ਜਗਰਾਉਂ : ਪੰਜਾਬ ‘ਚ ਕਤਲ ਦੇ ਮਾਮਲੇ ਲਗਾਤਾਰ ਵਧ ਰਹੇ ਹਨ। ਦਰਅਸਲ ਜਗਰਾਉਂ ‘ਚ ਪਤਨੀ ਦੇ ਨਾਜਾਇਜ਼ ਸਬੰਧਾਂ ਤੋਂ ਨਾਰਾਜ਼ ਪਤੀ ਨੇ ਆਪਣੇ ਹੀ ਭਤੀਜੇ ਦੀ ਹੱਤਿਆ ਕਰ ਦਿੱਤੀ। ਫਿਲਹਾਲ ਪੁਲਿਸ ਨੇ ਦੋਸ਼ੀ ਨੂੰ ਗ੍ਰਿਫਤਾਰ ਕਰ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਪਤੀ ਨੂੰ ਛੱਡ ਕੇ ਭਤੀਜੇ ਨਾਲ ਰਹਿਣ ਲੱਗੀ ਸੀ ਪਤਨੀ
ਥਾਣਾ ਸਦਰ ਤੋਂ ਸਬ-ਇੰਸਪੈਕਟਰ ਕਰਮਜੀਤ ਸਿੰਘ ਨੇ ਦੱਸਿਆ ਕਿ ਪਿੰਡ ਤੁਗਲ ਵਿਖੇ ਪਤਨੀ ਨਾਲ ਰਹਿੰਦੇ ਬਿਹਾਰੀ ਮਜ਼ਦੂਰ ਨੇ ਆਪਣੇ ਭਤੀਜੇ ਨੂੰ ਇੱਥੇ ਬੁਲਾ ਲਿਆ। ਉਨ੍ਹਾਂ ਦੇ ਨਾਲ ਰਹਿੰਦੇ ਭਤੀਜੇ ਨਾਲ ਚਾਚੀ ਨੂੰ ਪਿਆਰ ਹੋ ਗਿਆ। ਉਹ ਪਤੀ ਨੂੰ ਛੱਡ ਕੇ ਭਤੀਜੇ ਨਾਲ ਪਤਨੀ ਬਣ ਕੇ ਰਹਿਣ ਲੱਗੀ। ਇਸੇ ਦੁਸ਼ਮਣੀ ‘ਚ ਚਾਚੇ ਨੇ ਭਤੀਜੇ ਦੀ ਹੱਤਿਆ ਕਰ ਦਿੱਤੀ।
ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ‘ਚ ਸਵੀਆ ਦੇਵੀ ਨੇ ਦੱਸਿਆ ਕਿ ਉਸ ਦਾ ਵਿਆਹ 25 ਸਾਲ ਪਹਿਲਾਂ ਵੀਰੇਨ ਸਾਦਾ ਨਾਲ ਹੋਇਆ ਸੀ। ਵਿਆਹ ਤੋਂ ਬਾਅਦ ਦੋਵਾਂ ਵਿਚਾਲੇ ਅਣਬਣ ਸ਼ੁਰੂ ਹੋ ਗਈ ਸੀ ਤੇ ਉਹ ਦੁਬਾਰਾ ਆਪਣੀ ਮਰਜ਼ੀ ਨਾਲ ਉਪੇਂਦਰ ਸਾਦਾ ਨਾਲ ਰਹਿਣ ਲੱਗੀ। 1 ਅਗਸਤ ਨੂੰ ਪਹਿਲਾ ਪਤੀ ਵੀਰੇਨ ਸਾਦਾ ਆਇਆ ਅਤੇ ਉਪੇਂਦਰ ਨੂੰ ਨਾਲ ਲੈ ਗਿਆ। ਉਸ ਨੂੰ ਸਵੇਰੇ 7 ਵਜੇ ਪਤਾ ਲੱਗਾ ਕਿ ਉਪੇਂਦਰ ਨੂੰ ਉਸ ਦੇ ਪਹਿਲੇ ਪਤੀ ਵੀਰੇਨ ਨੇ ਬੇਰਹਿਮੀ ਨਾਲ ਕੁੱਟਿਆ ਹੈ। ਉਪੇਂਦਰ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ।
ਉਥੋਂ ਉਸ ਨੂੰ ਲੁਧਿਆਣਾ ਭੇਜ ਦਿੱਤਾ ਗਿਆ। 2 ਅਗਸਤ ਨੂੰ ਉਸ ਨੂੰ ਰਜਿੰਦਰਾ ਹਸਪਤਾਲ ਪਟਿਆਲਾ ਰੈਫਰ ਕਰ ਦਿੱਤਾ ਗਿਆ। ਉਥੋਂ ਉਸ ਦੀ ਹਾਲਤ ਵਿਗੜਨ ’ਤੇ ਸਿਵਲ ਹਸਪਤਾਲ ਸੈਕਟਰ-32 ਚੰਡੀਗੜ੍ਹ ਭੇਜ ਦਿੱਤਾ ਗਿਆ। ਇੱਥੇ ਇਲਾਜ ਦੌਰਾਨ 5 ਅਗਸਤ ਨੂੰ ਉਸ ਦੀ ਮੌਤ ਹੋ ਗਈ। ਉਸ ਨੇ ਦੱਸਿਆ ਕਿ ਪਹਿਲਾ ਪਤੀ ਵੀਰੇਨ ਉਪੇਂਦਰ ਨਾਲ ਰੰਜਿਸ਼ ਰੱਖਦਾ ਸੀ, ਜਿਸ ਕਾਰਨ ਉਸ ਨੇ ਉਸ ਦੀ ਹੱਤਿਆ ਕੀਤੀ ਹੈ। ਸਵੀਆ ਦੇਵੀ ਦੇ ਬਿਆਨਾਂ ‘ਤੇ ਉਸ ਦੇ ਪਹਿਲੇ ਪਤੀ ਵੀਰੇਨ ਸਾਦਾ ਖਿਲਾਫ ਥਾਣਾ ਸਦਰ ‘ਚ ਹੱਤਿਆ ਦੇ ਦੋਸ਼ ‘ਚ ਮਾਮਲਾ ਦਰਜ ਕਰ ਕੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
