ਇਨਸਾਨੀਅਤ ਹੋਈ ਸ਼ਰਮਸਾਰ : ਅਣਪਛਾਤੇ ਵਿਅਕਤੀਆਂ ਨੇ ਗਾਂ ਦੀਆਂ ਲੱਤਾਂ ਤੋੜ ਅੱਧਮੋਈ ਕਰ ਕੇ ਸੁੱਟਿਆ

ਮਜੀਠਾ : ਮਜੀਠਾ ਦੇ ਨਾਲ ਲਗਦੇ ਸੋਹੀਆਂ ਕਲਾਂ ਪਿੰਡ ਵਿਖੇ ਅੱਜ ਇਨਸਾਨੀਅਤ ਉਸ ਵੇਲੇ ਸ਼ਰਮਸਾਰ ਹੋ ਗਈ ਜਦੋਂ ਪਿੰਡ ਵਿੱਚ ਅਵਾਰਾ ਘੁੰਮ ਰਹੀ ਇੱਕ ਗਾਂ ਨੂੰ ਕੁੱਝ ਅਣਪਛਾਤੇ ਵਿਅਕਤੀਆਂ ਵੱਲੋ ਬਹੁਤ ਬੇਦਰਦੀ ਨਾਲ ਤਸ਼ੱਦਦ ਢਾਹੁੰਦੇ ਹੋਏ ਉਸ ਦੀਆਂ ਅਗਲੀਆਂ ਦੋਵੇਂ ਲੱਤਾਂ ਤੋੜ ਦਿੱਤੀਆਂ ਅਤੇ ਗਾਂ ਨੂੰ ਮਰਨ ਵਾਸਤੇ ਲਾਵਾਰਸ ਕਰ ਕੇ ਸੁੱਟ ਦਿੱਤਾ। ਘਟਨਾ ਬਾਰੇ ਪਤਾ ਲੱਗਣ ‘ਤੇ ਪਿੰਡ ਦੇ ਹੀ ਸਮਾਜ ਸੇਵਕ ਅਤੇ ਆਮ ਆਦਮੀ ਪਾਰਟੀ ਦੇ ਵਲੰਟੀਅਰ ਪ੍ਰਗਟ ਸਿੰਘ ਨੇ ਮੌਕੇ ‘ਤੇ ਜਾਕੇ ਦੇਖਿਆ ਤਾਂ ਗਾਂ ਦੀ ਹਾਲਤ ਅਤਿ ਨਾਜ਼ੁਕ ਬਣੀ ਸੀ। ਜ਼ਖ਼ਮੀ ਹਾਲਤ ਵਿੱਚ ਗਾਂ ਠੰਢ ਵਿੱਚ ਖੇਤਾਂ ਦੇ ਕੰਢੇ ਪਈ ਹਈ ਸੀ। ਉਸ ਨੇ ਗਾਂ ਨੂੰ ਥੋੜ੍ਹਾ ਨਿੱਘ ਦੇਣ ਵਾਸਤੇ ਉਸ ਦੇ ਆਸ-ਪਾਸ ਅੱਗ ਬਾਲੀ ਅਤੇ ਬਾਅਦ ਵਿੱਚ ਐਨੀਮਲ ਪ੍ਰੋਟੈਕਸ਼ਨ ਐਸੋਸੀਏਸ਼ਨ ਦੇ ਕੌਮੀ ਪ੍ਰਧਾਨ ਡਾ: ਰੋਹਿਨ ਮਹਿਰਾ ਨਾਲ ਸੰਪਰਕ ਕਰਨ ਤੇ ਊਨ੍ਹਾਂ ਵੱਲੋ ਅੰਮ੍ਰਿਤਸਰ ਤੋ ਪਸ਼ੂਆਂ ਦੇ ਡਾਕਟਰ ਨੂੰ ਬੁਲਾ ਕੇ ਊਸ ਦਾ ਇਲਾਜ ਕਰਾਵਾਉਣਾ ਚਾਹਿਆ ਪਰ ਗਾਂ ਦੀ ਹਾਲਤ ਇਨੀ ਵੱਧ ਵਿਗੜ ਚੁੱਕੀ ਸੀ ਕਿ ਇਲਾਜ ਦੇ ਬਾਵਜੂਦ ਗਾਂ ਬਚ ਨਹੀ ਸਕੀ।

ਇਸ ਦੇ ਨਾਲ ਹੀ ਡਾ: ਰੋਹਿਨ ਮਹਿਰਾ ਨੇ ਅੰਮ੍ਰਿਤਸਰ ਦੇ ਪੁਲਿਸ ਅਧਿਕਾਰੀਆਂ ਨਾਲ ਸੰਪਰਕ ਕਰਕੇ ਕਾਰਵਾਈ ਕਰਨ ਲਈ ਕਿਹਾ।

ਜ਼ਿਕਰਯੋਗ ਹੈ ਕਿ ਪਿੰਡ ਦੇ ਹੀ ਕਿਸੇ ਵਿਅਕਤੀ ਵੱਲੋਂ ਆਪਣੀ ਬੇਕਾਰ ਹੋ ਚੁੱਕੀ ਗਾਂ ਨੂੰ ਬਾਹਰ ਅਵਾਰਾ ਛੱਡ ਦਿੱਤਾ ਗਿਆ ਸੀ। ਅਧਿਕਾਰੀਆਂ ਦੇ ਹੁਕਮਾਂ ਦੀ ਪਾਲਣਾ ਕਰਦੇ ਹੋਏ ਐੱਸਐੱਚਓ ਮਨਮੀਤਪਾਲ ਸਿੰਘ ਦੀ ਨਿਗਰਾਨੀ ਹੇਠ ਪੁਲਿਸ ਪਾਰਟੀ ਨੇ ਮੌਕੇ ‘ਤੇ ਪਹੁੰਚ ਕੇ ਮਾਮਲੇ ਨੂੰ ਹੱਥਾਂ ਵਿਚ ਲੈਕੇ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਅਤੇ ਆਪਣੀ ਹਾਜ਼ਰੀ ਵਿੱਚ ਪ੍ਰਗਟ ਸਿੰਘ ਅਤੇ ਪਿੰਡ ਵਾਸੀਆਂ ਵੱਲੋ ਉਕਤ ਗਾਂ ਨੂੰ ਦਫਨਾ ਦਿੱਤਾ ਗਿਆ।