ਅੰਮ੍ਰਿਤਸਰ : ਭਾਰਤ ਸਰਕਾਰ ਦਾ ਕੋਈ ਵੀ ਅਫ਼ਸਰ ਅੱਗੇ ਤੋਂ ਨਿੱਜੀ ਜਾਂ ਕਿਰਾਏ ’ਤੇ ਲਏ ਵਾਹਨ ’ਤੇ ‘ਭਾਰਤ ਸਰਕਾਰ’ ਨਹੀਂ ਲਿਖਾ ਸਕੇਗਾ। ਇਸ ਸਬੰਧ ਵਿਚ ਕੇਂਦਰ ਸਰਕਾਰ ਨੇ ਹੁਕਮ ਜਾਰੀ ਕਰ ਦਿੱਤਾ ਹੈ। ਇਸ ਦੀ ਉਲੰਘਣਾ ਕਰਨ ਵਾਲੇ ਅਫ਼ਸਰਾਂ ’ਤੇ ਬਣਦੀ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
ਦੱਸਣਯੋਗ ਹੈ ਕਿ ਕੇਂਦਰ ਸਰਕਾਰ ਦੇ ਅਧੀਨ ਆਉਂਦੇ ਵਿਭਾਗਾਂ ਵਿਚ ਲੱਗੇ ਅਫ਼ਸਰਾਂ ਵਿਚ ਇਹ ਰੁਝਾਨ ਦੇਖਿਆ ਜਾ ਰਿਹਾ ਹੈ ਕਿ ਉਹ ਨਿੱਜੀ ਵਾਹਨਾਂ ਜਾਂ ਕਿਰਾਏ ’ਤੇ ਲਏ ਵਾਹਨਾਂ ’ਤੇ ‘ਭਾਰਤ ਸਰਕਾਰ’ ਲਿਖਾ ਲੈਂਦੇ ਹਨ। ਇਹ ਸਰਕਾਰੀ ਮੁਲਾਜ਼ਮ ਨਿੱਜੀ ਵਾਹਨਾਂ ’ਤੇ ‘ਭਾਰਤ ਸਰਕਾਰ’ ਲਿਖਾ ਕੇ ਇਸ ਦੀ ਗ਼ਲਤ ਵਰਤੋਂ ਵੀ ਕਰ ਲੈਂਦੇ ਹਨ।
ਇਸ ਸਬੰਧ ਵਿਚ ਆਰਟੀਆਈ ਕਾਰਕੁਨ ਪੀਸੀ ਸ਼ਰਮਾ ਨੇ ਕੇਂਦਰ ਸਰਕਾਰ ਦੇ ਵੱਖ-ਵੱਖ ਮੰਤਰਾਲਿਆਂ ਨੂੰ ਰਜਿਸਟ੍ਰਡ ਪੱਤਰ ਭੇਜ ਕੇ ਮੰਗ ਕੀਤੀ ਸੀ ਕਿ ਕੇਂਦਰ ਸਰਕਾਰ ਦੇ ਆਲ੍ਹਾ ਅਫ਼ਸਰਾਂ ਨੂੰ ਇਹ ਹੁਕਮ ਕੀਤੇ ਜਾਣ ਕਿ ਆਪਣੇ ਸਰਕਾਰੀ ਰੁਤਬੇ ਦੀ ਦੁਰਵਰਤੋਂ ਨਾ ਕਰਨ ਤੇ ਨਿੱਜੀ ਵਾਹਨਾਂ ’ਤੇ ‘ਭਾਰਤ ਸਰਕਾਰ’ ਨਾ ਲਿਖਾਉਣ। ਇਸ ਸਬੰਧ ਵਿਚ ਕੇਂਦਰ ਸਰਕਾਰ ਦੇ ਸਿਹਤ ਤੇ ਪਰਿਵਾਰ ਕਲਿਆਣ ਮੰਤਰਾਲਾ ਦੇ ਸਕੱਤਰ ਵੈਂਕਟ ਰਮਨ ਦੀ ਤਰਫੋਂ ਨੋਟੀਫਿਕੇਸ਼ਨ ਜਾਰੀ ਕੀਤੀ ਗਈ ਹੈ ਕਿ ਕੇਂਦਰ ਸਰਕਾਰ ਅਧੀਨ ਆਉਂਦੇ ਵਿਭਾਗਾਂ ਵਿਚ ਲੱਗਾ ਕੋਈ ਵੀ ਅਫ਼ਸਰ ਨਿੱਜੀ ਜਾਂ ਕਿਰਾਏ ’ਤੇ ਲਏ ਵਾਹਨਾਂ ’ਤੇ ‘ਭਾਰਤ ਸਰਕਾਰ’ ਨਾ ਲਿਖਾਏ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਸਿਰਫ਼ ਭਾਰਤ ਸਰਕਾਰ ਵੱਲੋਂ ਖ਼ਰੀਦੇ ਵਾਹਨਾਂ ’ਤੇ ‘ਭਾਰਤ ਸਰਕਾਰ’ ਲਿਖਿਆ ਹੋਣਾ ਚਾਹੀਦਾ ਹੈ।
