ਜਲੰਧਰ ਛਾਉਣੀ : ਦੇਰ ਰਾਤ ਦਕੋਹਾ ਫਾਟਕ ਤੇ ਧੰਨੋਵਾਲੀ ਫਾਟਕ ਦੇ ਵਿਚਕਾਰ ਫਗਵਾੜਾ ਵੱਲ ਜਾਂਦੇ ਹੋਏ ਜੀਟੀ ਰੋਡ ‘ਤੇ ਗੰਨਿਆਂ ਨਾਲ ਲੱਦੀ ਤੇਜ਼ ਰਫ਼ਤਾਰ ਟਰਾਲੀ ਪਲਟਣ ਨਾਲ ਸੜਕ ‘ਤੇ ਭਾਰੀ ਜਾਮ ਲੱਗਾ ਰਿਹਾ। ਇਸ ਕਾਰਨ ਲੋਕਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਟਰਾਲੀ ਦੇ ਮਾਲਕ ਸੈਫਲਾਬਾਦ ਵਾਸੀ ਗੁਰਮੇਲ ਸਿੰਘ ਨੇ ਦੱਸਿਆ ਕਿ ਗੰਨਿਆਂ ਨਾਲ ਲੱਦੀ ਟਰਾਲੀ ਉਨ੍ਹਾਂ ਦਾ ਡਰਾਈਵਰ ਅਮਲੋਹ ਮਿੱਲ ਨੂੰ ਲੈ ਕੇ ਜਾ ਰਿਹਾ ਸੀ। ਡਰਾਈਵਰ ਵੱਲੋਂ ਅਚਾਨਕ ਬਰੇਕ ਲਾਉਣ ਕਾਰਨ ਟਰਾਲੀ ਪਲਟ ਗਈ। ਜ਼ਖ਼ਮੀ ਡਰਾਈਵਰ ਨੂੰ ਹਸਪਤਾਲ ਲਿਜਾਇਆ ਗਿਆ ਤੇ ਟਰੈਕਟਰ ਨੂੰ ਵੀ ਭਾਰੀ ਨੁਕਸਾਨ ਪਹੁੰਚਿਆ। ਸਵੇਰ ਤੋਂ ਮੌਕੇ ‘ਤੇ ਪਹੁੰਚੀਆਂ ਪੀਸੀਆਰ ਅਤੇ ਟ੍ਰੈਫਿਕ ਦੀਆਂ ਟੀਮਾਂ ਵੱਲੋਂ ਸੜਕ ਸਾਫ ਕਰਾਉਣ ਦੀਆਂ ਕੋਸ਼ਿਸ਼ਾਂ ਜਾਰੀ ਸਨ। ਪੀਸੀਆਰ ਟੀਮ ਦੇ ਏਐੱਸਆਈ ਗੁਰਮੀਤ ਸਿੰਘ ਨੇ ਦੱਸਿਆ ਕਿ ਕਰੇਨ ਦਾ ਇੰਤਜ਼ਾਮ ਕੀਤਾ ਗਿਆ ਹੈ, ਜਲਦੀ ਹੀ ਸੜਕ ਸਾਫ ਕਰਵਾ ਦਿੱਤੀ ਜਾਵੇਗੀ।
