ਬਠਿੰਡਾ : ਮਹਿੰਗੀਆਂ ਦਵਾਈਆਂ ਦੇ ਮੁੱਦੇ ’ਤੇ ਵਿਧਾਨ ਸਭਾ ਸਪੀਕਰ ਕੁਲਵਾਰ ਸਿੰਘ ਸੰਧਵਾਂ ਨੇ 21 ਫਰਵਰੀ ਨੂੰ ਉੱਚ ਪੱਧਰੀ ਮੀਟਿੰਗ ਸੱਦੀ। ਸੰਧਵਾਂ ਨੇ ਇਹ ਮੀਟਿੰਗ ਕੈਂਸਰ ਤੇ ਦਿਲ ਦੇ ਰੋਗਾਂ ਦੇ ਇਲਾਜ ਵਿਚ ਵਰਤੀਆਂ ਜਾਂਦੀਆਂ ਦਵਾਈਆਂ ਨੂੰ ਲੈ ਕੇ ਭਾਈ ਘਨੱਈਆ ਕੈਂਸਰ ਰੋਕੋ ਸੁਸਾਇਟੀ ਦੇ ਮੁਖੀ ਗੁਰਪ੍ਰੀਤ ਸਿੰਘ ਚੰਦਬਾਜਾ ਵੱਲੋਂ ਮੰਗ ਪੱਤਰ ਸੌਂਪੇ ਜਾਣ ਪਿੱਛੋਂ ਸੱਦੀ ਹੈ। ਚੰਦਬਾਜਾ ਲੰਮੇਂ ਸਮੇਂ ਤੋਂ ਦਵਾਈਆਂ ਦੀ ਐੱਮਆਰਪੀ ਤੈਅ ਕਰਨ ਨੂੰ ਲੈ ਕੇ ਜੱਦੋਜਹਿਦ ਕਰ ਰਹੇ ਹਨ। ਉਨ੍ਹਾਂ ਲਗਭਗ ਇਕ ਮਹੀਨਾ ਪਹਿਲਾਂ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਤੇ ਡਿਪਟੀ ਸਪੀਕਰ ਜੈ ਸਿੰਘ ਰੋੜੀ ਨੂੰ ਮੰਗ ਪੱਤਰ ਦੇ ਕੇ ਸੂਬਾ ਸਰਕਾਰ ਤੋਂ ਇਸ ਸਬੰਧ ਵਿਚ ਜਨਤਕ ਹਿੱਤ ਵਿਚ ਸਹੀ ਕਦਮ ਚੁੱਕਣ ਲਈ ਕਿਹਾ ਸੀ।
ਵਿਧਾਨ ਸਭਾ ਸਪੀਕਰ ਦੇ ਦਫ਼ਤਰ ਵੱਲੋਂ ਜਾਰੀ ਸਰਕੁਲਰ ਮੁਤਾਬਕ ਇਸ ਮੁੱਦੇ ’ਤੇ ਵਿਧਾਨ ਸਭਾ ਮੈਂਬਰਾਂ ਨੂੰ ਜਾਣੂੰ ਕਰਾਇਆ ਜਾਵੇਗਾ। ਮੀਟਿੰਗ ਵਿਚ ਸਿਹਤ ਮੰਤਰੀ ਡਾ. ਬਲਵੀਰ ਸਿੰਘ, ਸੰਸਦੀ ਕਾਰਜ ਮੰਤਰੀ ਡਾ. ਇੰਦਰਬੀਰ ਸਿੰਘ, ਸਮਾਜਕ ਸੁਰੱਖਿਆ ਮੰਤਰੀ ਡਾ. ਬਲਜੀਤ ਕੌਰ ਤੇ ਹੋਰਨਾਂ ਨੂੰ ਸੱਦਿਆ ਗਿਆ ਹੈ। ਸਮਾਜ ਸੇਵਕਾਂ ਨੇ ਦੱਸਿਆ ਕਿ ਜਿਹੜੀ ਦਵਾਈ 7500 ਰੁਪਏ ਦੀ ਹੈ, ਉਸ ਦਾ ਪਿ੍ਰੰਟ ਰੇਟ 42566 ਰੁਪਏ ਹੈ। ਇਵੇਂ ਹੀ 950 ਰੁਪਏ ਦੀ ਦਵਾਈ ਦਾ ਪਿ੍ਰੰਟ 9900 ਰੁਪਏ ਹੈ। 20 ਰੁਪਏ ਵਾਲੀ ਦਵਾਈ ਦਾ ਪਿ੍ਰੰਟ 138 ਰੁਪਏ ਤੇ 1230 ਰੁਪਏ ਵਾਲੀ ਦਵਾਈ ਦਾ 12500 ਰੁਪਏ ਹੈ। ਇਹ ਮਰੀਜ਼ਾਂ ਤੇ ਉਨ੍ਹਾਂ ਦੇ ਸੰਭਾਲੂਆਂ ਨਾਲ ਮੁਨਾਫ਼ਾ ਭਾਲਦੇ ਦਵਾਈ ਬਜ਼ਾਰ ਧੋਖਾ ਹੈ।
