ਰਾਜਪੁਰਾ : ਸੂਰਜਮੁਖੀ ਦੇ ਘਟੀਆ ਕਿਸਮ ਦੇ ਬੀਜ ਦੀ ਸਪਲਾਈ ਕਰਨ ਦੇ ਮਾਮਲੇ ‘ਚ ਖੇਤੀਬਾੜੀ ਵਿਕਾਸ ਅਫ਼ਸਰ ਪਟਿਆਲਾ ਵੱਲੋਂ ਕੀਤੀ ਗਈ ਪੜਤਾਲੀਆ ਰਿਪੋਰਟ ਤੇ ਪੀੜ੍ਹਤ ਕਿਸਾਨਾਂ ਦੀਆਂ ਸ਼ਿਕਾਇਤਾਂ ਦੇ ਆਧਾਰ `ਤੇ ਕਾਰਵਾਈ ਕਰਦਿਆਂ ਬੀਜ ਸਪਲਾਈ ਕਰਨ ਵਾਲੀ ਕੰਪਨੀ ਸਣੇ ਬੀਜ ਦੀ ਵਿਕਰੀ ਕਰਨ ਵਾਲੇ 3 ਡੀਲਰਾਂ ਖ਼ਿਲਾਫ਼ ਥਾਣਾ ਸਿਟੀ ਪੁਲਿਸ ਨੇ ਵੱਖ-ਵੱਖ ਧਾਰਾਵਾਂ ਹੇਠ ਮਾਮਲਾ ਦਰਜ ਕੀਤਾ ਹੈ।
ਜਾਣਕਾਰੀ ਅਨੁਸਾਰ, ਮੁੱਖ ਖੇਤੀਬਾੜੀ ਅਫਸਰ ਪਟਿਆਲਾ ਕੋਲ ਰਾਜਪੁਰਾ ਤੇ ਘਨੌਰ ਦੇ ਕਿਸਾਨਾਂ ਵੱਲੋਂ ਸਮੂਹਿਕ ਤੌਰ `ਤੇ ਲਿਖਤੀ ਸ਼ਿਕਾਇਤ ਦਿੱਤੀ ਕਿ ਉਨ੍ਹਾਂ ਨੂੰ ਸੂਰਜਮੁਖੀ ਦਾ ਘਟੀਆ ਕਿਸਮ ਦਾ ਬੀਜ ਵੇਚਿਆ ਗਿਆ ਹੈ। ਕਿਸਾਨਾਂ ਮੁਤਾਬਕ, ਰਾਜਪੁਰਾ ਤੋਂ ਜਨਵਰੀ ਤੇ ਫਰਵਰੀ ਮਹੀਨੇ ਦੌਰਾਨ ਕ੍ਰਿਸ਼ਨਾ ਮਾਰਕਿਟ ਸਥਿਤ ਐਸਾ ਰਾਜਪੁਰਾ ਪੈਸਟੀਸਾਈਡ, ਨਵੀਂ ਅਨਾਜ ਮੰਡੀ ਸਥਿਤ ਸ਼ਾਮ ਟਰੇਡਿੰਗ ਕੰਪਨੀ ਅਤੇ ਆਰਕੇ ਟਰੇਡਰਜ਼ ਤੋਂ ਸੂਰਜਮੁਖੀ ਦੇ ਬੀਜ ਦਾ ਬਿੱਲਾਂ ਸਮੇਤ ਖਰੀਦ ਕੀਤਾ ਗਿਆ ਸੀ। ਡੀਲਰਾਂ ਮੁਤਾਬਕ, ਬੀਜ ਸਾਈਨਰਜ਼ੀਨ ਕਰਾਪ ਇਨੋਵੇਸ਼ਨਜ਼ ਹੈਦਰਾਬਾਦ ਕੰਪਨੀ ਤੋਂ ਖਰੀਦ ਕੀਤਾ ਸੀ। ਜਿਸ ‘ਤੇ ਜਦੋਂ ਬੀਜ ਖੇਤਾਂ ਵਿੱਚ ਬੀਜਿਆ ਗਿਆ ਤਾਂ ਖੇਤਾਂ ਵਿੱਚ ਸੂਰਜਮੁਖੀ ਦੀ ਫਸਲ ਦੇ ਇਕ ਬੂਟੇ ਨੂੰ 10 ਤੋਂ 20 ਤਕ ਫੁੱਲ (ਮਲਟੀ ਫਲਾਵਰਿੰਗ) ਲੱਗੇ ਹੋਏ ਹਨ। ਆਮ ਤੌਰ ‘ਤੇ ਮਲਟੀ ਫਲਾਵਰਿੰਗ (ਜ਼ਿਆਦਾ ਫੁੱਲ) ਜੰਗਲੀ ਬੂਟੇ ਜਾਂ ਨਰ (ਮੇਲ ਪਲਾਂਟ) ਪੌਦੇ ਨੂੰ ਹੀ ਲੱਗਦੇ ਹਨ। ਇਨ੍ਹਾਂ ਫੁੱਲਾਂ ਦਾ ਸਾਈਜ਼ ਬਹੁਤ ਹੀ ਛੋਟਾ ਹੈ ਤੇ ਨਿੱਸਰਣ ‘ਤੇ ਇਨ੍ਹਾਂ ਵਿੱਚ ਬੀਜ ਬਣਨ ਦੀ ਆਸ ਬਹੁਤ ਘੱਟ ਹੈ। ਜੇਕਰ ਫੁੱਲ ਬਣੇਗਾ ਤਾਂ ਉਹ ਬਰੀਕ ਤੇ ਮਾੜੀ ਗੁਣਵੱਤਾ ਵਾਲਾ ਬੀਜ ਪੈਦਾ ਹੋਵੇਗਾ। ਉਪਰੋਕਤ ਪੜ੍ਹਤਾਲ ਦੌਰਾਨ ਇਹ ਪਾਇਆ ਗਿਆ ਕਿ ਇਹ ਬੀਜ ਘਟੀਆ ਕਿਸਮ ਦਾ ਹੈ ਅਤੇ ਕੰਪਨੀ ਨੇ ਕਿਸਾਨਾਂ ਨਾਲ ਧੋਖਾਧੜੀ ਕੀਤੀ ਹੈ। ਜਿਸ ਨਾਲ ਕਿਸਾਨਾਂ ਨੂੰ ਬਹੁਤ ਵੱਡਾ ਨੁਕਸਾਨ ਹੋਵੇਗਾ।
ਪੜਤਾਲ ਉਪਰੰਤ ਪਤਾ ਲੱਗਿਆ ਕਿ ਉਪਰੋਕਤ ਕੰਪਨੀ ਮੈਸ: ਸਾਈਨਰਜ਼ੀਨ ਕਰਾਪ ਇਨੋਵੇਸ਼ਨਜ਼ ਹੈਦਰਾਬਾਦ ਦਾ ਪੰਜਾਬ ਦਾ ਲਾਇਸੰਸ ਨੰ: 1266 ਜਾਰੀ ਹੋਣ ਦੀ ਮਿਤੀ 22/12/2016 ਅਤੇ ਖਤਮ ਹੋਣ ਦੀ ਮਿਆਦ ਮਿਤੀ 21/12/2019 ਸੀ। ਇਸ ਤੋ ਬਾਅਦ ਕੰਪਨੀ ਨੇ ਡਾਇਰੈਕਟਰ ਖੇਤੀਬਾੜੀ ਅਤੇ ਕਿਸਾਨ ਭਲਾਈ ਵਿਭਾਗ ਪੰਜਾਬ ਐਸ.ਏ.ਐਸ ਨਗਰ ਪਾਸੋਂ ਆਪਣਾ ਬੀਜਾਂ ਦਾ ਲਾਇਸੰਸ ਪੰਜਾਬ ਵਿੱਚ ਬੀਜ ਵੇਚਣ ਦੀ ਅਗਲੀ ਮਿਆਦ ਲਈ ਰੀਨਿਊ ਕਰਵਾਉਣਾ ਸੀ, ਪ੍ਰੰਤੂ ਕੰਪਨੀ ਵਲੋਂ ਲਾਇਸੰਸ ਰੀਨਿਊ ਨਹੀਂ ਕਰਵਾਇਆ ਗਿਆ। ਅਜਿਹਾ ਕਰਕੇ ਕੰਪਨੀ ਨੇ ਪੰਜਾਬ ਵਿੱਚ ਬਿਨ੍ਹਾਂ ਲਾਇਸੰਸ ਘਟੀਆ ਬੀਜ ਵੇਚ ਕੇ ਸੀਡ ਕੰਟਰੋਲ ਆਰਡਰ 1983 ਦੀ ਧਾਰਾ 3 ਦੀ ਉਲੰਘਣਾ ਕੀਤੀ ਹੈ, ਜੋ ਕਿ ਜ਼ਰੂਰੀ ਵਸਤਾਂ ਐਕਟ 1955 (ਐਕਟ ਨੰ : 10 ਆਫ 1955 ) ਦੀ ਉਲੰਘਣਾ ਹੈ ਅਤੇ ਇਸ ਦੀ ਧਾਰਾ 7 ਦੇ ਤਹਿਤ ਸਜਾਯੋਗ ਅਪਰਾਧ ਹੈ। ਇਸ ਤੋਂ ਇਲਾਵਾ ਇਸ ਕੰਪਨੀ ਨੇ ਸੀਡ ਰੂਲਜ਼ 1968 ਦੀ ਧਾਰਾ 23 ਏ (2) ਅਤੇ ਸਬੰਧਤ ਫਰਮਾਂ ਨੇ ਸੀਡ ਕੰਟਰੋਲ ਆਰਡਰ 1983 ਦੀਆਂ ਧਰਾਵਾਂ 3, 8(ਏ-ਬੀ) ਅਤੇ 18 (2) ਅਤੇ 327) ਰੂਲਜ਼ 1968 ਦੀ ਧਾਰਾ 23 ਏ (2) ਦੀ ਉਲੰਘਣਾ ਕੀਤੀ ਹੈ। ਥਾਣਾ ਸਿਟੀ ਪੁਲਿਸ ਨੇ ਖੇਤੀਬਾੜੀ ਵਿਕਾਸ ਅਫਸਰ ਪਟਿਆਲਾ ਗੁਰਮੇਲ ਸਿੰਘ ਦੀ ਸ਼ਿਕਾਇਤ `ਤੇ ਉਕਤ ਕੰਪਨੀ ਅਤੇ ਬੀਜ ਵੇਚਣ ਵਾਲੇ 3 ਡੀਲਰਾਂ ਖ਼ਿਲਾਫ਼ ਵੱਖ-ਵੱਖ ਧਾਰਾਵਾਂ ਹੇਠ ਮਾਮਲਾ ਦਰਜ ਕਰਕੇ ਅਗਲੇਰੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਸ ਸਬੰਧੀ ਜਦੋਂ ਉਕਤ ਕੇਸ ਸਬੰਧੀ ਥਾਣਾ ਸਿਟੀ ਐੱਸਐੱਚਓ ਇੰਸਪੈਕਟਰ ਹਰਮਨਪ੍ਰੀਤ ਸਿੰਘ ਚੀਮਾ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਨੇ ਕੇਸ ਦੀ ਪੁਸ਼ਟੀ ਕੀਤੀ।
