ਬਠਿੰਡਾ : ਜ਼ਿਲ੍ਹੇ ਦੇ ਪਿੰਡ ਪੂਹਲਾ ਵਿਚ ਆੜ੍ਹਤੀਏ ਤੇ ਉਸਦੇ ਸਾਥੀ ਤੋਂ ਤੰਗ ਆ ਕੇ ਇਕ ਨੌਜਵਾਨ ਕਿਸਾਨ ਨੇ ਫਾਹਾ ਲਗਾ ਕੇ ਖੁਦਕੁਸ਼ੀ ਕਰ ਲਈ। ਉਕਤ ਕਿਸਾਨ ਨੇ ਖ਼ੁਦਕਸ਼ੀ ਕਰਨ ਤੋਂ ਪਹਿਲਾਂ ਫੇਸਬੁੱਕ ’ਤੇ ਲਾਈਵ ਹੋ ਕੇ ਆਪਣਾ ਦੁੱਖ ਦੱਸਿਆ। ਮ੍ਰਿਤਕ ਕਿਸਾਨ ਦੀ ਪਛਾਣ ਹਰਚਰਨ ਸਿੰਘ ਉਰਫ ਕਾਲਾ ਪੁੱਤਰ ਜਗਜੀਤ ਸਿੰਘ ਵਾਸੀ ਪੂਹਲਾ ਵਜੋਂ ਹੋਈ ਹੈ। ਉਸ ਨੇ ਖੁਦਕੁਸ਼ੀ ਤੋਂ ਪਹਿਲਾਂ ਫੇਸਬੁੱਕ ਤੇ ਲਾਈਵ ਹੋ ਕੇ ਕਿਹਾ ਕਿ ਮਰਨ ਨੂੰ ਕਿਸੇ ਦਾ ਦਿਲ ਨਹੀਂ ਕਰਦਾ। ਮੈਂ ਆਪਣੇ ਜਵਾਕਾਂ ਨੂੰ ਬੜੇ ਸ਼ੌਕ ਨਾਲ ਪਾਲ ਰਿਹਾ ਸੀ, ਪਰ ਦੋ ਬੰਦਿਆਂ ਨੇ ਮੇਰੀ ਜ਼ਿੰਦਗੀ ਤਬਾਹ ਕਰ ਦਿੱਤੀ ਹੈ। ਮੇਰਾ ਹੁਣ ਦੋ ਚਿੱਤਾ ਮਨ ਹੈ, ਛੋਟੇ ਜਿਹੇ ਜਵਾਕ ’ਤੇ ਐਡੀ ਵੱਡੀ ਜ਼ਿੰਮੇਵਾਰੀ ਛੱਡ ਕੇ ਕਿਵੇਂ ਜਾ ਸਕਦਾ ਹਾਂ, ਪਰ ਮੇਰੀ ਵੀ ਮਜਬੂਰੀ ਹੈ। ਬੰਦਾ ਚਾਰ ਹਜ਼ਾਰ ਦਾ ਘਾਟਾ ਨਹੀਂ ਝੱਲ ਸਕਦਾ ਪਰ ਮੈਨੂੰ ਚਾਲੀ ਲੱਖ ਦਾ ਘਾਟਾ ਦਿੱਤਾ ਗਿਆ ਹੈ। ਆੜ੍ਹਤੀਏ ਨੇ ਜਾਦੂ ਨਾਲ ਮਿਲ ਕੇ ਮੇਰੇ ਨਾਲ ਚਾਲੀ ਲੱਖ ਦੀ ਠੱਗੀ ਮਾਰੀ ਹੈ ਜੇ ਮੈਂ ਸੱਚਾ ਹਾਂ ਤਾਂ ਮੇਰਾ ਸਾਥ ਦਿਓ ਨਹੀਂ ਭਾਵੇਂ ਰਹਿਣ ਦਿਓ। ਪੀੜਤ ਕਿਸਾਨ ਨੇ ਖੁਦਕੁਸ਼ੀ ਤੋਂ ਪਹਿਲਾਂ ਲਾਈਵ ਹੋ ਕੇ ਕਿਹਾ ਕਿ ਜਾਦੂ ਦੇ ਜੇ ਫਾਰਮ ਫਰੋਲ ਲਓ। ਆੜ੍ਹਤੀਆ ਕਹਿੰਦਾ ਸੀ ਕਿ ਤੂੰ ਪੈਸੇ ਘਰੇ ਖ਼ਰਾਬ ਨਾ ਕਰ ਲਈ ਮੈਂ ਤੈਨੂੰ ਚਾਰ ਕਿੱਲੇ ਵਾਹਣ ਲੈ ਕੇ ਦੇਵਾਂਗਾਂ, ਪਰ ਹੁਣ ਉਹ ਮੇਰੇ ਨਾਲ ਠੱਗੀ ਮਾਰ ਗਿਆ।
ਮ੍ਰਿਤਕ ਕਿਸਾਨ ਦੀ ਪਤਨੀ ਹਰਪ੍ਰੀਤ ਕੌਰ ਨੇ ਦੱਸਿਆ ਕਿ ਉਸ ਦਾ ਪਤੀ ਕਰੀਬ ਚਾਲੀ ਏਕੜ ਰਕਬੇ ਵਿਚ ਖੇਤੀ ਕਰਦਾ ਸੀ। ਉਸ ਨੇ ਦੱਸਿਆ ਕਿ ਉਹ ਆਪਣੀ ਬੱਚਤ ਆਡ਼੍ਹਤੀਏ ਕੋਲ ਜਮ੍ਹਾਂ ਕਰਦਾ ਆ ਰਿਹਾ ਸੀ। ਪੀਡ਼ਤ ਨੇ ਦੱਸਿਆ ਕਿ ਆੜ੍ਹਤੀਏ ਨੇ ਉਸ ਨਾਲ ਵਾਅਦਾ ਕੀਤਾ ਸੀ ਕਿ ਉਸ ਦੇ ਬਣਦੇ ਕਰੀਬ ਸਾਢੇ ਚਾਲੀ ਲੱਖ ਰੁਪਏ ਨਾਲ ਉਹ ਉਸ ਨੂੰ ਜ਼ਮੀਨ ਖ਼ਰੀਦ ਕੇ ਦੇਵੇਗਾ। ਮ੍ਰਿਤਕ ਕਿਸਾਨ ਦੀ ਪਤਨੀ ਹਰਪ੍ਰੀਤ ਕੌਰ ਨੇ ਦੱਸਿਆ ਕਿ ਉਹ ਹੱਥ ਘੁੱਟ ਕੇ ਪੈਸੇ ਬਚਾ ਰਹੇ ਸਨ, ਜਿਨ੍ਹਾਂ ਨੂੰ ਆੜ੍ਹਤੀਏ ਕੋਲ ਰੱਖਿਆ ਗਿਆ ਸੀ। ਉਸ ਨੇ ਦੱਸਿਆ ਕਿ ਉਸ ਦਾ ਪਤੀ ਹੁਣ ਆੜ੍ਹਤੀਏ ਕੋਲੋਂ ਆਪਣੇ ਸਾਢੇ ਚਾਲੀ ਲੱਖ ਰੁਪਏ ਮੰਗ ਰਿਹਾ ਸੀ। ਉਸ ਨੇ ਦੱਸਿਆ ਕਿ ਦੋ ਦਿਨ ਪਹਿਲਾਂ ਹੀ ਆਡ਼੍ਹਤੀਏ ਨੇ ਉਸਦੇ ਪਤੀ ਨੂੰ ਘਰ ਤੋਂ ਬਾਹਰ ਸੱਦਿਆ ਅਤੇ ਉਸ ਦੀ ਬਣਦੀ ਰਕਮ ਵਾਪਸ ਦੇਣ ਦਾ ਭਰੋਸਾ ਦਿੱਤਾ। ਉਸ ਨੇ ਦੱਸਿਆ ਕਿ ਆੜ੍ਹਤੀਆ ਧੋਖੇ ਨਾਲ ਉਸ ਦੇ ਪਤੀ ਤੋਂ ਖਾਲੀ ਚੈੱਕ ਲੈ ਗਿਆ ਕਿ ਉਸ ਨੇ ਉਸ ਦੇ ਖਾਤੇ ਵਿਚ ਪੈਸੇ ਟਰਾਂਸਫਰ ਕਰਨੇ ਹਨ।
ਇਸ ਤੋਂ ਬਾਅਦ ਆੜ੍ਹਤੀਏ ਤੇ ਉਸਦੇ ਸਾਥੀ ਨੇ ਉਸਦੇ ਪਤੀ ਨੂੰ ਧਮਕੀਆਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ, ਜਿਸ ਤੋਂ ਤੰਗ ਹੋ ਕੇ ਉਸ ਨੇ ਅੱਜ ਸਵੇਰੇ ਰੱਸੇ ਨਾਲ ਲਮਕ ਕੇ ਫਾਹਾ ਲੈ ਲਿਆ। ਮ੍ਰਿਤਕ ਕਿਸਾਨ ਦੀ ਪੀਡ਼ਤ ਪਤਨੀ ਨੇ ਮੰਗ ਕੀਤੀ ਹੈ ਕਿ ਉਨ੍ਹਾਂ ਦਾ ਸਾਢੇ ਚਾਲੀ ਲੱਖ ਰੁਪਿਆ ਆੜ੍ਹਤੀਏ ਤੋਂ ਵਾਪਸ ਦਿਵਾਇਆ ਜਾਵੇ ਅਤੇ ਉਨ੍ਹਾਂ ਨੂੰ ਇਨਸਾਫ ਦਿੱਤਾ ਜਾਵੇ। ਮ੍ਰਿਤਕ ਕਿਸਾਨ ਹਰਚਰਨ ਸਿੰਘ ਆਪਣੇ ਪਿੱਛੇ ਪਤਨੀ ਤੋਂ ਇਲਾਵਾ 15 ਸਾਲ ਦਾ ਲੜਕਾ ਤੇ 15 ਸਾਲ ਦੀ ਲੜਕੀ ਨੂੰ ਛੱਡ ਗਿਆ।
ਥਾਣਾ ਨਥਾਣਾ ਦੇ ਐਸਐਚਓ ਸੁਖਵਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਪੈਸਿਆਂ ਦੇ ਲੈਣ ਦੇਣ ਕਾਰਨ ਹਰਚਰਨ ਸਿੰਘ ਉਰਫ ਕਾਲਾ ਵਾਸੀ ਪੂਹਲਾ ਨੇ ਖੁਦਕੁਸ਼ੀ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਮ੍ਰਿਤਕ ਦੀ ਪਤਨੀ ਹਰਪ੍ਰੀਤ ਕੌਰ ਦੇ ਬਿਆਨਾਂ ਦੇ ਆਧਾਰ ‘ਤੇ ਯਾਦਵਿੰਦਰ ਸਿੰਘ ਜਾਦੂ ਵਾਸੀ ਪੂਹਲਾ ਅਤੇ ਆੜ੍ਹਤੀਆ ਬਲਜਿੰਦਰ ਸਿੰਘ ਭੁੱਚੋ ਮੰਡੀ ਖ਼ਿਲਾਫ਼ ਕੇਸ ਦਰਜ ਕਰਕੇ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ।
