ਮੁੱਲਾਂਪੁਰ ਦਾਖਾ : ਸਵੇਰੇ ਸਾਢੇ ਸੱਤ ਵਜੇ ਦੇ ਕਰੀਬ ਪਈ ਸੰਘਣੀ ਧੁੰਦ ਕਾਰਨ ਸਥਾਨਕ ਸ਼ਹਿਰ ਦੇ ਪੰਡੋਰੀ ਨਰਸਿੰਗ ਹੋਮ ਨੇੜੇ ਪੰਜ ਵਾਹਨ ਆਪਸ ਵਿੱਚ ਟਕਰਾ ਗਏ। ਇਸ ਹਾਦਸੇ ਵਿਚ ਇੱਕ ਮੋਟਰਸਾਈਕਲ ਸਵਾਰ ਵਿਅਕਤੀ ਗੰਭੀਰ ਜ਼ਖ਼ਮੀ ਹੋ ਗਿਆ। ਜਿਸ ਨੂੰ ਲੁਧਿਆਣਾ ਦੇ ਇੱਕ ਪ੍ਰਰਾਈਵੇਟ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ । ਜਾਣਕਾਰੀ ਅਨੁਸਾਰ ਕੱਚੇ ਤੇਲ ਨਾਲ ਭਰਿਆ ਟਰੱਕ ਟੈਂਕਰ ਜਗਰਾਓਂ ਰੋਡ ਸਥਿਤ ਪੁਲ ‘ਤੇ ਖੜ੍ਹਾ ਸੀ ਜਿਸ ਦੇ ਪਿਛੇ ਫਿਰੋਜ਼ਪੁਰ ਤੋਂ ਆ ਰਹੀ ਜੁਝਾਰ ਕੰਪਨੀ ਦੀ ਟੂਰੈਸਟ ਬੱਸ ਟਕਰਾ ਗਈ ਅਤੇ ਇਸ ਦੇ ਪਿੱਛੇ ਹੀ ਇੱਕ ਫਾਰਚੂਨਰ ਗੱਡੀ ਆ ਵੱਜੀ ਤਾਂ ਇੰਨੇ ਨੂੰ ਪਿੱਛੋਂ ਆ ਰਹੀ ਪੰਜਾਬ ਰੋਡਵੇਜ ਮੋਗਾ ਡੀਪੂ ਦੀ ਬੱਸ ਦੀ ਵੀ ਇਸ ਨਾਲ ਟੱਕਰ ਹੋ ਗਈ, ਇੱਕ ਇੱਕ ਮੋਟਰਸਾਈਕਲ ਸਵਾਰ ਵੀ ਇਨ੍ਹਾਂ ਦੀ ਲਪੇਟ ਵਿੱਚ ਆ ਕੇ ਗੰਭੀਰ ਜਖਮੀ ਹੋ ਗਿਆ । ਜਿਸ ਦੀ ਪਛਾਣ ਪਿੰਕੂ ਕੋਬੀਆਲ ਵਾਸੀ ਨਾਰਾਇਣ ਬਗੜ (ਉਤਰਾਖੰਡ) ਹਾਲ ਵਾਸੀ ਮੋਗਾ ਵਜੋ ਹੋਈ ਹੈ। ਟੱਕਰ ਜਬਰਦਸਤ ਸੀ ਪਰ ਫਾਰਚੂਨਰ ਅੰਦਰ ਲੱਗੇ ਏਅਰਬੈਗ ਖੁੱਲ੍ਹ ਜਾਣ ਕਾਰਨ ਉਸ ਅੰਦਰ ਬੈਠੇ ਪਿਉ ਧੀ ਵਾਲ ਵਾਲ ਬਚ ਗਏ। ਮੋਟਰਸਾਈਕਲ ਸਵਾਰ ਗਲੋਬਲ ਹਸਪਤਾਲ ਵਿਖੇ ਆਪਣੇ ਕਿਸੇ ਰਿਸ਼ਤੇਦਾਰ ਦਾ ਪਤਾ ਲੈਣ ਲਈ ਜਾ ਰਿਹਾ ਸੀ , ਜਿਹੜਾ ਖੁਦ ਵੀ ਇਸ ਹਾਦਸੇ ਦਾ ਸ਼ਿਕਾਰ ਹੋ ਗਿਆ ਅਤੇ ਉਸ ਨੂੰ ਵੀ ਉਸੇ ਹਸਪਤਾਲ ਦਾਖਲ ਕਰਵਾਇਆ ਗਿਆ।
