ਰਾਹੋਂ : ਪੁਲਿਸ ਥਾਣਾ ਰਾਹੋਂ ਦੇ ਅਧੀਨ ਆਉਦੇ ਪਿੰਡ ਮੱਲਪੁਰ ਦੇ ਭੱਲਾ ਪੈਟਰੋਪ ਪੰਪ ’ਤੇ ਸਫਾਰੀ ਗੱਡੀ ਵਿਚ ਸਵਾਰ ਹੋ ਕੇ ਆਏ 6 ਨਕਾਬਪੋਸ਼ਾਂ ਵੱਲੋਂ ਮੱਖਣ ਸਿੰਘ (36) ’ਤੇ ਅੰਧਾਧੁੰਧ ਫਾਇਰਿੰਗ ਕਰਦਿਆਂ ਮੌਤ ਦੇ ਘਾਟ ਉਤਾਰ ਦਿੱਤਾ ਸੀ। ਅੱਜ ਨਮ ਅੱਖਾਂ ਨਾਲ ਮੱਖਣ ਸਿੰਘ ਕੰਗਾ ਦਾ ਅੰਤਿਮ ਸੰਸਕਾਰ ਪਿੰਡ ਕੰਗ ਦੇ ਸ਼ਮਸ਼ਾਨ ਘਾਟ ਵਿਖੇ ਕਰ ਦਿੱਤਾ ਗਿਆ। ਇਸ ਮੌਕੇ ਮੱਖਣ ਸਿੰਘ ਕੰਗ ਦੇ 9 ਸਾਲਾ ਬੇਟੇ ਦਿਲਜ਼ਾਨ ਸਿੰਘ ਅਤੇ ਭਰਾ ਕੁਲਦੀਪ ਸਿੰਘ ਵੱਲੋਂ ਚਿਖਾ ਨੂੰ ਅਗਨੀ ਭੇਂਟ ਕਰਨ ਦੀ ਰਸਮ ਅਦਾ ਕੀਤੀ। ਜ਼ਿਕਰਯੋਗ ਹੈ ਕਿ ਮੱਖਣ ਸਿੰਘ ਦੇ ਭਰਾ ਕੁਲਦੀਪ ਸਿੰਘ ਦੇ ਵਿਦੇਸ਼ ਤੋਂ ਪਰਤਣ ’ਤੇ ਹੀ ਮੱਖਣ ਸਿੰਘ ਦਾ ਅੰਤਿਮ ਸੰਸਕਾਰ ਕੀਤਾ ਜਾਣਾ ਸੀ। ਅਣਪਛਾਤੇ ਹਮਲਾਵਰਾਂ ਵੱਲੋਂ ਮੱਖਣ ਸਿੰਘ ਨੂੰ 26 ਦੇ ਕਰੀਬ ਗੋਲੀਆਂ ਮਾਰੀਆਂ ਦੱਸੀਆਂ ਜਾਂਦੀਆਂ ਹਨ। ਅੱਜ ਅੰਤਿਮ ਯਾਤਰਾ ਵਿਚ ਸ਼ਾਮਲ ਹਰੇਕ ਇਨਸਾਨ ਦੀਆਂ ਅੱਖਾਂ ਵਿਚ ਅੱਥਰੂ ਸਨ। ਸਾਰੇ ਲੋਕ ਪੁਲਿਸ ਤੋਂ ਮੱਖਣ ਸਿੰਘ ਦੇ ਕਾਤਲਾਂ ਨੂੰ ਛੇਤੀ ਤੋਂ ਛੇਤੀ ਗਿ੍ਰਫ਼ਤਾਰ ਕਰਨ ਦੀ ਮੰਗ ਵੀ ਕਰ ਰਹੇ ਸਨ।
ਮੇਰਾ ਵੀਰ ਤਾਂ ਸਾਡੇ ਤੋਂ ਵਿਛੜ ਗਿਆ, ਗੈਂਗ ਕਿਸੇ ਹੋਰ ਦਾ ਘਰ ਨਾ ਉਜਾੜਨ : ਕੁਲਦੀਪ ਸਿੰਘ
ਮੱਖਣ ਸਿੰਘ ਦੇ ਭਰਾ ਕੁਲਦੀਪ ਸਿੰਘ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਉਸ ਦੇ ਭਰਾ ਦੇ ਕਾਤਲਾਂ ਨੂੰ ਜਲਦੀ ਤੋਂ ਜਲਦੀ ਫੜਿਆ ਜਾਵੇ। ਮੇਰਾ ਵੀਰ ਤਾਂ ਸਾਡੇ ਤੋਂ ਵਿਛੜ ਗਿਆ ਪਰ ਇਹ ਖਤਰਨਾਕ ਗੈਂਗ ਕਿਸੇ ਹੋਰ ਦਾ ਘਰ ਨਾ ਉਜਾੜੇ। ਇਸ ਮੌਕੇ ਸਾਬਕਾ ਵਿਧਾਇਕ ਅੰਗਦ ਸਿੰਘ ਅਤੇ ਆਮ ਆਦਮੀ ਪਾਰਟੀ ਦੇ ਸੂਬਾ ਮੀਤ ਪ੍ਰਧਾਨ ਸਤਨਾਮ ਜਲਵਾਹਾ ਵੱਲੋਂ ਪਰਿਵਾਰ ਨੂੰ ਵਿਸ਼ਵਾਸ ਦਿਵਾਇਆ ਕਿ ਮੱਖਣ ਸਿੰਘ ਦੇ ਕਾਤਲ ਜਲਦੀ ਹੀ ਸਲਾਖਾਂ ਪਿੱਛੇ ਹੋਣਗੇ। ਉਨ੍ਹਾਂ ਕਿਹਾ ਕਿ ਪੁਲਿਸ ਪ੍ਰਸ਼ਾਸਨ ਬਹੁਤ ਸੰਜੀਦਗੀ ਨਾਲ ਕਥਿਤ ਹਮਲਾਵਰਾਂ ਦੀ ਭਾਲ ਕਰ ਰਿਹਾ ਹੈ।
ਮੱਖਣ ਸਿੰਘ ਅਤੇ ਪਰਿਵਾਰ ਦੇ ਅਮਰੀਕਾ ਜਾਣ ਵਾਸਤੇ ਕਾਗਜ਼ ਤਿਆਰ ਕੀਤੇ ਸਨ : ਕੁਲਦੀਪ ਸਿੰਘ
ਕੁਲਦੀਪ ਸਿੰਘ ਨੇ ਨਮ ਅੱਖਾਂ ਨਾਲ ਦੱਸਿਆ ਕਿ ਉਸ ਨੇ ਆਪਣੇ ਭਰਾ ਮੱਖਣ ਸਿੰਘ ਅਤੇ ਉਸਦੇ ਪਰਿਵਾਰ ਦੇ ਮੈਂਬਰਾਂ ਨੰੂ ਅਮਰੀਕਾ ਸੱਦਣ ਵਾਸਤੇ ਕਾਗਜ ਤਿਆਰ ਕੀਤੇ ਸਨ। ਥੋੜ੍ਹੇ ਸਮੇਂ ਬਾਅਦ ਹੀ ਮੱਖਣ ਨੇ ਆਪਣੇ ਪਰਿਵਾਰ ਸਮੇਤ ਅਮਰੀਕਾ ਚਲੇ ਜਾਣਾ ਸੀ ਪਰ ਕਾਤਲਾਂ ਨੇ ਉਨ੍ਹਾਂ ਦੇ ਪਰਿਵਾਰ ਨੂੰ ਉਜਾੜ ਕੇ ਰੱਖ ਦਿੱਤਾ। ਉਨ੍ਹਾਂ ਕਿਹਾ ਕਿ ਸਾਰੇ ਕਥਿਤ ਮੁਲਜ਼ਮਾਂ ਨੂੰ ਫੜ ਕੇ ਜੇਲ੍ਹ ਵਿਚ ਬੰਦ ਕੀਤਾ ਜਾਵੇ ਅਤੇ ਬਣਦਾ ਕਤਲ ਦਾ ਮੁਕੱਦਮਾ ਚਲਾਇਆ ਜਾਵੇ।
ਅੰਤਿਮ ਸੰਸਕਾਰ ਸਮੇਂ ਇਹ ਸਨ ਹਾਜ਼ਰ
ਮੱਖਣ ਸਿੰਘ ਦੀ ਅੰਤਮ ਯਾਤਰਾ ਵਿਚ ਵਿਧਾਇਕ ਅੰਗਦ ਸਿੰਘ, ਚਮਨ ਸਿੰਘ ਭਾਨਮਜਾਰਾ, ਸਤਨਾਮ ਸਿੰਘ ਜਲਵਾਹਾ, ਮਨਦੀਪ ਸਿੰਘ ਅਟਵਾਲ, ਯੋਧਵੀਰ ਕੰਗ, ਬਲਵਿੰਦਰ ਸਿੰਘ ਰਾਹੋਂ, ਕੁਲਦੀਪ ਸਿੰਘ, ਜਥੇਦਾਰ ਮਹਿੰਦਰ ਸਿੰਘ, ਮੱਖਣ ਦੀ ਭੈਣ ਸੁਰਿੰਦਰ ਕੌਰ, ਮੱਖਣ ਦੀ ਪਤਨੀ ਅੰਕਿਤਾ ਰਾਣੀ, ਮਾਸਟਰ ਗੁਰਪਾਲ ਸਿੰਘ, ਗੁਰਮੀਤ ਸਿੰਘ ਸਰਪੰਚ, ਮੱਖਣ ਸਿੰਘ ਦੀ ਤਿੰਨ ਸਾਲ ਦੀ ਬੇਟੀ ਦਿਲਰਾਜ ਕੌਰ, ਬੇਟਾ ਦਿਲਜਾਨ ਸਿੰਘ, ਬਲਕਾਰ ਸਿੰਘ, ਜਸਪ੍ਰੀਤ ਸਿੰਘ, ਅਮਨਦੀਪ ਸਿੰਘ, ਗਿਆਨ ਕੌਰ, ਤਜਿੰਦਰ ਸਿੰਘ, ਡਾ. ਗੁਰਨਾਮ ਸਿੰਘ ਸੈਣੀ, ਸਤਨਾਮ ਸਿੰਘ ਭਾਰਟਾ, ਜਥੇਦਾਰ ਮਹਿੰਦਰ ਸਿੰਘ ਹੁਸੈਨਪੁਰ, ਗੁਰਬਖਸ਼ ਸਿੰਘ ਖਾਲਸਾ, ਜਸਵਿੰਦਰ ਸਿੰਘ ਕੰਗ, ਨਗਰ ਕੌਂਸਲ ਰਾਹੋਂ ਦੇ ਪ੍ਰਧਾਨ ਅਮਰਜੀਤ ਬਿੱਟਾ, ਉਂਕਾਰ ਸਿੰਘ ਕੰਗ, ਹਰਜੋਤ ਸਿੰਘ, ਸੁਰਜੀਤ ਸਿੰਘ ਰਾਏ, ਹਰਜੀਤ ਸਿੰਘ ਤੋਂ ਇਲਾਵਾ ਵੱਖ-ਵੱਖ ਧਾਰਮਿਕ, ਸਮਾਜਿਕ ਸਿਆਸੀ ਜਥੇਬੰਦੀਆਂ ਦੇ ਅਹੁਦੇਦਾਰ ਪਰਿਵਾਰਕ ਰਿਸ਼ਤੇਦਾਰ ਸੱਜਣ ਮਿੱਤਰ ਹਾਜ਼ਰ ਸਨ।
