ਜਲੰਧਰ : ਕਾਂਗਰਸ ਛੱਡਣ ਤੋਂ ਬਾਅਦ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਬੇਸ਼ੱਕ ਆਪਣੀ ਪਾਰਟੀ ਬਣਾ ਕੇ ਭਾਰਤੀ ਜਨਤਾ ਪਾਰਟੀ ਨਾਲ ਗਠਜੋੜ ਕਰ ਕੇ ਮੁੜ ਚੋਣ ਮੈਦਾਨ ‘ਚ ਆਪਣੀ ਕਿਸਮਤ ਅਜ਼ਮਾ ਰਹੇ ਹਨ ਪਰ ਜਲੰਧਰ ਸਮੇਤ ਦੋਆਬੇ ਦੇ ਆਪਣੇ ਸਿਆਸੀ ਮੈਦਾਨ ‘ਚ ਮਜ਼ਬੂਤੀ ਲਈ ਕੈਪਟਨ ਨੂੰ ਨਵੇਂ ਸਿਰਿਓਂ ਮਿਹਨਤ ਕਰਨੀ ਪਵੇਗੀ। ਹੁਣ ਤਕ ਕਈ ਵਿਧਾਨ ਸਭਾ ਸੀਟਾਂ ‘ਤੇ ਕੈਪਟਨ ਦੇ ਉਮੀਦਵਾਰ ਇਸੇ ਇੰਤਜ਼ਾਰ ਵਿਚ ਹਨ ਕਿ ਕੈਪਟਨ ਕਦੋਂ ਆਉਣ ਤੇ ਉਨ੍ਹਾਂ ਦਾ ਚੋਣ ਪ੍ਰਚਾਰ ਜ਼ੋਰ ਫੜੇ। ਜਲੰਧਰ ਨੂੰ ਕੈਪਟਨ ਦਾ ਸਭ ਤੋਂ ਮਜ਼ਬੂਤ ਗੜ੍ਹ ਮੰਨਿਆ ਜਾਂਦਾ ਰਿਹਾ ਹੈ। ਕੈਪਟਨ ਤੋਂ ਇਲਾਵਾ ਕਾਂਗਰਸ ਦੇ ਸਭ ਤੋਂ ਸੁਰੱਖਿਅਤ ਗੜ੍ਹ ਵਜੋਂ ਪੰਜਾਬ ਭਰ ‘ਚ ਮਸ਼ਹੂਰ ਜਲੰਧਰ ਵਿਚ ਇਸ ਵਾਰ ਚੋਣ ਹਵਾ ਬਦਲਦੀ ਨਜ਼ਰ ਆ ਰਹੀ ਹੈ। ਨਾ ਤਾਂ ਕੈਪਟਨ ਹੁਣ ਤਕ ਆਪਣੇ ਪੁਰਾਣੇ ਕਿਲ੍ਹੇ ‘ਚ ਕੋਈ ਮਜ਼ਬੂਤ ਚੋਣ ਰਣਨੀਤੀ ਪੇਸ਼ ਕਰ ਸਕੇ ਹਨ ਤੇ ਨਾ ਹੀ ਕਾਂਗਰਸ ਵਿਰੋਧੀ ਪਾਰਟੀਆਂ ‘ਤੇ ਹਾਵੀ ਹੋ ਪਾ ਰਹੀ ਹੈ।
ਕੈਪਟਨ ਦੇ ਕਾਂਗਰਸ ਤੋਂ ਵੱਖ ਹੋਣ ਤੋਂ ਬਾਅਦ ਉਮੀਦ ਕੀਤੀ ਜਾ ਰਹੀ ਸੀ ਕਿ ਜਲੰਧਰ ਤੋਂ ਕੁਝ ਚੰਗੇ ਚਿਹਰੇ ਵੀ ਕੈਪਟਨ ਦੀ ਕਚਹਿਰੀ ‘ਚ ਜਾ ਸਕਦੇ ਹਨ ਪਰ ਅਜਿਹਾ ਨਹੀਂ ਹੋਇਆ। ਇਕੱਲੇ ਮਹਿੰਦਰ ਸਿੰਘ ਕੇਪੀ ਨੂੰ ਆਪਣੇ ਨਾਲ ਖੜ੍ਹਾ ਕਰਨ ਲਈ ਕੈਪਟਨ ਪਸੀਨਾ ਵਹਾਅ ਰਹੇ ਹਨ ਅਤੇ ਮਹਿੰਦਰ ਸਿੰਘ ਕੇਪੀ ਸਮੇਤ ਕੈਪਟਨ ਵੀ ਕਾਂਗਰਸ ਦੀ ਕੂਟਨੀਤੀ ‘ਚ ਉਲਝ ਚੁੱਕੇ ਹਨ। ਇਸ ਵਾਰ ਕਾਂਗਰਸ ਨੇ ਕੇਪੀ ਦੀ ਟਿਕਟ ਕੱਟ ਦਿੱਤੀ ਹੈ। ਨਾ ਤਾਂ ਉਨ੍ਹਾਂ ਨੂੰ ਜਲੰਧਰ ਪੱਛਮੀ ਸੀਟ ਤੋਂ ਚੋਣ ਮੈਦਾਨ ‘ਚ ਉਤਾਰਿਆ ਹੈ ਤੇ ਨਾ ਹੀ ਆਦਮਪੁਰ ਤੋਂ ਚੋਣ ਲੜਨ ਦਿੱਤੀ ਗਈ। ਇਸੇ ਕਾਰਨ ਕੇਪੀ ਅੱਧਵਾਟੇ ਫਸ ਗਏ ਹਨ।
