ਪੰਜਾਬ ਸਰਕਾਰ ਸਖ਼ਤ ! ਵਰ੍ਹਦੇ ਮੀਂਹ ‘ਚ ਸੜਕ ਬਣਾਉਣ ਵਾਲੇ ਚਾਰ ਅਫ਼ਸਰ ਕੀਤੇ ਮੁਅੱਤਲ, ਵੀਡੀਓ ਵਾਇਰਲ ‘ਤੇ ਕੱਸਿਆ ਸ਼ਿਕੰਜਾ

ਹੁਸ਼ਿਆਰਪੁਰ : ਪੰਜਾਬ ਸਰਕਾਰ ਨੇ ਪੀਡਬਲਯੂਡੀ ਦੇ ਚਾਰ ਅਧਿਕਾਰੀਆਂ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਇਨ੍ਹਾਂ ਵਿਚ ਤਰਸੇਮ ਸਿੰਘ ਸਬ ਡਵੀਜ਼ਨਲ ਇੰਜੀਨੀਅਰ, ਵਿਪਨ ਕੁਮਾਰ ਜੂਨੀਅਰ ਇੰਜੀਨੀਅਰ, ਜਸਬੀਰ ਸਿੰਘ ਜੂਨੀਅਰ ਇੰਜੀਨੀਅਰ ਤੇ ਪ੍ਰਵੀਨ ਕੁਮਾਰ ਜੂਨੀਅਰ ਇੰਜੀਅਰ ਸ਼ਾਮਲ ਹਨ। ਇਨ੍ਹਾਂ ‘ਤੇ ਹੁਸ਼ਿਆਰਪੁਰ ਦੇ ਪਿੰਡ ਢੱਕੋਂ ‘ਚ ਵਰ੍ਹਦੇ ਮੀਂਹ ‘ਚ ਸੜਕ ਬਣਾਉਣ ਦੇ ਦੋਸ਼ ਲੱਗੇ ਹਨ। ਦਰਅਸਲ ਜਿਸ ਵੇਲੇ ਸੜਕ ਬਣਾਈ ਜਾ ਰਹੀ ਸੀ ਤਾਂ ਕਿਸੇ ਨੇ ਇਸ ਦੀ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਕਰ ਦਿੱਤੀ। ਇਹ ਵਾਇਰਲ ਵੀਡੀਓ ਉੱਚ ਅਧਿਕਾਰੀਆਂ ਤਕ ਪੁੱਜਣ ਮਗਰੋਂ ਸੰਬੰਧਤ ਅਫ਼ਸਰਾਂ ਦੀ ਮੁਅੱਤਲੀ ਦੇ ਹੁਕਮ ਜਾਰੀ ਕਰ ਦਿੱਤੇ ਗਏ।

ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਕਾਰਨ ਦਿਹਾਤੀ ਵਿਕਾਸ ਤੇ ਪੰਚਾਇਤ ਵਿਭਾਗ ਦੇ ਤਿੰਨ ਅਫ਼ਸਰਾਂ ਨੂੰ ਸੂਬਾ ਸਰਕਾਰ ਨੇ ਮੁਅੱਤਲ ਕਰ ਦਿੱਤਾ ਹੈ। ਇਸ ਤਿੱਕਡ਼ੀ ’ਤੇ 11 ਕਰੋਡ਼ ਰੁਪਏ ਦੇ ਘਪਲੇ ਦਾ ਦੋਸ਼ ਹੈ। ਮੁਅੱਤਲ ਕੀਤੇ ਅਫ਼ਸਰਾਂ ਵਿਚ ਬੀਡੀਪੀਓ ਜਤਿੰਦਰ ਸਿੰਘ ਢਿੱਲੋਂ, ਸੀਨੀਅਰ ਅਸਿਸਟੈਂਟ ਅਕਾਊਂਟ ਗੁਰਦੀਪ ਸਿੰਘ ਤੇ ਸੀਨੀਅਰ ਅਸਿਸਟੈਂਟ ਚੰਦ ਸਿੰਘ ਸ਼ਾਮਲ ਹਨ। 

ਦੋਸ਼ ਹਨ ਕਿ ਤਿੰਨਾਂ ਨੇ ਮਿਲੀਭੁਗਤ ਨਾਲ ਪਲਾਨਿੰਗ ਵਿਭਾਗ ਤੇ ਸੀਐੱਮ ਫੰਡ ਲਈ ਆਈ ਰਕਮ ਦੀ ਗ਼ਲਤ ਵਰਤੋਂ ਕੀਤੀ ਹੈ। ਇਸ ਦੌਰਾਨ ਚੋਣ ਜ਼ਾਬਤੇ ਦੀ ਉਲੰਘਣਾ ਵੀ ਕੀਤੀ ਗਈ। ਰੋਪਡ਼ ਦੇ ਡੀਡੀਪੀਓ ਅਮਰਿੰਦਰ ਸਿੰਘ ਚੌਹਾਨ ਕਿਸੇ ਦੂਜੇ ਮਾਮਲੇ ਦੀ ਜਾਂਚ ਕਰ ਰਹੇ ਸਨ। ਅਨੰਦਪੁਰ ਸਾਹਿਬ ਦੇ ਬੀਡੀਪੀਓ ਦਫ਼ਤਰ ਵਿਚ ਹੋਈ ਖ਼ਰੀਦ ਵਿਚ ਕੁਝ ਗਡ਼ਬਡ਼ ਹੋਈ ਨਜ਼ਰੀਂ ਪਈ ਸੀ। ਇਸ ਮਗਰੋਂ ਉਨ੍ਹਾਂ ਨੇ ਤਫ਼ਤੀਸ਼ ਸ਼ੁਰੂ ਕੀਤੀ ਤਾਂ ਘਪਲਾ ਫਡ਼ਿਆ ਗਿਆ। ਪਲਾਨਿੰਗ ਵਿਭਾਗ ਨੇ ਬੀਡੀਪੀਓ ਦਫ਼ਤਰ ਨੂੰ 7.38 ਕਰੋਡ਼ ਰੁਪਏ ਦੀ ਗ੍ਰਾਂਟ ਘੱਲੀ ਸੀ। ਇਹ ਗ੍ਰਾਂਟ ਇਸੇ ਵਰ੍ਹੇ 10 ਜਨਵਰੀ ਨੂੰ ਮਿਲੀ।

ਬੀਡੀਪੀਓ ਨੇ ਉਸੇ ਦਿਨ 6.5 ਕਰੋਡ਼ ਦੀ ਰਕਮ ਖ਼ਰਚ ਕਰ ਦਿੱਤੀ। ਇਸ ਖ਼ਰਚੇ ਦਾ ਨਾ ਕੋਈ ਰਿਕਾਰਡ ਹੈ ਤੇ ਨਾ ਕੋਈ ਕੋਟੇਸ਼ਨ ਹੈ। ਇਸ ਰਕਮ ਨੂੰ ਖ਼ਰਚ ਨਹੀਂ ਕੀਤਾ ਜਾ ਸਕਦਾ ਸੀ ਤੇ ਚੋਣ ਜ਼ਾਬਤਾ ਲੱਗ ਚੁੱਕਾ ਸੀ। ਲੰਘੇ ਵਰ੍ਹੇ 24 ਦਸੰਬਰ ਨੂੰ ਬੀਡੀਪੀਓ ਦਫ਼ਤਰ ਰੋਪਡ਼ ਨੂੰ ਮੁੱਖ ਮੰਤਰੀ ਕੋਟੇ ਵਿੱਚੋਂ 3.95 ਕਰੋਡ਼ ਦਾ ਫੰਡ ਰਿਲੀਜ਼ ਹੋਇਆ। 27 ਦਸੰਬਰ ਨੂੰ ਹੀ 3.18 ਲੱਖ ਦੀ ਅਦਾਇਗੀ ਜਾਰੀ ਕੀਤੀ ਗਈ, ਇਸ ਦਾ ਰਿਕਾਰਡ ਦਫ਼ਤਰ ਵਿਚ ਨਹੀਂ ਹੈ। ਇਸ ਤੋਂ ਇਲਾਵਾ 1.59 ਕਰੋਡ਼ ਰੁਪਏ ਕ੍ਰਿਕਟ ਦਾ ਸਮਾਨ ਬਣਾਉਣ ਵਾਲੀ ਕੰਪਨੀ 3.18 ਕਰੋਡ਼ ਰੁਪਏ ਐਕਸਪੋਰਟ ਕੰਪਨੀ ਤੇ 35 ਲੱਖ ਰੁਪਏ ਉਸਾਰੀ ਕੰਪਨੀ ਨੂੰ ਅਦਾ ਕੀਤੇ ਗਏ।