ਚੰਡੀਗਡ਼੍ਹ : ਨਗਰ ਨਿਗਮ ਨੇ ਇਸ ਵਿੱਤੀ ਵਰ੍ਹੇ ਲਈ ਪ੍ਰਾਪਰਟੀ ਟੈਕਸ ਇਕੱਠਾ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਪਹਿਲੀ ਅਪ੍ਰੈਲ ਤੋਂ ਟੈਕਸ ਜਮ੍ਹਾਂ ਹੋ ਰਿਹਾ ਹੈ। ਵੱਧ ਤੋਂ ਵੱਧ ਟੈਕਸ ਕੁਲੈਕਸ਼ਨ ਲਈ ਹੁਣ ਨਗਰ ਨਿਗਮ ਨੇ 31 ਮਈ ਤਕ ਇਸ ਨੂੰ ਜਮ੍ਹਾਂ ਕਰਵਾਉਣ ਵਾਲਿਆਂ ਨੂੰ 20 ਫੀਸਦੀ ਤਕ ਛੋਟ ਦੇਣ ਦਾ ਫੈਸਲਾ ਲਿਆ ਹੈ। ਇਹ ਰਾਹਤ ਸਾਰੇ ਕੈਟਾਗਰੀ ’ਚ ਦਿੱਤੀ ਜਾਵੇਗੀ। ਰਿਹਾਇਸ਼ੀ ਪਲਾਟ ਅਤੇ ਬਿਲਡਿੰਗ ਦਾ ਪ੍ਰਾਪਰਟੀ ਟੈਕਸ 31 ਮਈ ਤਕ ਜਮ੍ਹਾਂ ਕਰਾਉਂਦੇ ਹਨ ਤਾਂ 20 ਫੀਸਦ ਦੀ ਛੋਟ ਮਿਲੇਗੀ। ਉੱਥੇ ਹੀ ਕਮਰਸ਼ੀਅਲ, ਇੰਡਸਟ੍ਰੀਅਲ, ਆਰਗੇਨਾਈਜੇਸ਼ਨਲ, ਦੁਕਾਨ, ਬੂਥ, ਬੇ ਸ਼ਾਪ ਜਾਂ ਭਵਨ ’ਤੇ 10 ਫੀਸਦ ਪ੍ਰਾਪਰਟੀ ਟੈਕਸ ਦੀ ਛੋਟ ਦਿੱਤੀ ਜਾ ਰਹੀ ਹੈ। ਚੈੱਕ ਅਤੇ ਡੀਡੀ ਜ਼ਰੀਏ 26 ਮਈ ਤਕ ਭੁਗਤਾਨ ਕਰਨ ’ਤੇ ਇਸ ਸਕੀਮ ਦਾ ਲਾਭ ਮਿਲੇਗਾ। ਜਦਕਿ ਕੈਸ਼ ਅਤੇ ਆਨਲਾਈਨ 31 ਮਈ ਤਕ ਭੁਗਤਾਨ ਹੋਵੇਗਾ। ਸ਼ਹਿਰਵਾਸੀ ਘਰ ਬੈਠਿਆਂ ਆਨਲਾਈਨ ਵੀ ਟੈਕਸ ਜਮ੍ਹਾਂ ਕਰਵਾ ਸਕਦੇ ਹਨ। ਜੋ ਲੋਕ 31 ਮਈ ਤਕ ਹਾਊਸ ਟੈਕਸ ਜਮ੍ਹਾਂ ਨਹੀਂ ਕਰਵਾਉਣਗੇ ਉਨ੍ਹਾਂ ਤੋਂ ਵਾਧੂ ਹਾਊਸ ਅਤੇ ਪ੍ਰਾਪਰਟੀ ਟੈਕਸ ਵਸੂਲ ਕੀਤਾ ਜਾਵੇਗਾ। ਜਦਕਿ 12 ਪ੍ਰਤੀਸ਼ਤ ਵਿਆਜ ਵੀ ਵੱਖ ਤੋਂ ਚਾਰਜ ਕੀਤਾ ਜਾਵੇਗਾ। ਨਵੇਂ ਵਿੱਤੀ ਵਰ੍ਹੇ ਲਈ ਨਗਰ ਨਿਗਮ ਨੇ ਟੈਕਸ ਤੋਂ ਕਮਾਈ ਕਰਨ ਦਾ ਟੀਚਾ 80 ਕਰੋਡ਼ ਰੁਪਏ ਰੱਖਿਆ ਹੈ। ਜੋ ਪਿਛਲੇ ਸਾਲ ਦੇ ਮੁਕਾਬਲੇ 15 ਕਰੋਡ਼ ਰੁਪਏ ਜ਼ਿਆਦਾ ਹੈ। ਪਿਛਲੇ ਸਾਲ ਨਗਰ ਨਿਗਮ ਨੇ ਪ੍ਰਾਪਰਟੀ ਟੈਕਸ ਤੋਂ 55 ਕਰੋਡ਼ ਰੁਪਏ ਦਾ ਮਾਲੀਆ ਇਕੱਠਾ ਕੀਤਾ ਹੈ।
55 ਗੱਜ ਤੋਂ ਉਪਰ ਦੇ ਮਕਾਨ ’ਤੇ ਲੱਗੇਗਾ ਟੈਕਸ
ਸ਼ਹਿਰ ’ਚ 55 ਗੱਜ ਤੋਂ ਉਪਰ ਦੇ ਮਕਾਨ ’ਚ ਰਹਿਣ ਵਾਲਿਆਂ ’ਤੇ ਹਾਊਸ ਟੈਕਸ ਲੱਗਦਾ ਹੈ। ਇਕ ਲੱਖ ਤੋਂ ਵੱਧ ਅਜਿਹੀਆਂ ਇਮਾਰਤਾਂ ਹਨ ਜੋ ਕਿ ਟੈਕਸ ਅਧੀਨ ਆਉਂਦੀਆਂ ਹਨ। ਆਨਲਾਈਨ ਦੇ ਨਾਲ ਲੋਕ ਈ ਸੰਪਰਕ ਸੈਂਟਰ ਵਿਜ਼ੀਟ ਕਰ ਕੇ ਵੀ ਟੈਕਸ ਜਮ੍ਹਾਂ ਕਰਵਾ ਸਕਦੇ ਹਨ। ਇੱਥੇ ਵੀ ਦੋ ਹਜ਼ਾਰ ਤਕ ਨਕਦ ਅਤੇ ਇਸ ਤੋਂ ਬਾਅਦ ਦੀ ਰਾਸ਼ੀ ਚੈੱਕ ਜਾਂ ਡੈਬਿਟ ਕਾਰਡ ਰਾਹੀਂ ਜਮ੍ਹਾਂ ਕਰਵਾਉਣ ਦੀ ਸੁਵਿਧਾ ਹੈ।
