ਵਾਰਡ ਬੰਦੀ ਦਾ ਸਰਵੇ ਅੱਜ ਪੂਰਾ ਹੋਵੇਗਾ, ਕੌਂਸਲਰ ਤੇ ਨੇਤਾ ਅਲਰਟ ‘ਤੇ

ਜਲੰਧਰ : ਨਗਰ ਨਿਗਮ ਚੋਣਾਂ ਲਈ ਨਵੀਂ ਵਾਰਡਬੰਦੀ ਅੱਜ ਸੋਮਵਾਰ ਨੂੰ ਪੂਰੀ ਹੋਣ ਦੀ ਉਮੀਦ ਹੈ। ਬੁੱਧਵਾਰ ਨੂੰ ਹੋਈ ਸਮੀਖਿਆ ਬੈਠਕ ‘ਚ ਨਗਰ ਨਿਗਮ ਕਮਿਸ਼ਨਰ ਨੂੰ ਸਰਵੇ ਟੀਮ ਨੇ ਰਿਪੋਰਟ ਕੀਤਾ ਸੀ ਕਿ ਮੌਜੂਦਾ 80 ਵਾਰਡਾਂ ‘ਚੋਂ 77 ਵਾਰਡ ਦਾ ਕੰਮ ਪੂਰਾ ਹੋ ਗਿਆ ਹੈ ਤੇ 3 ਵਾਰਡਾਂ ਦਾ ਕੁਝ ਇਲਾਕੇ ਦਾ ਕੰਮ ਪੈਂਡਿੰਗ ਹੈ। ਕਮਿਸ਼ਨਰ ਨੇ ਸੋਮਵਾਰ ਤਕ ਵਾਰਡਬੰਦੀ ਕਰ ਕੇ ਰਿਪੋਰਟ ਜਮ੍ਹਾਂ ਕਰਵਾਉਣ ਦੇ ਹੁਕਮ ਦਿੱਤੇ ਸਨ। ਸੋਮਵਾਰ ਸ਼ਾਮ ਤਕ ਸਰਵੇ ਪੂਰਾ ਹੋਣ ਤੋਂ ਬਾਅਦ ਡਾਟਾ ਕੰਪਾਈਲ ਕਰਨ ਦਾ ਕੰਮ ਸ਼ੁਰੂ ਹੋਵੇਗਾ। ਸਰਵੇ ਪੂਰਾ ਹੋਣ ਤੋਂ ਬਾਅਦ ਵਾਰਡਬੰਦੀ ਦੇ ਸੰਭਾਵਿਤ ਇਲਾਕਿਆਂ ‘ਤੇ ਕੰਮ ਸ਼ੁਰੂ ਹੋ ਜਾਵੇਗਾ। ਕਿਸ ਵਾਰਡ ‘ਚ ਕਿਹੜਾ ਇਲਾਕਾ ਹੋ ਸਕਦਾ ਹੈ ਇਸ ਨੂੰ ਲੈ ਕੇ ਮੌਜੂਦਾ ਕੌਂਸਲਰ ਤੇ ਦਾਅਵੇਦਾਰ ਅਲਰਟ ‘ਤੇ ਹਨ। ਇਹ ਸਾਰੇ ਮੌਜੂਦਾ ਵਿਧਾਇਕਾਂ ਤੇ ‘ਆਪ’ ਦੇ ਹਲਕਾ ਇੰਚਾਰਜਾਂ ਦੇ ਕਰੀਬੀਆਂ ਜ਼ਰੀਏ ਵਾਰਡਾਂ ਦੀ ਰੂਪ-ਰੇਖਾ ਦੀ ਰਣਨੀਤੀ ਬਾਰੇ ਪਤਾ ਲਗਵਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪੰਜਾਬ ‘ਚ ‘ਆਪ’ ਸਰਕਾਰ ਨੂੰ ਦੇਖਦੇ ਹੋਏ ਕਈ ਮੌਜੂਦਾ ਕੌਂਸਲਰ ਤੇ ਚੋਣਾਂ ਲੜਨ ਦੇ ਇਛੁੱਕ ਨੇਤਾਵਾਂ ਨੇ ਨਵੇਂ ਸਮੀਕਰਨਾਂ ਤਹਿਤ ਰਣਨੀਤੀ ਬਣਾਉਣੀ ਸ਼ੁਰੂ ਕਰ ਦਿੱਤੀ ਹੈ। ਹੁਣ ਤਕ 8 ਕੌਂਸਲਰ ਆਪਣੀ ਪਾਰਟੀ ਬਦਲ ਚੁੱਕੇ ਹਨ। ਕਾਂਗਰਸ ਦੇ 4 ਤੇ ਭਾਜਪਾ ਦੇ ਵੀ 4 ਕੌਂਸਲਰਾਂ ਨੇ ਆਮ ਆਦਮੀ ਪਾਰਟੀ ਦਾ ਪੱਲਾ ਫੜ ਲਿਆ ਹੈ. ਇਕ ਆਜ਼ਾਦ ਕੌਂਸਲਰ ਵੀ ਆਮ ਆਦਮੀ ਪਾਰਟੀ ‘ਚ ਜਾ ਚੁੱਕਾ ਹੈ। ਕਾਂਗਰਸ ਦੇ ਕਈ ਕੌਂਸਲਰ ‘ਆਪ’ ‘ਚ ਜਾਣਾ ਚਾਹੁੰਦੇ ਹਨ, ਕਿਉਂਕਿ ਸੂਬੇ ‘ਚ ਸਰਕਾਰ ‘ਆਪ’ ਪਾਰਟੀ ਦੀ ਹੈ।

ਬੇਸ਼ੱਕ ਆਮ ਆਦਮੀ ਪਾਰਟੀ ਦਾ ਗ੍ਰਾਫ ਡਿੱਗਿਆ ਹੈ ਪਰ ਸਰਕਾਰ ਹੋਣ ਦਾ ਲਾਭ ਚੋਣਾਂ ‘ਚ ਮਿਲੇਗਾ ਹੀ। ਨਵੀਂ ਵਾਰਡਬੰਦੀ ਤੋਂ ਬਾਅਦ ਨਵੇਂ ਸਮੀਕਰਨ ਬਣਨਗੇ। ਕਈ ਮੌਜੂਦਾ ਕੌਂਸਲਰਾਂ ਨੂੰ ਨੁਕਸਾਨ ਉਠਾਉਣਾ ਪੈ ਸਕਦਾ ਹੈ, ਕਿਉਂਕਿ ਉਨ੍ਹਾਂ ਦੇ ਵਾਰਡਾਂ ਨੂੰ ਟਾਰਗੇਟ ਕੀਤਾ ਜਾਣਾ ਤੈਅ ਹੈ। ਮੌਜੂਦਾ 80 ‘ਚੋਂ ਜ਼ਿਆਦਾ ਵਾਰਡ ਕਾਂਗਰਸ ਤੇ ਭਾਜਪਾ ਦੇ ਹਨ। ਅਜਿਹੇ ‘ਚ ਜਦੋਂ ਵਾਰਡ ਟੁੱਟਣਗੇ ਤਾਂ ਸਾਰਿਆਂ ਲਈ ਨਵੇਂ ਸਮੀਕਰਨ ਬਣਨਗੇ। ਉਸ ਦੇ ਹਿਸਾਬ ਨਾਲ ਨੇਤਾ ਆਪਣੀ ‘ਚਾਲ’ ਚੱਲਣਗੇ। ਹਾਲੇ ਕਈ ਕੌਂਸਲਰ ਆਮ ਆਦਮੀ ਪਾਰਟੀ ‘ਚ ਸ਼ਾਮਲ ਹੋਣ ਦੇ ਇਛੁੱਕ ਹਨ। ਜਿਨ੍ਹਾਂ ਨੇਤਾਵਾਂ ਦੇ ਵਾਰਡ ਮਹਿਲਾਵਾਂ ਲਈ ਰਾਖਵੇਂ ਹੋ ਸਕਦੇ ਹਨ, ਉਨ੍ਹਾਂ ਨੇਤਾਵਾਂ ਨੇ ਪਰਿਵਾਰ ਦੀ ਮਹਿਲਾ ਮੈਂਬਰ ਨੂੰ ਸਮਾਜਿਕ ਤੌਰ ‘ਤੇ ਸਰਗਰਮ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਨੇਤਾ ਇਹ ਵੀ ਸਮੀਖਿਆ ਕਰ ਰਹੇ ਹਨ ਕਿ ਵਿਧਾਨ ਸਭਾ ਚੋਣਾਂ ‘ਚ ਕਿਹੜੇ ਇਲਾਕੇ ਤੋਂ ਕਿਹੜੀ ਪਾਰਟੀ ਨੂੰ ਕਿੰਨੀਆਂ ਵੋਟਾਂ ਮਿਲੀਆਂ ਸਨ। ਜਿਹੜੀ ਪਾਰਟੀ ਨੂੰ ਜ਼ਿਆਦਾ ਵੋਟਾਂ ਮਿਲੀਆਂ ਹੋਣਗੀਆਂ, ਉਸ ਦੇ ਨਾਲ ਰਹਿਣ ਦਾ ਮੰਨ ਬਣਾ ਸਕਦੇ ਹਨ।

ਕੁੱਲ 85 ਵਾਰਡ ‘ਚੋਂ 57 ਜਨਰਲ, 26 ਐੱਸਸੀ ਤੇ 2 ਬੀਸੀ ਹੋਣਗੇ

ਇਸ ਵਾਰ ਸ਼ਹਿਰ ‘ਚ 85 ਵਾਰਡ ਹੋਣਗੇ। ਕੌਂਸਲਰ ਤੇ ਚੋਣਾਂ ਦੀ ਤਿਆਰੀ ਕਰ ਰਹੇ ਨੇਤਾ ਵੀ ਵਾਰਡ ਬੰਦੀ ਤੋਂ ਬਾਅਦ ਸੰਭਾਵਿਤ ਇਲਾਕਿਆਂ ਨੂੰ ਲੈ ਕੇ ਸਮੀਖਿਆ ਕਰ ਰਹੇ ਹਨ। ਕਿਹੜਾ ਇਲਾਕਾ ਕਿਹੜੇ ਵਾਰਡ ਵਿਚ ਜਾ ਸਕਦਾ ਹੈ ਤੇ ਮਹਿਲਾ, ਸ਼ਡਿਊਲ ਕਾਸਟ ਤੇ ਬੈਕਵਰਡ ਕਲਾਸ ਲਈ ਰਾਖਵੇਂ ਹੋਣਵਾਲੇ ਵਾਰਡਾਂ ਦੀ ਗਿਣਤੀ ਕੀ ਹੋ ਸਕਦੀ ਹੈ, ਇਸ ਸਬੰਧੀ ਵੀ ਸੰਭਾਵਨਾ ਤਲਾਸ਼ ਰਹੇ ਹਨ। ਨਵੇਂ 85 ਵਾਰਡਾਂ ‘ਚੋਂ 26 ਵਾਰਡ ਐੱਸਸੀ ਵਰਗ, 2 ਬੀਸੀ ਵਰਗ ਤੇ 57 ਜਨਰਲ ਹੋਣਗੇ। ਇਨ੍ਹਾਂ ‘ਚੋਂ 42 ਵਾਰਡ ਮਹਿਲਾਵਾਂ ਲਈ ਰਾਖਵੇਂ ਕੀਤੇ ਗਏ ਹਨ। 57 ਜਨਰਲ ਵਾਰਡ ‘ਚੋਂ 29 ਤੇ 26 ਐਸਸੀ ਵਾਰਡਾਂ ‘ਚੋਂ 13 ਵਾਰਡ ਮਹਿਲਾਵਾਂ ਲਈ ਰਾਖਵੇਂ ਕੀਤੇ ਗਏ ਹਨ। ਬੀਸੀ ਕੈਟਾਗਰੀ ਦੇ 2 ਵਾਰਡਾਂ ‘ਚੋਂ ਕੋਈ ਵੀ ਮਹਿਲਾਵਾਂ ਲਈ ਰਾਖਵਾਂ ਨਹੀਂ ਹੈ।