ਆਪ’ ਦੇ ਸਾਬਕਾ ਵਿਧਾਇਕ ਸੰਦੋਆ ਨੇ ਘੁਟਾਲੇ ਦੀ ਰਕਮ ਨਾਲ ਖਰੀਦੀ ਕਾਰ, ਵਿਜੀਲੈਂਸ ਜਾਂਚ ਤੋਂ ਬਾਅਦ ਰਜਿਸਟ੍ਰੇਸ਼ਨ ਖਾਰਜ

ਰੂਪਨਗਰ : ਆਮ ਆਦਮੀ ਪਾਰਟੀ ਦੇ ਰੂਪਨਗਰ ਤੋਂ ਸਾਬਕਾ ਵਿਧਾਇਕ ਅਮਰਜੀਤ ਸਿੰਘ ਸੰਦੋਆ ਬਹੁ-ਕਰੋੜੀ ਜ਼ਮੀਨ ਖਰੀਦ ਘੁਟਾਲੇ ਦੀ ਰਕਮ ਨਾਲ ਖਰੀਦੀ ਗਈ ਕਾਰ ਦੀ ਵਰਤੋਂ ਕਰਨ ਦੇ ਮਾਮਲੇ ‘ਚ ਵਿਜੀਲੈਂਸ ਦੇ ਰਾਡਾਰ ‘ਤੇ ਹਨ। ਇਸ ਦੇ ਨਾਲ ਹੀ ਐਸਡੀਐਮ ਰੂਪਨਗਰ ਹਰਭਜਨ ਸਿੰਘ ਨੇ ਸੰਦੋਆ ਵੱਲੋਂ ਵਰਤੀ ਜਾ ਰਹੀ ਇਨੋਵਾ ਕ੍ਰਿਸਟਾ (ਪੀਬੀ12 ਏਜੀ0009) ਕਾਰ ਨੂੰ ਬਲੈਕਲਿਸਟ ਕਰ ਦਿੱਤਾ ਹੈ।

ਮਾਮਲਾ ਇਹ ਹੈ ਕਿ ਸਾਬਕਾ ਵਿਧਾਇਕ ਅਮਰਜੀਤ ਸਿੰਘ ਸੰਦੋਆ ਜੋ ਇਨੋਵਾ ਕ੍ਰਿਸਟਾ ਕਾਰ 2020 ਤੋਂ ਵਰਤ ਰਹੇ ਹਨ, ਉਨ੍ਹਾਂ ਦੇ ਸਹੁਰੇ ਮੋਹਨ ਸਿੰਘ ਦੇ ਨਾਂ ‘ਤੇ ਹੈ। ਦੋਸ਼ ਹੈ ਕਿ ਇਹ ਕਾਰ ਖਰੀਦਣ ਲਈ ਜੋ 19 ਲੱਖ ਰੁਪਏ ਦੀ ਰਕਮ ਖਰਜ ਕੀਤੀ ਗਈ ਉਹ ਪਿੰਡ ਕਰੂਰਾ ‘ਚ ਹੋਏ ਕਰੀਬ ਪੰਜ ਕਰੋੜ ਦੇ ਜ਼ਮੀਨ ਖਰੀਦ ਘੁਟਾਲੇ ‘ਚ ਇਕ ਸ਼ੱਕੀ ਮੁਲਜ਼ਮ ਦੇ ਖਾਤੇ ‘ਚੋਂ ਕਾਰ ਡੀਲਰ ਦੇ ਖਾਤੇ ‘ਚ ਜਮ੍ਹਾੰ ਹੋਈ। ਜਿਸ ਵੇਲੇ ਇਹ ਕਾਰ ਖਰੀਦੀ ਗਈ, ਉਦੋਂ ਸੰਦੋਆ ਰੂਪਨਗਰ ਦੇ ਵਿਧਾਇਕ ਸਨ।

ਦੂਜੇ ਪਾਸੇ ਵਿਧਾਇਕ ਸੰਦੋਆ ਨੇ ਮੀਡੀਆ ‘ਚ ਬਿਆਨ ਦਿੱਤੇ ਹਨ ਕਿ ਉਨ੍ਹਾਂ ਦੇ ਸਿਆਸੀ ਵਿਰੋਧੀ ਉਨ੍ਹਾਂ ਨੂੰ ਬਦਨਾਮ ਕਰਨ ਦੀ ਸਾਜ਼ਿਸ਼ ਰਚ ਰਹੇ ਹਨ। ਭਰੋਸੇਯੋਗ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਵਿਜੀਲੈਂਸ ਨੇ ਜਲੰਧਰ ਨਿਵਾਸੀ ਬਰਿੰਦਰ ਕੁਮਾਰ ਨੂੰ ਕਾਰ ਦੀ ਅਦਾਇਗੀ ਕਰਵਾਉਣ ‘ਚ ਸ਼ਾਮਲ ਪਾਇਆ ਹੈ। ਇਹ ਵਿਅਕਤੀ ਜ਼ਮੀਨ ਖਰੀਦ ਘੁਟਾਲੇ ਵਿੱਚ ਸ਼ਾਮਲ ਦੱਸਿਆ ਜਾਂਦਾ ਹੈ।

ਦੱਸ ਦੇਈਏ ਕਿ ਬੀਤੇ ਦਿਨੀਂ ਵਿਜੀਲੈਂਸ ਨੇ ਪੰਜਾਬ ਕਾਂਗਰਸ ਦੇ ਕਾਰਜਕਾਰੀ ਪ੍ਰਧਾਨ ਤੇ ਸਾਬਕਾ ਖੁਰਾਕ ਤੇ ਸਪਲਾਈ ਮੰਤਰੀ ਭਾਰਤ ਭੂਸ਼ਣ ਆਸ਼ੂ ਨੂੰ ਅਨਾਜ ਲਿਫਟਿੰਗ ਮਾਮਲੇ ‘ਚ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਦੇ ਨਾਲ ਹੀ ਹੁਣ ਬਰਖਾਸਤ ਡੀਐਸਪੀ ਬਲਵਿੰਦਰ ਸਿੰਘ ਸੇਖੋਂ ਨੇ ਵੀ ਆਸ਼ੂ ਖ਼ਿਲਾਫ਼ ਮੋਰਚਾ ਖੋਲ੍ਹ ਦਿੱਤਾ ਹੈ। ਸੇਖੋਂ ਦੀ ਐਂਟਰੀ ਆਸ਼ੂ ਦੀਆਂ ਮੁਸ਼ਕਿਲਾਂ ਵਧਾ ਸਕਦੀ ਹੈ। ਆਸ਼ੂ ਅਤੇ ਸੇਖੋਂ ਵਿਚਕਾਰ ਚਾਰ ਸਾਲ ਪਹਿਲਾਂ ਝਗੜਾ ਹੋਇਆ ਸੀ। ਉਸ ਵੇਲੇ ਆਸ਼ੂ ਖੁਰਾਕ ਸਪਲਾਈ ਮੰਤਰੀ ਸਨ ਤੇ ਸੇਖੋਂ ਨਗਰ ਨਿਗਮ ‘ਚ ਡੀਐਸਪੀ ਤਾਇਨਾਤ ਸਨ। ਫੋਨ ‘ਤੇ ਦੋਵਾਂ ‘ਚ ਬਹਿਸ ਹੋਈ, ਜਿਸ ਦਾ ਆਡੀਓ ਵਾਇਰਲ ਹੋ ਗਿਆ। ਹੁਣ ਜਦੋਂ ਆਸ਼ੂ ਵਿਜੀਲੈਂਸ ਦੀ ਹਿਰਾਸਤ ‘ਚ ਹਨ ਤਾਂ ਪੁਲਿਸ ਦੀਆਂ ਸੇਵਾਵਾਂ ਤੋਂ ਬਰਖ਼ਾਸਤ ਕੀਤੇ ਗਏ ਸੇਖੋਂ ਨੇ ਸ਼ੁੱਕਰਵਾਰ ਨੂੰ ਐਸਐਸਪੀ ਵਿਜੀਲੈਂਸ ਨੂੰ ਮਿਲ ਕੇ 1992 ਵਿੱਚ ਅੱਤਵਾਦ ਦੇ 28 ਸਾਲਾਂ ਦੌਰਾਨ ਹੋਏ ਕਤਲਾਂ ਦੇ ਮਾਮਲੇ ‘ਚ ਆਸ਼ੂ ਖ਼ਿਲਾਫ਼ ਦੁਬਾਰਾ ਸ਼ਿਕਾਇਤ ਦਰਜ ਕਰਵਾਈ। ਵਿਜੀਲੈਂਸ ਨੂੰ ਕੇਸ ਸਬੰਧੀ ਕੁਝ ਦਸਤਾਵੇਜ਼ ਵੀ ਸੌਂਪੇ ਹਨ।