ਨੂਰਮਹਿਲ : ਬੀਤੀ ਰਾਤ ਫਿਲੌਰ ਰੋਡ ‘ਤੇ ਸਥਿਤ ਟਰਾਲੀ ਵਰਕਸ਼ਾਪ ਬਲਦੇਵ ਸਿੰਘ ਐਂਡ ਸੰਨਜ਼ ‘ਤੇ ਚੋਰਾਂ ਵੱਲੋਂ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ। ਉਥੇ ਨੂਰਮਹਿਲ ਫਿਿਲੰਗ ਸਟੇਸ਼ਨ (ਪੈਟਰੋਲ ਪੰਪ) ‘ਤੇ ਲੱਗੇ ਸੀਸੀਟੀਵੀ ਕੈਮਰੇ ਤੋੜੇ ਪਰ ਜਿੰਦਰੇ ਤੋੜਨ ਵਿਚ ਅਸਫਲ ਰਹੇ। ਇਸ ਘਟਨਾ ਸਬੰਧੀ ਟਰਾਲੀ ਵਰਕਸ਼ਾਪ ਦੇ ਮਾਲਕ ਜਤਿੰਦਰ ਸਿੰਘ ਰੂਪਰਾ ਨੇ ਦੱਸਿਆ ਕਿ ਚੋਰ ਇਕ ਐਕਟਿਵਾ ਤੇ 35000 ਰੁਪਏ ਦੇ ਕਰੀਬ ਦੀ ਨਕਦੀ ਚੋਰੀ ਕਰ ਕੇ ਲੈ ਗਏ। ਪੈਟਰੋਲ ਪੰਪ ਦੇ ਮਾਲਕ ਬਲਵੀਰ ਚੰਦ ਬਾਲੂ ਸਾਬਕਾ ਪ੍ਰਧਾਨ ਨਗਰ ਕੌਂਸਲ ਨੂਰਮਹਿਲ ਅਤੇ ਜਤਿੰਦਰ ਸਿੰਘ ਨੇ ਇਸ ਸਬੰਧੀ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਹੈ।
ਘਟਨਾ ਦਾ ਜਾਇਜ਼ਾ ਲੈਣ ਪਹੁੰਚੇ ਪੁਲਿਸ ਦੇ ਏਐੱਸਆਈ ਅਵਤਾਰ ਲਾਲ ਅਤੇ ਏਐੱਸਆਈ ਅਮਰੀਕ ਲਾਲ ਵੱਲੋਂ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਖੰਗਾਲੀ ਗਈ। ਜਦੋਂ ਪੱਤਰਕਾਰਾਂ ਨੇ ਨਾਈਟ ਡਿਊਟੀ ਅਫਸਰ ਕੁਲਵਿੰਦਰ ਸਿੰਘ ਕੋਲੋਂ ਚੋਰੀ ਦੀ ਘਟਨਾ ਸਬੰਧੀ ਜਾਣਕਾਰੀ ਲੈਣੀ ਚਾਹੀ ਤਾਂ ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਅਜਿਹੀ ਕੋਈ ਵੀ ਜਾਣਕਾਰੀ ਨਹੀਂ ਹੈ।
————–
ਦਿਨ ਰਾਤ ਦੇ ਨਾਕੇ ਅਤੇ ਰਾਤ ਭਰ ਦੀ ਗਸ਼ਤ ਖਬਰਾਂ ਤਕ ਹੀ ਸੀਮਤ
ਜ਼ਿਕਰਯੋਗ ਹੈ ਕਿ ਬੀਤੇ ਇਕ ਦੋ ਸਾਲਾਂ ਦਾ ਰਿਕਾਰਡ ਖੰਗਾਲਿਆ ਜਾਵੇ ਤਾਂ ਚਾਹੇ ਮੋਟਰਸਾਈਕਲ ਚੋਰੀ ਹੋਵੇ ਜਾਂ ਦੁਕਾਨਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੋਵੇ, ਜ਼ਿਆਦਾਤਰ ਕੇਸਾਂ ਨੂੰ ਪੁਲਿਸ ਟਰੇਸ ਕਰਨ ਵਿਚ ਅਸਫਲ ਰਹੀ ਹੈ। ਪੁਲਿਸ ਘਟਨਾ ਸਥਾਨ ‘ਤੇ ਪਹੁੰਚ ਕੇ ਆਪਣੀ ਜ਼ਿੰਮੇਵਾਰੀ ਪੂਰੀ ਕਰ ਲੈਂਦੀ ਹੈ। ਬੀਤੇ ਦਿਨੀਂ ਤਲਵਣ ਚੌਕ ਵਿਖੇ ਲੁੱਟ ਦੀ ਹੋਈ ਨਾਕਾਮ ਕੋਸ਼ਿਸ਼ ਨੂੰ ਵੀ ਪੁਲਿਸ ਹਾਲੇ ਤਕ ਹੱਲ ਕਰਨ ਵਿਚ ਅਸਫਲ ਰਹੀ ਹੈ। ਪੁਲਿਸ ਵਲੋਂ ਦਿੱਤੇ ਬਿਆਨ ਪ੍ਰਮੁੱਖ ਚੌਰਾਹਿਆਂ ‘ਤੇ ਦਿਨ ਰਾਤ ਦੇ ਨਾਕੇ ਅਤੇ ਰਾਤ ਭਰ ਦੀ ਗਸ਼ਤ ਖਬਰਾਂ ਤਕ ਹੀ ਸੀਮਤ ਹਨ। ਜਦੋਂ ਨਾਕੇ ਨਾ ਲੱਗਣ ਸਬੰਧੀ ਪੁੱਛੋ ਤਾਂ ਕਹਿ ਦਿੰਦੇ ਹਨ ਨਫਰੀ ਘੱਟ ਹੈ, ਜਲਦ ਹੀ ਉੱਚ ਅਧਿਕਾਰੀਆਂ ਨੂੰ ਲਿਖ ਕੇ ਮਸਲਾ ਹੱਲ ਕਰਦੇ ਹਾਂ।
ਨੂਰਮਹਿਲ ਵਾਸੀਆਂ ਦੀ ਸਰਕਾਰ ਤੇ ਪੁਲਿਸ ਪ੍ਰਸ਼ਾਸਨ ਕੋਲੋਂ ਮੰਗ
ਨੂਰਮਹਿਲ ਦੇ ਲੋਕਾਂ ਨੇ ਸਰਕਾਰ ਅਤੇ ਪੁਲਿਸ ਦੇ ਉੱਚ ਅਧਿਕਾਰੀਆਂ ਤੋਂ ਮੰਗ ਕੀਤੀ ਹੈ ਕਿ ਅਜਿਹੀਆਂ ਘਟਨਾਵਾਂ ਨੂੰ ਪੂਰੀ ਤਰ੍ਹਾਂ ਨਾਲ ਠੱਲ੍ਹ ਪਾਉਣ ਲਈ ਜ਼ਿੰਮੇਵਾਰ ਅਫਸਰਾਂ ਦੀਆਂ ਡਿਊਟੀਆਂ ਲਾਈਆਂ ਜਾਣ ਤਾਂ ਜੋ ਲੋਕ ਸੁੱਖ ਦਾ ਸਾਹ ਲੈ ਸਕਣ।
