ਦੀਪ ਸਿੱਧੂ ਦੇ ਹਾਦਸੇ ਦਾ ਚਸ਼ਮਦੀਦ ਆਇਆ ਸਾਹਮਣੇ, ਟਰਾਲਾ ਡਰਾਈਵਰ ਕਾਸਿਮ ਗ੍ਰਿਫ਼ਤਾਰ

ਸੋਨੀਪਤ : ਪੰਜਾਬੀ ਅਦਾਕਾਰ ਦੀਪ ਸਿੱਧੂ (Deep Sidhu) ਦੀ ਕਾਰ ਹਾਦਸੇ ਦਾ ਚਸ਼ਮਦੀਦ ਪੁਲਿਸ ਨੂੰ ਮਿਲ ਗਿਆ ਹੈ। ਪ੍ਰਤੱਖਦਰਸ਼ੀ ਮੁਹੰਮਦ ਯੂਸਫ ਖ਼ਾਨ ਦੀ ਕਾਰ ਦੇ ਬਰਾਬਰ ਹੋ ਕੇ ਹੀ ਸਿੱਧੂ ਦੀ ਕਾਰ ਨਿਕਲੀ ਸੀ। ਯਸਫ ਨੂੰਹ ਦੇ ਪੁਨਹਾਣਾ ਪਿੰਡ ਦਾ ਰਹਿਣ ਵਾਲਾ ਹੈ। ਉਸ ਤੋਂ ਤੁਰੰਤ ਬਾਅਦ ਇਹ ਹਾਦਸਾ ਵਾਪਰਿਆ। ਉਸ ਨੇ ਹੀ ਟਰੱਕ ਡਰਾਈਵਰ ਦੇ ਮੋਬਾਈਲ ਤੋਂ ਪੁਲਿਸ ਨੂੰ ਫੋਨ ਕਰਕੇ ਹਾਦਸੇ ਦੀ ਸੂਚਨਾ ਦਿੱਤੀ ਸੀ। ਹਾਦਸਾ ਸਕਾਰਪੀਓ ਦੀ ਅਤਿਅੰਤ ਤੇਜ਼ ਰਫ਼ਤਾਰ ਕਾਰਨ ਵਾਪਰਿਆ। ਪੁਲਿਸ ਅਨੁਸਾਰ ਇਸ ਦੀ ਰਫ਼ਤਾਰ 122 ਕਿਲੋਮੀਟਰ ਪ੍ਰਤੀ ਘੰਟਾ ਸੀ ਜਦਕਿ ਟਰੱਕ ਦੀ ਰਫ਼ਤਾਰ 40 ਕਿਲੋਮੀਟਰ ਦੇ ਕਰੀਬ ਸੀ। ਦੂਜੇ ਪਾਸੇ ਪੁਲਿਸ ਨੇ ਹਾਦਸੇ ਦੇ ਮੁਲਜ਼ਮ ਟਰੱਕ ਡਰਾਈਵਰ ਨੂੰਹ ਦੇ ਸਿੰਗਾਰ ਪਿੰਡ ਨਿਵਾਸੀ ਕਾਸਿਮ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਯੂਸਫ ਅਨੁਸਾਰ ਹਾਦਸੇ ਪਿੱਛੋਂ ਉਸ ਨੇ ਆਪਣੀ ਕਾਰ ਪਾਸੇ ਲਾ ਕੇ ਸਕਾਰਪੀਓ ’ਚੋਂ ਕੁਡ਼ੀ ਨੂੰ ਬਾਹਰ ਕੱਢਿਆ ਤੇ ਸਡ਼ਕ ਕਿਨਾਰੇ ਲਿਟਾਇਆ। ਉਹ ਠੀਕ ਸੀ ਤੇ ਉਸ ਦੇ ਲੱਕ ’ਤੇ ਮਾਡ਼ੀ ਜਿਹੀ ਸੱਟ ਲੱਗੀ ਸੀ। ਉਸ ਵੇਲੇ ਦੀਪ ਦੇ ਸਾਹ ਚੱਲ ਰਹੇ ਸਨ ਪਰ ਉਹ ਬੋਲਣ ਦੀ ਹਾਲਤ ’ਚ ਨਹੀਂ ਸੀ। ਯੂਸਫ ਨੇ ਲਡ਼ਕੀ ਰੀਨਾ ਤੋਂ ਨੰਬਰ ਲੈ ਕੇ ਦੀਪ ਦੇ ਭਰਾ ਨੂੰ ਫੋਨ ਕੀਤਾ। ਰੀਨਾ ਨੇ ਹੀ ਯੂਸਫ ਨੂੰ ਦੱਸਿਆ ਕਿ ਹਾਦਸੇ ’ਚ ਜ਼ਖ਼ਮੀ ਹੋਣ ਵਾਲਾ ਦੀਪ ਸਿੱਧੂ ਹੈ। ਡਰਾਈਵਰ ਨੂੰ ਸ਼ੁੱਕਰਵਾਰ ਨੂੰ ਅਦਾਲਤ ’ਚ ਪੇਸ਼ ਕੀਤਾ ਜਾਵੇਗਾ।