ਤਰਨਤਾਰਨ/ਸ੍ਰੀ ਗੋਇੰਦਵਾਲ ਸਾਹਿਬ : ਮੋਬਾਈਲ ਫੋਨ, ਨਸ਼ੀਲੇ ਪਦਾਰਥ ਅਤੇ ਨਜਾਇਜ਼ ਸ਼ਰਾਬ ਦੀ ਬਰਾਮਦਗੀ ਨੂੰ ਲੈ ਕੇ ਉਦਘਾਟਨ ਦੇ ਕੁਝ ਦਿਨ ਬਾਅਦ ਤੋਂ ਹੀ ਚਰਚਾ ਵਿਚ ਆਈ ਸ੍ਰੀ ਗੋਇੰਦਵਾਲ ਸਾਹਿਬ ਦੀ ਕੇਂਦਰੀ ਜੇਲ੍ਹ ’ਚ ਜੇਲ੍ਹ ਪ੍ਰਸ਼ਾਸਨ ਨੇ ਅਚਾਨਕ ਤਲਾਸ਼ੀ ਅਭਿਆਨ ਚਲਾਇਆ ਹੈ। ਜਿਸ ਦੌਰਾਨ ਜੇਲ੍ਹ ਵਿਚੋਂ ਵੱਡੀ ਗਿਣਤੀ ਵਿਚ ਮੋਬਾਈਲ ਫੋਨ ਅਤੇ ਨਸ਼ੀਲੇ ਪਦਾਰਥ ਮਿਲਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਬਰਾਮਦਗੀ ਸਬੰਧੀ ਜੇਲ੍ਹ ਪ੍ਰਸ਼ਾਸਨ ਦੀ ਸ਼ਿਕਾਇਤ ’ਤੇ ਥਾਣਾ ਸ੍ਰੀ ਗੋਇੰਦਵਾਲ ਸਾਹਿਬ ਵਿਖੇ ਪੰਜ ਲੋਕਾਂ ਦੇ ਖਿਲਾਫ ਕੇਸ ਦਰਜ ਕੀਤਾ ਗਿਆ ਹੈ।
ਜੇਲ੍ਹ ਸੁਪਰਡੈਂਟ ਨੇ ਖੁਫੀਆ ਸੂਚਨਾ ਦੇ ਅਧਾਰ ’ਤੇ ਜੇਲ੍ਹ ਦੇ ਸਹਾਇਕ ਸੁਪਰਡੈਂਟਾਂ ਅਤੇ ਹੋਰ ਕਰਮਚਾਰੀਆਂ ਸਮੇਤ ਅਚਾਨਕ ਤਲਾਸ਼ੀ ਅਭਿਆਨ ਜੇਲ੍ਹ ਵਿਚ ਚਲਾਇਆ। ਇਸ ਦੌਰਾਨ ਬੈਰਕ ਨੰਬਰ 3 ਦੇ ਕਮਰਾ ਨੰਬਰ 4 ਵਿਚ ਬੰਦ ਬੰਦੀਆਂ ਰਜੀਵ ਕੁਮਾਰ ਪੁੱਤਰ ਰਾਜ ਕੁਮਾਰ, ਨਿਸ਼ਾਨ ਸਿੰਘ ਪੁੱਤਰ ਕਸ਼ਮੀਰ ਸਿੰਘ, ਚਮਕੌਰ ਸਿੰਘ ਪੁੱਤਰ ਕਸ਼ਮੀਰ ਸਿੰਘ ਵਾਸੀ ਵਾਰਡ ਨੰਬਰ 2 ਪੱਟੀ, ਗੁਰਲਾਲ ਸਿੰਘ ਪੁੱਤਰ ਮਹਿੰਦਰ ਸਿੰਘ ਵਾਸੀ ਆਸਲ ਰੋਡ ਪੱਟੀ ਅਤੇ ਬਲਕਾਰ ਸਿੰਘ ਪੁੱਤਰ ਬਲਦੇਵ ਸਿੰਘ ਵਾਸੀ ਹਰੀਕੇ ਪਾਸੋਂ 2 ਗ੍ਰਾਮ ਅਫੀਮ, 10 ਪੁੜੀਆਂ ਪਾਊਡਰ, 1210 ਨਸ਼ੀਲੀਆਂ ਗੋਲੀਆਂ, 8 ਪੁੜੀਆਂ ਤੰਬਾਕੂ, 7 ਮੋਬਾਈਲ ਫੋਨ ਜਿਨ੍ਹਾਂ ਵਿਚ ਇਕ ਫੋਨ ਨੋਕੀਆ ਕੀਪੈਡ ਵਾਲਾ, 1 ਟੱਚ ਸਕਰੀਨ ਫੋਨ ਰੀਅਲਮੀਂ, 1 ਸੈਮਸੰਗ ਕੰਪਨੀ ਦਾ ਫੋਨ ਕੀਪੈਡ ਵਾਲਾ, 1 ਕੀਪੈਡ ਵਾਲਾ ਫੋਨ ਲਾਵਾ ਕੰਪਨੀ ਦਾ, 2 ਵੀਵੋ ਕੰਪਨੀ ਦੇ ਟੱਚ ਸਕਰੀਨ ਫੋਨ ਅਤੇ 1 ਫੋਨ ਅੋਪੋ ਕੰਪਨੀ ਦਾ ਬਰਾਮਦ ਹੋਇਆ। ਜਦੋਂਕਿ ਦੋ ਚਾਰਜਰ ਵੀ ਮਿਲੇ ਹਨ। ਉਕਤ ਲੋਕਾਂ ਨੇ ਇਹ ਸਮਾਨ ਰੱਖ ਕੇ ਜੇਲ੍ਹ ਅਪਰਾਧ ਕੀਤਾ ਹੈ। ਥਾਣਾ ਸ੍ਰੀ ਗੋਇੰਦਵਾਲ ਸਾਹਿਬ ਦੇ ਜਾਂਚ ਅਧਿਕਾਰੀ ਏਐੱਸਆਈ ਲਖਬੀਰ ਸਿੰਘ ਨੇ ਦੱਸਿਆ ਕਿ ਉਕਤ ਲੋਕਾਂ ਵਿਰੁੱਧ ਕੇਸ ਦਰਜ ਕਰਕੇ ਅਗਲੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।
ਬੀੜੀਆਂ ਦੇ 30 ਬੰਡਲ ਅਤੇ ਦੋ ਸਿਗਰਟ ਦੀਆਂ ਡੱਬੀਆਂ ਮਿਲੀਆਂ
ਕੇਂਦਰੀ ਜੇਲ੍ਹ ’ਚ ਰਾਤ ਕਰੀਬ 11 ਵਜੇ ਪੈਸਕੋ ਕਰਮਚਾਰੀ ਕੇਹਰ ਸਿੰਘ ਅਤੇ ਹੀਰਾ ਸਿੰਘ ਨੇ ਕੋਟ ਗਸ਼ਤ ਦੇ ਦੌਰਾਨ ਟਾਵਰ ਨੰਬਰ 15-16 ਦੇ ਵਿਚਕਾਰ ਅੰਦਰੂਨੀ ਕੋਟ ਦੌਰਾਨ ਲਾਵਰਿਸ ਪਏ 3 ਪੈਕੇਟ ਬਰਾਮਦ ਕੀਤੇ। ਜਿਨ੍ਹਾਂ ਵਿਚੋਂ ਬੀੜੀਆਂ ਦੇ 30 ਬੰਡਲ ਅਤੇ ਦੋ ਡੱਬੀਆਂ ਸਿਗਰਟਾਂ ਦੀਆਂ ਮਿਲੀਆਂ ਹਨ। ਜਿਨ੍ਹਾਂ ਨੂੰ ਕਬਜੇ ਵਿਚ ਲੈ ਕੇ ਥਾਣਾ ਸ੍ਰੀ ਗੋਇੰਦਵਾਲ ਸਾਹਿਬ ਦੀ ਪੁਲਿਸ ਹਵਾਲੇ ਕਰ ਦਿੱਤਾ ਗਿਆ ਹੈ। ਜਾਂਚ ਅਧਿਕਾਰੀ ਏਐੱਸਆਈ ਹਰਭਜਨ ਸਿੰਘ ਨੇ ਦੱਸਿਆ ਕਿ ਸਹਾਇਕ ਸੁਪਰਡੈਂਟ ਕਰਨੈਲ ਸਿੰਘ ਦੀ ਸ਼ਿਕਾਇਤ ’ਤੇ ਅਣਪਛਾਤੇ ਲੋਕਾਂ ਵਿਰੁੱਧ ਕੇਸ ਦਰਜ ਕੀਤਾ ਗਿਆ ਹੈ।
