹਾ ਕਿ ਧਾਰਾ 147 ਲਗਾਈ ਗਈ ਹੈ, ਜੇਕਰ ਉਹ ਘਰ ਨਹੀਂ ਪਰਤਦੇ ਤਾਂ ਉਨ੍ਹਾਂ ਖਿਲਾਫ ਮਾਮਲਾ ਦਰਜ ਕੀਤਾ ਜਾਵੇਗਾ। ਇਸ ‘ਤੇ ਸ਼ਿਵ ਭਗਤ ਭੜਕ ਗਏ ਅਤੇ ਉਨ੍ਹਾਂ ਨੇ ਪੁਲਸ ਖਿਲਾਫ ਨਾਅਰੇਬਾਜ਼ੀ ਸ਼ੁਰੂ ਕਰ ਦਿੱਤੀ। ਉਹ ਥਾਣੇ ਦੇ ਗੇਟ ’ਤੇ ਦਰੀ ਵਿਛਾ ਕੇ ਬੈਠ ਗਏ। ਸ਼ਿਵ ਭਗਤਾਂ ਨੇ ਕਿਹਾ ਕਿ ਜੇਕਰ ਥਾਣਾ ਇੰਚਾਰਜ ‘ਚ ਹਿੰਮਤ ਹੈ ਤਾਂ ਉਹ ਸਾਰਿਆਂ ਖਿਲਾਫ ਮਾਮਲਾ ਦਰਜ ਕਰੇ।

ਸ਼ਿਵ ਭਗਤਾਂ ਦੇ ਵੱਧਦੇ ਰੋਹ ਨੂੰ ਦੇਖਦਿਆਂ ਮੌਕੇ ‘ਤੇ ਪਹੁੰਚੇ ਏ.ਸੀ.ਪੀ ਨੇ ਮਾਮਲਾ ਸ਼ਾਂਤ ਕਰਦਿਆਂ ਕਿਹਾ ਕਿ ਸ਼ਿਵਲਿੰਗ ਦੀ ਬੇਅਦਬੀ ਅਤੇ ਚੋਰੀ ਦੇ ਮਾਮਲੇ ‘ਚ ਪੁਲਿਸ ਪ੍ਰਸ਼ਾਸਨ ਵੀ ਮੁਸੀਬਤ ‘ਚ ਹੈ। ਪੁਲਿਸ ਕਮਿਸ਼ਨਰ ਖੁਦ ਇਸ ਦਾ ਨੋਟਿਸ ਲੈ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਨੂੰ ਹੱਲ ਕਰਨ ਲਈ 60 ਮੁਲਾਜ਼ਮਾਂ ਤੇ ਅਧਿਕਾਰੀਆਂ ਦੀ ਟੀਮ ਕੰਮ ਕਰ ਰਹੀ ਹੈ। ਏਸੀਪੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸ਼ਿਵਲਿੰਗ ਮਿਲ ਗਿਆ ਹੈ। ਮੁਲਜ਼ਮ ਉਨ੍ਹਾਂ ਦੀ ਪਕੜ ਤੋਂ ਜ਼ਿਆਦਾ ਦੂਰ ਨਹੀਂ ਹਨ।

ਇਸ ਮੌਕੇ ਹਿੰਦੀ ਕ੍ਰਾਂਤੀ ਮੰਚ ਦੇ ਪ੍ਰਧਾਨ ਮਨੋਜ ਨੰਨ੍ਹਾ, ਹਰਵਿੰਦਰ ਸਿੰਘ ਪੱਪੂ, ਵਿਕਰਮ ਬਾਂਸਲ, ਜਗਮੋਹਨ ਵਰਮਾ, ਰਜਨੀ ਸਹਿਗਲ, ਸੰਜੇ ਕਾਲੜਾ, ਸ਼ੁਭਮ ਅਗਰਵਾਲ, ਵਿਪਨ, ਮਨੋਜ ਕੁਮਾਰ, ਅਸ਼ੋਕ ਕੁਮਾਰ, ਸੁਧੀਰ, ਨੀਰਜ, ਓਮਪ੍ਰਕਾਸ਼ ਮੱਕੜ ਆਦਿ ਹਾਜ਼ਰ ਸਨ |