ਚੰਡੀਗਡ਼੍ਹ : Ukraine-Russia News : ਯੂਕਰੇਨ ’ਤੇ ਰੂਸ ਦੇ ਹਮਲੇ ਤੋਂ ਬਾਅਦ ਭਾਰਤ ’ਚ ਜਿਹਡ਼ਾ ਸਭ ਤੋਂ ਅਹਿਮ ਮੁੱਦਾ ਉੱਭਰ ਕੇ ਸਾਹਮਣੇ ਆਇਆ ਹੈ, ਉਹ ਇਹ ਹੈ ਕਿ ਆਖ਼ਰ ਕੀ ਕਾਰਨ ਹੈ ਕਿ ਵੱਖ-ਵੱਖ ਸੂਬਿਆਂ ਦੇ ਵਿਦਿਆਰਥੀ ਮੈਡੀਕਲ ਐਜੂਕੇਸ਼ਨ ਲਈ ਉੱਥੇ ਜਾ ਰਹੇ ਹਨ? ਕੀ ਪੰਜਾਬ, ਹਰਿਆਣਾ, ਉੱਤਰ ਪ੍ਰਦੇਸ਼ ਤੇ ਦੱਖਣੀ ਭਾਰਤ ਦੇ ਸੂਬਿਆਂ ’ਚ ਮੈਡੀਕਲ ਐਜੂਕੇਸ਼ਨ (Medical Education) ਦਾ ਪੱਧਰ ਯੂਕਰੇਨ ਵਾਂਗ ਚੰਗਾ ਨਹੀਂ ਹੈ? ਮੈਡੀਕਲ ਦੀ ਪਡ਼੍ਹਾਈ ਲਈ ਯੂਕਰੇਨ ਜਾਣ ਵਾਲਿਆਂ ’ਚ ਇਨ੍ਹਾਂ ਸੂਬਿਆਂ ਦੇ ਵਿਦਿਆਰਥੀ ਸਭ ਤੋਂ ਜ਼ਿਆਦਾ ਹਨ।
ਚੰਡੀਗਡ਼੍ਹ ਦੀ ਵਿਦਿਆਰਥਣ ਵਿਸ਼ਾਖਾ, ਜੋ ਇਸ ਸਮੇਂ ਯੂਕਰੇਨ ਦੇ ਉਜਰੋਦ ਸ਼ਹਿਰ ’ਚ ਐੱਮਬੀਬੀਐੱਸ ਕਰ ਰਹੀ ਹੈ, ਦੱਸਦੇ ਹਨ ਕਿ ਇੱਥੇ ਮੈਡੀਕਲ ਦੀ ਪਡ਼੍ਹਾਈ ’ਚ 3800 ਡਾਲਰ ਪ੍ਰਤੀ ਸਾਲ ਖਰਚ ਹੁੰਦੇ ਹਨ, ਜਿਹਡ਼ੇ ਤਿੰਨ ਲੱਖ ਰੁਪਏ ਬਣਦੇ ਹਨ, ਜਦਕਿ ਭਾਰਤ ’ਚ ਪ੍ਰਾਈਵੇਟ ਮੈਡੀਕਲ ਕਾਲਜਾਂ ’ਚ ਪਡ਼੍ਹਾਈ ਏਨੀ ਮਹਿੰਗੀ ਹੋ ਗਈ ਹੈ ਕਿ ਇਹ ਹਰ ਪਰਿਵਾਰ ਦੇ ਵੱਸ ਦੀ ਗੱਲ ਨਹੀਂ ਰਹਿ ਗਈ। ਸਿਰਫ਼ ਸਰਕਾਰੀ ਕਾਲਜਾਂ ’ਚ ਦਾਖ਼ਲਾ ਹੋਵੇ, ਤਾਂ ਹੀ ਪਰਿਵਾਰ ਆਪਣੇ ਬੱਚਿਆਂ ਨੂੰ ਐੱਮਬੀਬੀਐੱਸ ਕਰਵਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਦੇ ਕਿਸੇ ਵੀ ਪ੍ਰਾਈਵੇਟ ਮੈਡੀਕਲ ਕਾਲਜ ’ਚ ਐੱਮਬੀਬੀਐੱਸ ਦਾ ਸਾਰਾ ਕੋਰਸ (ਫੀਸ, ਰਹਿਣਾ, ਕਿਤਾਬਾਂ ਆਦਿ) ਇਕ ਕਰੋਡ਼ ਰੁਪਏ ਤਕ ’ਚ ਪੈਣ ਲੱਗਾ ਹੈ, ਜਦਕਿ ਯੂਕਰੇਨ ’ਚ ਇਹ 15 ਤੋਂ 20 ਲੱਖ ’ਚ ਹੋ ਜਾਂਦਾ ਹੈ।
ਪੰਜਾਬ ਦੇ ਪ੍ਰਾਈਵੇਟ ਕਾਲਜਾਂ ’ਚ ਹੁਣ ਐੱਮਬੀਬੀਐੱਸ ਦੀ ਫੀਸ 11 ਲੱਖ ਰੁਪਏ ਪ੍ਰਤੀ ਸਾਲ ਹੈ। ਹਰਿਆਣਾ ਦੇ ਕਾਲਜਾਂ ’ਚ ਉਹ ਉਸ ਤੋਂ ਵੀ ਜ਼ਿਆਦਾ ਹੈ, ਜਦਕਿ ਸਰਕਾਰੀ ਮੈਡੀਕਲ ਕਾਲਜਾਂ ’ਚ ਨਾ ਤਾਂ ਸੀਟਾਂ ਵਧਾਈਆਂ ਜਾ ਰਹੀਆਂ ਹਨ ਤੇ ਨਾ ਹੀ ਨਵੇਂ ਮੈਡੀਕਲ ਕਾਲਜ ਖੋਲ੍ਹੇ ਜਾ ਰਹੇ ਹਨ। ਪੰਜਾਬ ’ਚ ਲੰਬੇ ਸਮੇਂ ਤੋਂ ਤਿੰਨ ਹੀ ਮੈਡੀਕਲ ਕਾਲਜ ਹਨ। ਇਨ੍ਹਾਂ ’ਚ ਪਟਿਆਲਾ, ਅੰਮ੍ਰਿਤਸਰ ਤੇ ਫਰੀਦਕੋਟ ਸ਼ਾਮਲ ਹਨ। ਸੂਬਾ ਸਰਕਾਰ ਵੱਲੋਂ ਕੋਈ ਨਵਾਂ ਮੈਡੀਕਲ ਕਾਲਜ ਨਹੀਂ ਖੋਲ੍ਹਿਆ ਗਿਆ। ਇਸੇ ਤਰ੍ਹਾਂ ਲੁਧਿਆਣਾ ਦੇ ਦਯਾਨੰਦ ਮੈਡੀਕਲ ਕਾਲਜ (ਡੀਐੱਮਸੀ) ਤੇ ਕ੍ਰਿਸ਼ਚਨ ਮੈਡੀਕਲ ਕਾਲਜ (ਸੀਐੱਮਸੀ) ਵੀ ਸਾਲਾਂ ਪੁਰਾਣੇ ਹਨ। ਸਿਰਫ਼ ਪ੍ਰਾਈਵੇਟ ਸੈਕਟਰ ’ਚ ਹੀ ਨਵੇਂ ਕਾਲਜ ਖੁੱਲ੍ਹੇ ਹਨ, ਪਰ ਇਨ੍ਹਾਂ ਦੀ ਫੀਸ ਮੱਧ ਵਰਗ ਹੀ ਨਹੀਂ, ਉੱਚ ਵਰਗ ਦੀ ਸਮਰੱਥਾ ਤੋਂ ਵੀ ਬਾਹਰ ਹੈ। ਇਹੀ ਕਾਰਨ ਹੈ ਕਿ ਪੰਜਾਬ ਸਮੇਤ ਹੋਰ ਸੂਬਿਆਂ ਦੇ 18 ਤੋਂ 20 ਹਜ਼ਾਰ ਵਿਦਿਆਰਥੀ ਯੂਕਰੇਨ ’ਚ ਮੈਡੀਕਲ ਦੀ ਪਡ਼੍ਹਾਈ ਕਰ ਰਹੇ ਹਨ।
ਜਾਨ ਤੇ ਭਵਿੱਖ ਦੀ ਚਿੰਤਾ
ਇਸ ਸਮੇਂ ਯੂਕਰੇਨ ’ਚ ਫਸੇ ਹਜ਼ਾਰਾਂ ਵਿਦਿਆਰਥੀਆਂ ਨੂੰ ਸਭ ਤੋਂ ਵੱਡੀ ਚਿੰਤਾ ਆਪਣੀ ਜਾਨ ਦੀ ਹੈ। ਵਿਸ਼ਾਖਾ ਕਹਿੰਦੇ ਹਨ ਕਿ ਯੂਕਰੇਨ ਦੇ ਸਾਰੇ ਸ਼ਹਿਰਾਂ ਤੋਂ ਵਿਦਿਆਰਥੀਆਂ ਦੀ ਹਿਜਰਤ ਸ਼ੁਰੂ ਹੋ ਗਈ ਹੈ। ਉਨ੍ਹਾਂ ਦੇ ਕਈ ਸਹਿਪਾਠੀ, ਜਿਨ੍ਹਾਂ ਦੀ ਫਲਾਈਟ 24 ਫਰਵਰੀ ਨੂੰ ਸੀ, ਰਾਜਧਾਨੀ ਕੀਵ ’ਚ ਫਸ ਗਏ ਹਨ। ਉਹ ਕਿਸੇ ਬੰਕਰ ’ਚ ਲੁਕੇ ਹਨ ਤੇ ਕਾਫ਼ੀ ਪਰੇਸ਼ਾਨ ਹਨ। ਉਨ੍ਹਾਂ ਨੂੰ ਤੇ ਉਨ੍ਹਾਂ ਦੇ ਕਈ ਸਾਥੀਆਂ ਨੂੰ ਸ਼ਨਿਚਰਵਾਰ ਨੂੰ ਬੱਸ ਦੇ ਜ਼ਰੀਏ ਹੰਗਰੀ ਲਿਆਂਦਾ ਜਾ ਰਿਹਾ ਹੈ, ਜਿੱਥੋਂ ਅੱਗੇ ਉਹ ਭਾਰਤ ਕਿਵੇਂ ਪਰਤਣਗੇ, ਇਸਦੀ ਕੋਈ ਜਾਣਕਾਰੀ ਨਹੀਂ ਹੈ। ਭਾਰਤ ਸੁਰੱਖਿਅਤ ਪਰਤਣ ਤੋਂ ਬਾਅਦ ਉਨ੍ਹਾਂ ਦੇ ਸਾਹਮਣੇ ਆਪਣੇ ਭਵਿੱਖ ਦੀ ਚਿੰਤਾ ਹੈ।
ਨਹੀਂ ਮਿਲ ਰਹੀ ਮਦਦ
ਉੱਤਰ ਪ੍ਰਦੇਸ਼ ਦੇ ਮੁਜ਼ੱਫਰਨਗਰ ਦੇ ਵਿਦਿਆਰਥੀ ਮੁਹੰਮਦ ਅਜ਼ਹਰ ਆਪਣੇ ਕਈ ਸਹਿਪਾਠੀਆਂ ਨਾਲ ਕੀਵ ’ਚ ਫਸ ਗਏ ਹਨ। ਉਨ੍ਹਾਂ ਕਿਹਾ ਕਿ ਸਾਨੂੰ ਕੁਝ ਵੀ ਸਪਸ਼ਟ ਨਹੀਂ ਕੀਤਾ ਜਾ ਰਿਹਾ। ਅਸੀਂ ਦੂਤਘਰ ’ਚ ਵੀ ਗਏ। ਉੱਥੇ ਵੀ ਕੋਈ ਮਦਦ ਨਹੀਂ ਕਰ ਰਿਹਾ। ਅਧਿਕਾਰੀ ਕਹਿ ਰਹੇ ਹਨ ਕਿ ਆਪਣੇ ਕੰਟਰੈਕਟਰ ਨਾਲ ਗੱਲ ਕਰੋ ਤੇ ਕੰਟਰੈਕਟਰ ਕਹਿ ਰਹੇ ਹਨ ਕਿ ਦੂਤਘਰ ਵਾਲੇ ਹੀ ਕੁਝ ਦੱਸ ਸਕਣਗੇ। ਬਾਹਰ ਬੰਬਾਰੀ ਹੋ ਰਹੀ ਹੈ ਤੇ ਸਾਨੂੰ ਕਿਹਾ ਜਾ ਰਿਹਾ ਹੈ ਕਿ ਬਾਹਰ ਜਾਓ।
