ਜਲੰਧਰ : ਨਗਰ ਨਿਗਮ ਵੱਲੋਂ ਨਾਜਾਇਜ਼ ਉਸਾਰੀਆਂ ਵਿਰੁੱਧ ਜਾਰੀ ਮੁਹਿੰਮ ਅਧੀਨ ਸ਼ੁੱਕਰਵਾਰ ਨੂੰ ਦੋ ਨਾਜਾਇਜ਼ ਉਸਾਰੀਆਂ ਦਾ ਕੰਮ ਰੋਕਿਆ ਗਿਆ ਤੇ ਉਨ੍ਹਾਂ ਨੂੰ ਨੋਟਿਸ ਜਾਰੀ ਕਰ ਕੇ ਦਸਤਾਵੇਜ਼ਾਂ ਸਮੇਤ ਨਿਗਮ ਵਿਖੇ ਤਲਬ ਕੀਤਾ ਗਿਆ ਹੈ। ਉਕਤ ਕਾਰਵਾਈ ਐੱਮਟੀਪੀ ਨੀਰਜ ਭੱਟੀ ਦੀਆਂ ਹਦਾਇਤਾਂ ‘ਤੇ ਏਟੀਪੀ ਸੁਖਦੇਵ ਵਸ਼ਿਸ਼ਠ ਵੱਲੋਂ ਕੀਤੀ ਗਈ। ਏਟੀਪੀ ਅਨੁਸਾਰ ਸੈਦਾਂ ਗੇਟ ਵਿਖੇ ਇਕ ਢਾਈ ਮਰਲੇ ਦੀ ਥਾਂ ‘ਤੇ ਮਾਲਕ ਵੱਲੋਂ ਸ਼ਰੇਆਮ ਨਾਜਾਇਜ਼ ਉਸਾਰੀ ਦਾ ਕੰਮ ਜਾਰੀ ਸੀ। ਨਾਜਾਇਜ਼ ਉਸਾਰੀ ਦੀ ਸ਼ਿਕਾਇਤ ਜਿਵੇਂ ਹੀ ਨਗਰ ਨਿਗਮ ਨੂੰ ਮਿਲੀ ਤਾਂ ਬਿਲਡਿੰਗ ਬ੍ਾਂਚ ਦੇ ਏਟੀਪੀ ਸੁਖਦੇਵ ਵਸ਼ਿਸ਼ਠ ਨੇ ਮੌਕੇ ‘ਤੇ ਜਾ ਕੇ ਉਸਾਰੀ ਜਿਹੜੀ ਦੋ ਮੰਜ਼ਿਲਾ ਕੀਤੀ ਜਾ ਰਹੀ ਸੀ, ਦਾ ਕੰਮ ਰੁਕਵਾਇਆ ਤੇ ਮਾਲਕ ਨੂੰ ਦਸਤਾਵੇਜ਼ ਦਿਖਾਉਣ ਲਈ ਨੋਟਿਸ ਜਾਰੀ ਕਰ ਕੇ ਨਗਰ ਨਿਗਮ ਵਿਖੇ ਤਲਬ ਕੀਤਾ ਹੈ।
ਇਸੇ ਤਰ੍ਹਾਂ ਪ੍ਰਤਾਪ ਬਾਗ਼ ਵਿਖੇ ਪਾਲ ਹਸਪਤਾਲ ਦੇ ਨਾਲ ਲੱਗਦੀ ਗਲੀ ‘ਚ ਨਾਜਾਇਜ਼ ਕਮਰਸ਼ੀਅਲ ਉਸਾਰੀ ਕੀਤੀ ਜਾ ਰਹੀ ਸੀ, ਜਿਸ ਦਾ ਕੰਮ ਰੁਕਵਾਇਆ ਗਿਆ। ਉਸਾਰੀ ਕਰਨ ਵਾਲੇ ਦਾ ਦਾਅਵਾ ਸੀ ਕਿ ਉਸ ਦਾ ਸਮਝੌਤਾ ਹੋ ਚੁੱਕਾ ਹੈ ਤੇ ਉਹ ਉੁਸਾਰੀ ਕਰ ਰਿਹਾ ਸੀ, ਉਸ ਨੇ ਦਸਤਾਵੇਜ਼ ਹੋਣ ਦਾ ਦਾਅਵਾ ਕੀਤਾ ਹੈ। ਇਸ ਏਟੀਪੀ ਨੇ ਨੋਟਿਸ ਜਾਰੀ ਕਰ ਕੇ ਉਸ ਨੂੰ ਨਗਰ ਨਿਗਮ ਦੀ ਬਿਲਡਿੰਗ ਬ੍ਾਂਚ ‘ਚ ਤਲਬ ਕੀਤਾ ਹੈ। ਹੁਣ ਦੋਵੇਂ ਨਾਜਾਇਜ਼ ਉਸਾਰੀਆਂ ਦਾ ਕੰਮ ਰੋਕਣ ਦੇ ਬਾਅਦ ਉਨ੍ਹਾਂ ਨੂੰ ਦਸਤਾਵੇਜ਼ ਲੈ ਕੇ ਨਿਗਮ ਵਿਖੇ ਤਲਬ ਕੀਤਾ ਹੈ।
ਵਰਨਣਯੋਗ ਹੈ ਕਿ ਵੀਰਵਾਰ ਨੂੰ ਨਗਰ ਨਿਗਮ ਨੇ ਅਟਾਰੀ ਬਾਜ਼ਾਰ ਵਿਖੇ 37 ਦੁਕਾਨਾਂ ਦੀ ਚੱਲਦੀ ਨਾਜਾਇਜ਼ ਉਸਾਰੀ ਦਾ ਕੰਮ ਰੁਕਵਾਇਆ ਸੀ।
