ਮਾਨਸਾ : ਮਰਹੂਮ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਨੂੰ 7 ਮਹੀਨੇ ਹੋ ਗਏ ਹਨ। ਉਸ ਦੇ ਮਾਪਿਆਂ ਮੁਤਾਬਕ ਗੈਂਗਸਟਰਾਂ ਦੇ ਹੌਸਲੇ ਬੁਲੰਦ ਹਨ ਤੇ ਸਰਕਾਰ ਇਨ੍ਹਾਂ ’ਤੇ ਬਣਦੀ ਸਖ਼ਤੀ ਕਰਨ ਪੱਖੋਂ ਨਾਕਾਮ ਰਹੀ ਹੈ।
ਸਿੱਧੂ ਮੂਸੇਵਾਲਾ ਦੇ ਪਿਤਾ ਬਲਕੌਰ ਸਿੰਘ ਵਿਦੇਸ਼ ਦੌਰੇ ਤੋਂ ਵਾਪਸ ਪਰਤ ਆਏ ਹਨ, ਨੇ ਇਸ ਦੌਰਾਨ ਘਰ ਪੁੱਜੇ ਲੋਕਾਂ ਨੂੰ ਸੰਬੋਧਨ ਕੀਤਾ। ਉਨ੍ਹਾਂ ਕਿਹਾ ਕਿ ਸਰਕਾਰ ਗੈਂਗਸਟਰਾਂ ’ਤੇ ਬਣਦੀ ਸਖ਼ਤੀ ਕਰਨ ਅਤੇ ਨਸ਼ਿਆਂ ਦੇ ਪਸਾਰ ਨੂੰ ਰੋਕਣ ਵਿਚ ਨਾਕਾਮ ਰਹੀ ਹੈ। ਉਨ੍ਹਾਂ ਦੱਸਿਆ, ‘‘ਇਕ ਐੱਨਆਰਆਈ ਯੂਕੇ ਤੋਂ ਪੰਜਾਬ ਆਇਆ ਤਾਂ ਉਸ ਤੋਂ 10 ਲੱਖ ਰੁਪਏ ਫਿਰੌਤੀ ਮੰਗ ਲਈ ਗਈ, ਉਹ ਉਸੇ ਦਿਨ ਵਾਪਸ ਚਲਿਆ ਗਿਆ। ਪੰਜਾਬ ਏਨਾ ਬਦਨਾਮ ਹੋ ਗਿਆ ਹੈ ਕਿ ਸੂਬੇ ਵਿਚ ਐੱਨਆਰਆਈਜ਼ ਆਉਣੋਂ ਡਰਨ ਲੱਗੇ ਹਨ। ਗੈਂਗਸਟਰਾਂ ਦੇ ਹੌਂਸਲੇ ਇੰਨੇ ਬੁਲੰਦ ਹੋ ਗਏ ਹਨ ਕਿ ਉਨ੍ਹਾਂ ਨੇ ਥਾਣਿਆਂ ’ਤੇ ਹਮਲੇ ਕਰਨੇ ਸ਼ੁਰੂ ਕਰ ਦਿੱਤੇ ਹਨ। ਸਰਕਾਰ ਅਤੇ ਮੰਤਰੀ ਕੋਈ ਵੀ ਆਪਣਾ ਮੂੰਹ ਖੋਲ੍ਹਣ ਲਈ ਤਿਆਰ ਨਹੀਂ ਨਜ਼ਰ ਆਉਂਦਾ। ਪੁੱਤਰ ਨੂੰ ਇਨਸਾਫ਼ ਦਿਵਾਉਣ ਲਈ ਹਰ ਲੜਾਈ ਲੜਾਂਗਾ। ਯੂਕੇ ਗਿਆ ਸਾਂ, ਉਥੇ ਜੋ ਵੀ ਮਿਲਿਆ, ਸਭ ਨੇ ਪੁੱਛਿਆ ਕਿ ਪੰਜਾਬ ਨੂੰ ਕੀ ਹੋ ਗਿਆ ਹੈ? ਪੰਜਾਬ ਦੀ ਬਾਹਰਲੇ ਦੇਸ਼ਾਂ ਵਿਚ ਬਦਨਾਮੀ ਹੋ ਚੁੱਕੀ ਹੈ। ਕੋਈ ਪਤਾ ਨਹੀਂ ਕਦੋਂ ਕੋਈ ਫਿਰੌਤੀ ਮੰਗ ਲਵੇ। ਕੋਈ ਚਾਰ ਪੈਸੇ ਕਮਾ ਲਵੇ ਤਾਂ ਕੀ ਗੁਨਾਹ ਹੋ ਗਿਆ। ਸਿੱਖਿਆ ਪੱਖੋਂ ਵੀ ਸੂਬਾ ਪਿੱਛੇ ਹੈ ਤੇ ਸਿਰਫ਼ ਆਇਲਟਸ ਕਰਨਾ ਹੀ ‘ਪੜ੍ਹਾਈ’ ਬਣ ਗਿਆ ਹੈ। ਨੌਜਵਾਨ ਗ੍ਰੈਜੂਏਸ਼ਨ ਕਰਨੋਂ ਹੱਟ ਗਏ ਹਨ। ਯੂਪੀਐੱਸਸੀ ਵਿਚ ਟੈਸਟ ਦੇਣ ਲਈ ਨੌਜਵਾਨ ਘੱਟ ਗਏ ਹਨ। ਹੁਣ ਸਾਨੂੰ ਖੁਦ ਤਿਆਰ ਹੋਣਾ ਪਵੇਗਾ ਤੇ ਸਮਝਣਾ ਪਵੇਗਾ। ਸਰਕਾਰ ਨੂੰ ਕੋਈ ਹੋਸ਼ ਨਹੀਂ ਹੈ’’।
