ਅੰਮ੍ਰਿਤਸਰ: ਰਾਜ ਦੇ ਕਰ ਅਤੇ ਆਬਕਾਰੀ ਵਿਭਾਗ ਨੇ ਬਿਨਾਂ ਬਿੱਲਾਂ ਦੇ ਸੋਨੇ-ਚਾਂਦੀ ਦੀ ਵੱਡੀ ਖੇਪ ਫੜੀ ਹੈ। ਵਿਭਾਗ ਦੀ ਟੀਮ ਨੇ ਇਹ ਕਾਰਵਾਈ ਹਿਮਾਚਲ ਪ੍ਰਦੇਸ਼ ਸਥਿਤ ਸੁੰਦਰਨਗਰ ਅਤੇ ਮੰਡੀ ਵਿੱਚ ਕੀਤੀ। ਸੁੰਦਰਨਗਰ ‘ਚ 50 ਲੱਖ ਰੁਪਏ ਦਾ ਸੋਨਾ ਅਤੇ 10 ਲੱਖ ਰੁਪਏ ਦੇ ਚਾਂਦੀ ਦੇ ਗਹਿਣੇ ਬਾਜ਼ਾਰ ‘ਚ ਫੜੇ ਗਏ ਹਨ। ਵਿਭਾਗ ਨੇ ਅੰਮ੍ਰਿਤਸਰ ਦੇ ਵਪਾਰੀ ਨੂੰ ਤਿੰਨ ਲੱਖ 60 ਹਜ਼ਾਰ ਰੁਪਏ ਦਾ ਜੁਰਮਾਨਾ ਲਗਾਇਆ ਹੈ।
ਸੁੰਦਰਨਗਰ ‘ਚ ਵਿਭਾਗ ਦੇ ਸਹਾਇਕ ਕਮਿਸ਼ਨਰਾਂ ਪ੍ਰਵੀਨ ਠਾਕੁਰ ਅਤੇ ਸੁਰਿੰਦਰ ਕੁਮਾਰ ਦੀ ਅਗਵਾਈ ‘ਚ ਸਹਾਇਕ ਰਾਜ ਕਰ ਤੇ ਆਬਕਾਰੀ ਅਧਿਕਾਰੀ ਹੰਸਰਾਜ ਤੇ ਸਵਰਾਜ ਠਾਕੁਰ ਦੀ ਟੀਮ ਨੇ ਸੂਚਨਾ ਦੇ ਆਧਾਰ ‘ਤੇ ਅੰਮਿ੍ਤਸਰ ਦੇ ਇਕ ਵਪਾਰੀ ਨੂੰ ਕਾਬੂ ਕੀਤਾ, ਜੋ ਕਿ ਬੱਸ ਸਟੈਂਡ ਨੇੜੇ ਸੋਨੇ ਦੇ ਗਹਿਣੇ ਵੇਚਣ ਲਈ ਗੱਡੀ ‘ਚ ਬੈਠਾ ਸੀ। ਟੀਮ ਨੇ ਗੱਡੀ ‘ਚੋਂ 50 ਲੱਖ ਰੁਪਏ ਦੇ ਸੋਨੇ ਦੇ ਗਹਿਣੇ ਬਰਾਮਦ ਕੀਤੇ। ਵਪਾਰੀ ਗਹਿਣਿਆਂ ਦਾ ਬਿੱਲ ਨਹੀਂ ਦਿਖਾ ਸਕਿਆ।
ਵਿਭਾਗ ਨੇ ਉਸ ਤੋਂ ਮੌਕੇ ‘ਤੇ ਹੀ 3 ਲੱਖ ਰੁਪਏ ਦਾ ਜੁਰਮਾਨਾ ਵਸੂਲਿਆ। ਸਹਾਇਕ ਕਮਿਸ਼ਨਰ ਪ੍ਰਵੀਨ ਠਾਕੁਰ ਨੇ ਦੱਸਿਆ ਕਿ ਵਿਭਾਗ ਨੇ ਵਪਾਰੀ ਤੋਂ ਇਹ ਵੀ ਜਾਣਕਾਰੀ ਲਈ ਹੈ ਕਿ ਉਹ ਇੰਨਾ ਸੋਨਾ ਕਿੱਥੋਂ ਲੈ ਕੇ ਆਇਆ ਸੀ ਅਤੇ ਕਿੱਥੇ ਵੇਚਣਾ ਸੀ। ਡੀਲਰ ਦਾ ਨਾਮ ਅਤੇ ਪਤਾ ਗੁਪਤ ਰੱਖਿਆ ਗਿਆ ਹੈ। ਮੰਡੀ ਸ਼ਹਿਰ ਵਿੱਚ ਐਸਟੀਓ ਕੁਲਦੀਪ ਅਤੇ ਸਹਾਇਕ ਪ੍ਰਕਾਸ਼ ਚੰਦ ਨੇ ਦਿੱਲੀ ਦੇ ਇੱਕ ਵਪਾਰੀ ਦੇ ਬੈਗ ਦੀ ਤਲਾਸ਼ੀ ਲਈ ਤਾਂ ਉਸ ਵਿੱਚੋਂ 10 ਲੱਖ ਰੁਪਏ ਦੇ ਚਾਂਦੀ ਦੇ ਗਹਿਣੇ ਬਿਨਾਂ ਬਿੱਲ ਦੇ ਬਰਾਮਦ ਹੋਏ। ਵਿਭਾਗ ਨੇ ਵਪਾਰੀ ਨੂੰ 63 ਹਜ਼ਾਰ ਰੁਪਏ ਜੁਰਮਾਨਾ ਕੀਤਾ ਹੈ
