ਫਾਸਟੈਗ ਨਾਲ ਟੋਲ ਸੰਗ੍ਰਹਿ ਦਾ ਬਣਿਆ ਰਿਕਾਰਡ, ਇਕ ਦਿਨ ’ਚ ਆਏ 193 ਕਰੋੜ, 29 ਅਪ੍ਰੈਲ ਨੂੰ ਫਾਸਟੈਗ ਰਾਹੀਂ ਹੋਈ 1.16 ਕਰੋੜ ਦੀ ਟਰਾਂਜ਼ੈਕਸ਼ਨ

ਨਵੀਂ ਦਿੱਲੀ : ਹਾਈਵੇ ਤੇ ਐਕਸਪ੍ਰੈੱਸ ਵੇਅ ’ਤੇ ਫਾਸਟੈਗ ਜ਼ਰੀਏ ਟੋਲ ਸੰਗ੍ਰਹਿ ਦਾ ਨਵਾਂ ਰਿਕਾਰਡ ਬਣਿਆ ਹੈ। ਟੋਲ ਸੰਗ੍ਰਹਿ ਲਈ ਫਾਸਟੈਗ ਪ੍ਰਣਾਲੀ ’ਤੇ ਅਮਲ ਨੇ ਲੋਕਾਂ ਨੂੰ ਕਾਫ਼ੀ ਰਾਹਤ ਦਿੱਤੀ ਹੈ ਤੇ ਇਸ ਦਾ ਦਾਇਰਾ ਵੀ ਵਧਦਾ ਜਾ ਰਿਹਾ ਹੈ। 29 ਅਪ੍ਰੈਲ ਨੂੰ ਫਾਸਟੈਗ ਰਾਹੀਂ 193.15 ਕਰੋੜ ਰੁਪਏ ਦਾ ਟੋਲ ਸੰਗ੍ਰਹਿ ਹੋਇਆ, ਜਿਹੜਾ ਕਿਸੇ ਇਕ ਦਿਨ ’ਚ ਹੁਣ ਤੱਕ ਦਾ ਸਭ ਤੋਂ ਜ਼ਿਆਦਾ ਟੈਕਸ ਸੰਗ੍ਰਹਿ ਹੈ। ਇਸ ਦਿਨ 1.16 ਕਰੋੜ ਲੈਣ-ਦੇਣ ਫਾਸਟੈਗ ਰਾਹੀਂ ਹੋਇਆ। ਇਸ ਤੋਂ ਪਹਿਲਾਂ 24 ਦਸੰਬਰ ਨੂੰ 144.19 ਕਰੋੜ ਰੁਪਏ ਦਾ ਟੋਲ ਸੰਗ੍ਰਹਿ ਫਾਸਟੈਗ ਰਾਹੀਂ ਹੋਇਆ ਸੀ। ਕੇਂਦਰ ਸਰਕਾਰ ਨੇ ਫਰਵਰੀ 2021 ਤੋਂ ਫਾਸਟੈਗ ਨੂੰ ਸਾਰੇ ਟੋਲ ਪਲਾਜ਼ਿਆਂ ’ਤੇ ਲਾਜ਼ਮੀ ਕਰ ਦਿੱਤਾ ਹੈ। ਇਸ ਤੋਂ ਬਾਅਦ ਫਾਸਟੈਗ ਦੀ ਸਹੂਲਤ ਵਾਲੇ ਟੋਲ ਪਲਾਜ਼ਿਆਂ ਦੀ ਗਿਣਤੀ ਵੀ ਵਧਦੀ ਜਾ ਰਹੀ ਹੈ। ਇਸ ਦੀ ਲਾਜ਼ਮੀਅਤਾ ਦੇ ਸਮੇਂ 770 ਟੋਲ ਪਲਾਜ਼ੇ ਫਾਸਟੈਗ ਵਾਲੇ ਸਨ, ਜਿਹੜੇ ਹੁਣ ਵੱਧ ਕੇ 1228 ਹੋ ਗਏ ਹਨ। ਇਨ੍ਹਾਂ ’ਚ 339 ਸੂਬਾਈ ਟੋਲ ਪਲਾਜ਼ੇ ਹਨ। ਹੁਣ ਤੱਕ 6.9 ਕਰੋੜ ਗਾਹਕਾਂ ਨੂੰ ਫਾਸਟੈਗ ਜਾਰੀ ਕੀਤੇ ਜਾ ਚੁੱਕੇ ਹਨ।

ਫਾਸਟੈਗ ਸਿਸਟਮ ਨੇ ਟੋਲ ਪਲਾਜ਼ਾ ਦੀ ਪ੍ਰਣਾਲੀ ਨੂੰ ਆਸਾਨ ਬਣਾਇਆ ਹੈ ਤੇ ਇਨ੍ਹਾਂ ਪਲਾਜ਼ਿਆਂ ’ਚ ਲੋਕਾਂ ਦਾ ਇੰਤਜ਼ਾਰ ਦਾ ਸਮਾਂ ਕਾਫ਼ੀ ਘੱਟ ਹੋਇਆ ਹੈ। ਹਾਲਾਂਕਿ ਤਕਨੀਕੀ ਦਿੱਕਤਾਂ ਜਾਂ ਸਟਾਫ ਦੀ ਕਮੀ ਜਾਂ ਫਿਰ ਵਿਵਸਥਾ ’ਚ ਗੜਬੜੀ ਕਾਰਨ ਕਈ ਥਾਵਾਂ ’ਤੇ ਲੋਕ ਇਹ ਵੀ ਸ਼ਿਕਾਇਤ ਕਰਦੇ ਹਨ ਕਿ ਫਾਸਟੈਗ ਦੇ ਬਾਵਜੂਦ ਉਨ੍ਹਾਂ ਨੂੰ ਟੋਲ ਪਲਾਜ਼ੇ ’ਤੇ ਸਮਾਂ ਲੱਗ ਰਿਹਾ ਹੈ। ਇਸ ਦੇ ਬਾਵਜੂਦ ਫਾਸਟੈਗ ਦੀ ਪ੍ਰਣਾਲੀ ਨੇ ਲੋਕਾਂ ਨੂੰ ਆਸਾਨੀ ਦਾ ਅਹਿਸਾਸ ਕਰਾਇਆ ਹੈ। ਹਾਈਵੇ ਤੇ ਆਪਣੇ ਵਾਹਨ ਲਿਜਾਣ ਵਾਲੇ ਲੋਕਾਂ ਨੇ ਵੀ ਫਾਸਟੈਗ ਨੂੰ ਜਿਸ ਤਰ੍ਹਾਂ ਅਪਣਾਇਆ ਹੈ, ਉਸ ਨਾਲ ਟੋਲ ਆਪ੍ਰੇਸ਼ਨ ਦੀ ਸਮਰੱਥਾ ਤੇ ਮੁਹਾਰਤ ’ਚ ਵੀ ਵਾਧਾ ਹੋਇਆ ਹੈ। ਇਸ ਨਾਲ ਸਰਕਾਰ ਨੂੰ ਜ਼ਿਆਦਾ ਮਾਲੀਏ ਦਾ ਫਾਇਦਾ ਹੋਇਆ ਹੈ ਤੇ ਇਸ ਕਾਰਨ ਬੁਨਿਆਦੀ ਢਾਂਚੇ ’ਚ ਨਿਵੇਸ਼ ਵੀ ਵੱਧ ਰਿਹਾ ਹੈ।