ਮੰਡੀ ਲੱਖੇਵਾਲੀ : ਦੋ ਨੌਜਵਾਨਾਂ ਨੇ ਮੰਡੀ ਲੱਖੇਵਾਲੀ ਦੇ ਦੁਕਾਨਦਾਰ ਤੋਂ ਫੋਨ ਕਰ ਕੇ 20 ਲੱਖ ਰੁਪਏ ਦੀ ਫਿਰੌਤੀ ਦੀ ਮੰਗ ਕੀਤੀ ਤੇ ਫਿਰੌਤੀ ਨਾ ਦੇਣ ਤੇ ਉਸਦੇ ਬੇਟੇ ਨੂੰ ਅਗਵਾ ਕਰਨ ਦੀ ਚਿਤਾਵਨੀ ਦਿੱਤੀ। ਮੁਕਤਸਰ ਸਾਹਿਬ ਦੇ ਪੁਲਿਸ ਕਪਤਾਨ ਸੰਦੀਪ ਮਲਿਕ ਦੇ ਦਿਸ਼ਾ ਨਿਰਦੇਸ਼ਾਂ ’ਤੇ ਕਾਰਵਾਈ ਕਰਦੇ ਹੋਏ ਪਿੰਡ ਥਾਣਾ ਲੱਖੇਵਾਲੀ ਦੀ ਪੁਲਿਸ ਨੇ ਵਪਾਰੀ ਤੋਂ 20 ਲੱਖ ਰੁਪਏ ਦੀ ਫਿਰੌਤੀ ਮੰਗਣ ਦੇ ਮਾਮਲੇ ’ਚ ਕਥਿਤ ਦੋਸ਼ਾਂ ਅਧੀਨ 2 ਵਿਅਕਤੀਆਂ ਨੂੰ ਕਾਬੂ ਕਰਨ ਤੋਂ ਬਾਅਦ ਅਦਾਲਤ ਤੋਂ ਇਕ ਦਿਨ ਦਾ ਰਿਮਾਂਡ ਹਾਸਲ ਕਰ ਲਿਆ ਹੈ। ਮੰਡੀ ਲੱਖੇਵਾਲੀ ਵਾਸੀ ਕੱਪੜਾ ਦੁਕਾਨਦਾਰ ਈਸ਼ੂ ਕੁਮਾਰ ਨੇ ਬੀਤੇ ਸੋਮਵਾਰ ਐਸਐਸਪੀ ਨੂੰ ਦਿੱਤੀ ਸ਼ਿਕਾਇਤ ’ਚ ਦੱਸਿਆ ਕਿ ਉਸਨੂੰ ਕਿਸੇ ਦਾ ਫੋਨ ਆਇਆ ਹੈ। ਫੋਨ ਕਰਨ ਵਾਲੇ ਵਿਅਕਤੀ ਨੇ ਉਸ ਤੋਂ 20 ਲੱਖ ਰੁਪਏ ਦੀ ਫਿਰੌਤੀ ਦੀ ਮੰਗ ਕੀਤੀ ਹੈ। ਫਿਰੌਤੀ ਨਾ ਦੇਣ ਦੀ ਸੂਰਤ ’ਚ ਵੁਸਦੇ ਬੇਟੇ ਨੂੰ ਅਗ੍ਹਵਾ ਕਰਨਦੀ ਚੇਤਾਵਨੀ ਦਿੱਤੀ ਹੈ। ਪੁਲਿਸ ਨੇ ਸ਼ਿਕਾਇਤ ਮਿਲਦਿਆਂ ਹੀ ਮਾਮਲੇ ਦੀ ਪੜਤਾਲ ਸ਼ੁਰੂ ਕਰ ਦਿੱਤੀ। ਜਿਸ ਵਿਅਕਤੀ ਦੇ ਫੋਨ ਤੋਂ ਕਾਲ ਆਈ ਸੀ ਉਸਦਾ ਪਤਾ ਲਗਾ ਕੇ ਉਸਤੋਂ ਪੁੱਛਗਿੱਛ ਕੀਤੀ ਤਾਂ ਉਸਨੇ ਦੱਸਿਆ ਕਿ ਉਹ ਪੈਟਰੋਲ ਪੰਪ ’ਤੇ ਤੇਲ ਪਾਉਣ ਦਾ ਕੰਮ ਕਰਦਾ ਹੈ। ਉਸ ਕੋਲ ਹਰਦੀਪ ਸਿੰਘ ਤੇ ਵਿਸ਼ਨੂੰ ਪ੍ਰਸ਼ਾਦ ਆਏ ਸਨ ਜਿਸ ’ਚੋਂ ਵਿਸ਼ਨੂੰ ਪ੍ਰਸ਼ਾਦ ਨੇ ਉਸਦੇ ਫੋਨ ਤੋਂ ਕਿਸੇ ਨੂੰ ਕਾਲ ਕੀਤੀ ਸੀ। ਉਸਦਾ ਕਹਿਣਾ ਸੀ ਕਿ ਉਹ ਆਪਣਾ ਫੋਨ ਘਰ ਭੁੱਲ ਆਏ ਹਨ ਤੇ ਕਿਸੇ ਨੂੰ ਜਰੂਰੀ ਫੋਨ ਕਰਨਾ ਹੈ। ਇਹ ਦੋਨੋਂ ਵਿਅਕਤੀ ਉਸ ਕੋਲੋਂ ਤੇਲ ਪਵਾਉਣ ਲਈ ਆਉਂਦੇ ਰਹਿੰਦੇ ਹਨ। ਉਸਦੇ ਬਾਅਦ ਪੁਲਿਸ ਨੇ ਉਕਤ ਦੋਨਾਂ ਵਿਅਕਤੀਆਂ ਦੀ ਭਾਲ ਕਰਕੇ ਉਨ੍ਹਾਂ ਨੂੰ ਕਾਬੂ ਕਰ ਲਿਆ। ਮੁਲਜ਼ਮ ਹਰਦੀਪ ਸਿੰਘ ਮੂਲ ਰੂਪ ’ਚ ਮੰਡੀ ਲੱਖੇਵਾਲੀ ਦਾ ਹੀ ਵਾਸੀ ਹੈ ਪਰ ਹੁਣ ਉਹ ਗੋਨਿਆਣਾ ਮੰਡੀ ਦੀ ਗੁਰੂ ਨਾਨਕ ਨਗਰੀ ’ਚ ਰਹਿੰਦਾ ਹੈ। ਜਦਕਿ ਦੂਜਾ ਮੁਲਜ਼ਮ ਵਿਸ਼ਣੂ ਪ੍ਰਸ਼ਾਦ ਮੰਡੀ ਲੱਖਵਾਲੀ ’ਚ ਹੀ ਰਹਿੰਦਾ ਹੈ। ਪੁਲਿਸ ਨੇ ਬੁੱਧਵਾਰ ਨੂੰ ਦੋਨਾਂ ਨੂੰ ਗ੍ਰਿਫਤਾਰ ਕਰਨ ਤੋਂ ਬਾਅਦ ਮਲੋਟ ਦੀ ਐਸਡੀਜੇਐਮ ਅਦਾਲਤ ’ਚ ਪੇਸ਼ ਕਰਕੇ ਇਕ ਦਿਨ ਦੇ ਰਿਮਾਂਡ ਦੀ ਮੰਗ ਕੀਤੀ ਜਿਸਦੇ ਬਾਅਦ ਅਦਾਲਤ ਨੇ ਇਕ ਦਿਨ ਦੇ ਰਿਮਾਂਡ ’ਤੇ ਦੋਨਾਂ ਮੁਲਜ਼ਮਾਂ ਨੂੰ ਪੁਲਿਸ ਨੂੰ ਸੌਂਪ ਦਿੱਤਾ।
