ਜੇਐੱਨਐੱਨ, ਨਵੀਂ ਦਿੱਲੀ: ਪੰਜਾਬ ‘ਚ ਕਾਂਗਰਸ ਦੇ ਸੀਐੱਮ ਚਿਹਰੇ ਨੂੰ ਲੈਕੇ ਕਈ ਦਿਨ ਤੋਂ ਚਲ ਰਹੀ ਖਿੱਚੋਤਾਣ ਹੁਣ ਐਤਵਾਰ ਨੂੰ ਖਤਮ ਹੋ ਗਈ ਹੈ। ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨੇ ਆਪਣੀ ਵਰਚੂਅਲ ਰੈਲੀ ‘ਚ ਮੰਚ ਤੋਂ ਚਰਨਜੀਤ ਸਿੰਘ ਚੰਨੀ ਦੇ ਨਾਮ ਦਾ ਐਲਾਨ ਕੀਤਾ ਹੈ। ਪਰ ਇਸ ਦੇ ਨਾਲ ਹੀ ਹੁਣ ਨਵਜੋਤ ਸਿੰਘ ਸਿੱਧੂ ਦੇ ਵਿਵਹਾਰ ‘ਤੇ ਨਜ਼ਰਾਂ ਹਨ ਤੇ ਚਰਨਜੀਤ ਸਿੰਘ ਚੰਨੀ ਦੀਆਂ ਚੁਣੌਤੀਆਂ ਹੋਰ ਵੀ ਵਧ ਗਈਆਂ ਹਨ।
ਰਾਹੁਲ ਗਾਂਧੀ ਨੇ ਸੀਐੱਮ ਚਿਹਰੇ ਲਈ ਕੀਤਾ ਚਰਨਜੀਤ ਸਿੰਘ ਚੰਨੀ ਦੇ ਨਾਮ ਦਾ ਐਲਾਨ
ਰਾਹੁਲ ਗਾਂਧੀ ਨੇ ਸਾਫ਼ ਕੀਤਾ ਕਿ ਅਸੀਂ ਪੰਜਾਬ ਦੇ ਲੋਕਾਂ ,ਪਾਰਟੀ ਦੇ ਵਰਕਰਾਂ ਤੇ ਨੌਜਵਾਨਾਂ ਦੀ ਰਾਏ ਲੈਣ ਤੋਂ ਬਾਅਦ ਹੀ ਚਿਹਰਾ ਤੈਅ ਕੀਤਾ ਹੈ। ਪੰਜਾਬ ਦੇ ਲੋਕਾਂ ਦੀ ਮੰਗ ਸੀ ਕਿ ਕਿਸੇ ਗਰੀਬ ਨੂੰ ਹੀ ਸੀਐੱਮ ਚਿਹਰਾ ਬਣਾਇਆ ਜਾਵੇ। ਐਲਾਨ ਹੋਣ ਤੋਂ ਬਾਅਦ ਚਰਨਜੀਤ ਸਿੰਘ ਚੰਨੀ ਨੇ ਧੰਨਵਾਦ ਕਰਦੇ ਹੋਏ ਕਿਹਾ,’ ਮੈਂ ਮੁੱਖਮੰਤਰੀ ਬਣਨ ਤੋਂ ਬਾਅਦ ਸਿੱਧੂ ਦਾ ਪੰਜਾਬ ਮਾਡਲ ਲਾਗੂ ਕਰਾਂਗਾ।’
ਐਲਾਨ ਤੋਂ ਪਹਿਲਾਂ ਡੇਢ ਘੰਟੇ ਦੀ ਹੋਈ ਬੈਠਕ, ਪਿੱਛੇ ਹਟਣ ਨੂੰ ਰਾਜ਼ੀ ਨਹੀਂ ਸੀ ਨਵਜੋਤ ਸਿੱਧੂ
ਕਾਂਗਰਸ ਦਾ ਸੀਐੱਮ ਚਿਹਰੇ ਦਾ ਮਸਲਾ ਭਾਵੇਂ ਹੱਲ ਹੋ ਗਿਆ ਹੈ ਪਰ ਅਸਲੀ ਚੁਣੌਤੀ ਅਜੇ ਸਾਹਮਣੇ ਹੈ। ਇਸ ‘ਚ ਸਭ ਤੋਂ ਵੱਡੀ ਚੁਣੌਤੀ ਸਿੱਧੂ ਦੇ ਵਿਵਹਾਰ ਨੂੰ ਲੈਕੇ ਹੈ।ਕਿ ਉਹ ਕਿਵੇਂ ਚੰਨੀ ਦਾ ਸਹਿਯੋਗ ਕਰਨਗੇ। ਰਾਹੁਲ ਦੇ ਸਾਹਮਣੇ ਉਹ ਦੋਵੇਂ ਇਕ -ਦੂਜੇ ਦੇ ਗਲੇ ਵੀ ਮਿਲੇ ਪਰ ਇਸ ਤੋਂ ਪਹਿਲਾਂ ਸਿੱਧੂ ਦੇ ਲਹਿਜੇ ‘ਚ ਕਾਫ਼ੀ ਤਲਖੀ ਨਜ਼ਰ ਆਈ। ਉਸ ਨੇ ਕਿਹਾ, ‘ਮੈਂ ਦਰਸ਼ਨੀ ਘੋਡ਼ਾ ਬਣ ਕੇ ਨਹੀਂ ਰਹਾਂਗਾ। ਮੈਂ ਰੇਸ ‘ਚ ਦੌਡ਼ਨ ਵਾਲਾ ਅਰਬੀ ਘੋਡ਼ਾ ਹਾਂ। ਜੋ ਬਿਮਾਰ ਵੀ ਹੋਵੇ ਤਾਂ ਵੀ ਗਧੇ ਨਾਲੋਂ ਬਿਹਤਰ ਹੁੰਦਾ ਹੈ।’ ਉਸ ਦੇ ਇਸ ਅੰਦਾਜ਼ ਨਾਲ ਮੰਚ ‘ਤੇ ਬੈਠੇ ਸਾਰੇ ਕਾਂਗਰਸੀ ਨੇਤਾ ਹੈਰਾਨ ਰਹਿ ਗਏ।
ਉੱਥੇ ਹੀ ਐਲਾਨ ਤੋਂ ਪਹਿਲਾਂ ਕਾਫੀ ਦੇਰ ਤੱਕ ਸਿੱਧੂ ਨੂੰ ਮਨਾਉਣ ਦੇ ਯਤਨ ਚਲਦੇ ਰਹੇ। ਰਾਹੁਲ ਗਾਂਧੀ ਕਰੀਬ ਢਾਈ ਵਜੇ ਲੁਧਿਆਣ ਪਹੁੰਚ ਗਏ। ਇਸ ਤੋਂ ਬਾਅਦ ਇਕ ਹੋਟਲ ‘ਚ ਚਰਨਜੀਤ ਸਿੰਘ ਚੰਨੀ, ਨਵਜੋਤ ਸਿੱਧੂ, ਕੇਸੀ ਵੇਨੂਗੋਪਾਲ, ਹਰੀਸ਼ ਚੌਧਰੀ ਤੇ ਸੁਨੀਲ ਜਾਖਡ਼ ਨਾਲ ਇਕ ਬੈਠਕ ਹੋਈ। ਸੂਤਰਾਂ ਅਨੁਸਾਰ ਸਿੱਧੂ ਕਿਸੇ ਵੀ ਸ਼ਰਤ ‘ਤੇ ਪਿੱਛੇ ਨਹੀਂ ਹਟ ਰਹੇ ਸੀ, ਪਰ ਰਾਹੁਲ ਬਾਰ-ਬਾਰ ਉਨ੍ਹਾਂ ਨੂੰ ਮਨਾਉਂਦੇ ਰਹੇ।
ਕਾਂਗਰਸ ਸਾਹਮਣੇ ਪੰਜ ਵੱਡੀਆਂ ਚੁਣੌਤੀਆਂ
1. ਨਵਜੋਤ ਸਿੱਧੂ ਕੀ ਰਵੱਈਆ ਅਪਣਾਉਂਦੇ ਹਨ ਜੇ ਉਹ ਨਾਰਾਜ਼ ਰਹੇ ਤੇ ਚੰਨੀ ਦਾ ਸਾਥ ਨਾ ਦਿੱਤਾ ਤਾਂ ਪਾਰਟੀ ਨੂੰ ਕਾਫ਼ੀ ਨੁਕਸਾਨ ਹੋ ਸਕਦਾ ਹੈ।
2.ਸਿੱਧੂ ਤੋਂ ਇਲਾਵਾ ਉਨ੍ਹਾਂ ਦੇ ਨਾਲ ਚੱਲਣ ਵਾਲੇ ਤੇ ਖੁੱਲ੍ਹ ਕੇ ਵਿਰੋਧ ਕਰਨ ਵਾਲੇ ਆਗੂਆਂ ਨੂੰ ਇਕ ਮੰਚ ‘ਤੇ ਲਿਆਉਣਾ ਹੋਵੇਗਾ।
3. ਕਾਂਗਰਸ ਨੇ ਭਾਵੇਂ ਚੰਨੀ ਨੂੰ ਸੀਐੱਮ ਚਿਹਰਾ ਐਲਾਨ ਕੇ ਅਨੁਸੂਚਿਤ ਜਾਤੀ ਨੂੰ ਖੁਸ਼ ਕਰ ਲਿਆ ਹੈ ਪਰ ਜੱਟ ਸਿੱਖਾਂ ਦੀ ਨਾਰਾਜ਼ਗੀ ਵੀ ਦੂਰ ਕਰਨੀ ਹੋਵੇਗੀ।
4.ਬਾਗੀਆਂ ਨੇ ਪਹਿਲਾਂ ਹੀ ਕਾਂਗਰਸ ਲਈ ਮੁਸੀਬਤ ਵਧਾ ਦਿੱਤੀ ਹੈ। ਬਹੁਮਤ ਲਈ ਲੋੜੀਂਦੇ 59 ਵਿਧਾਇਕਾਂ ਦੀ ਜਿੱਤ ਲਈ ਇਕਜੁੱਟਤਾ ਦਿਖਾਉਣੀ ਪਵੇਗੀ।
5.ਚੋਣਾਂ ‘ਚ 13 ਦਿਨ ਬਾਕੀ ਹਨ। ਇਸ ਦੌਰਾਨ ਕਾਂਗਰਸ ਨੂੰ ਕਿਸੇ ਵੀ ਨਵੇਂ ਹੰਗਾਮੇ ਤੋਂ ਬਚਣਾ ਪਵੇਗਾ। ਪ੍ਰਚਾਰ ‘ਚ ਤੇਜ਼ੀ ਲਿਆਉਣੀ ਚਾਹੀਦੀ ਹੈ।
