ਮੰਡੀ ਬਰੀਵਾਲਾ : ਪਿੰਡ ਬਾਜਾ ਮਰਾੜ੍ਹ ਵਿਖੇ ਵੀਰਵਾਰ ਨੂੰ ਕਰੀਬ ਸਾਢੇ ਤਿੰਨ ਵਜੇ ਇਕ ਪ੍ਰਵਾਸੀ ਮਜ਼ਦੂਰ ਦੇ ਸਰਕਾਨਿਆਂ ਦੀ ਛੱਤ ਵਾਲੀ ਝੌਪੜੀ ਨੂੰ ਅੱਗ ਲੱਗ ਗਈ। ਇਸ ਅੱਗ ਦੀ ਲਪੇਟ ’ਚ ਮਜ਼ਦੂਰ ਪਰਿਵਾਰ ਦੇ ਇਕ ਸਵਾ ਸਾਲ ਦੇ ਬੱਚੇ ਦੀ ਦਰਦਨਾਕ ਮੌਤ ਹੋ ਗਈ ਅਤੇ ਘਰ ’ਚ ਬੰਨ੍ਹੀ ਹੋਈ ਮੱਝ ਵੀ ਅੱਗ ਦੀ ਲਪੇਟ ’ਚ ਆ ਕੇ ਮਰ ਗਈ।
ਇਕੱਤਰ ਜਾਣਕਾਰੀ ਅਨੁਸਾਰ, ਪ੍ਰਵਾਸੀ ਮਜ਼ਦੂਰ ਪੱਪੂ ਮੰਡਲ ਜੋ ਕਿ ਪਿਛਲੇ ਚਾਰ ਸਾਲਾਂ ਤੋਂ ਪਿੰਡ ਬਾਜਾ ਮਰਾੜ੍ਹ ਵਿਖੇ ਨਹਿਰਾਂ ’ਤੇ ਆਪਣੀ ਝੁੱਗੀ ਝੌਪੜੀ ਬਣਾ ਕੇ ਰਹਿ ਰਿਹਾ ਹੈ ਅਤੇ ਮਿਹਨਤ ਮਜ਼ਦੂਰ ਕਰ ਕੇ ਗੁਜ਼ਾਰਾ ਕਰਦਾ ਹੈ। ਉਹ ਅੱਜ ਮਿਹਨਤ ਮਜ਼ਦੂਰੀ ਲਈ ਘਰੋਂ ਬਾਹਰ ਗਿਆ ਹੋਇਆ ਸੀ ਤੇ ਘਰ ਵਿੱਚ ਉਸਦੀ ਪਤਨੀ ਤੇ ਉਸਦਾ ਸਵਾ ਸਾਲ ਦਾ ਬੱਚਾ ਅਮਨ ਮੰਡਲ ਮੌਜੂਦ ਸੀ। ਲੋਕਾਂ ਦੇ ਦੱਸਣ ਅਨੁਸਾਰ, ਘਰ ਦੇ ਪਿਛਲੇ ਪਾਸੇ ਕਣਕ ਦੇ ਨਾੜ ਨੂੰ ਅੱਗ ਲੱਗੀ ਹੋਈ ਸੀ ਕਿ ਇਸ ਦੌਰਾਨ ਅੱਗ ਹਵਾ ਦੇ ਚਲਦਿਆਂ ਪੱਪੂ ਮੰਡਲ ਦੀ ਸਰਕਾਨਿਆਂ ਦੀ ਝੌਪੜੀ ਨੂੰ ਪੈ ਗਈ। ਅੱਗ ਹੌਲੀ-ਹੌਲੀ ਸਾਰੀ ਝੁੱਗੀ ਨੂੰ ਲੱਗ ਗਈ। ਅੱਗ ਲੱਗਣ ਦਾ ਪਤਾ ਜਦ ਘਰ ’ਚ ਮੌਜੂਦ ਪੱਪੂ ਮੰਡਲ ਦੀ ਪਤਨੀ ਨੂੰ ਲੱਗਾ ਤਾਂ ਉਹ ਭੱਜ ਕੇ ਝੌਪੜੀ ’ਚ ਬੈਠੇ ਆਪਣੇ ਬੱਚੇ ਨੂੰ ਚੁੱਕ ਕੇ ਬਾਹਰ ਲਿਆਈ ਪਰ ਉਦੋਂ ਤੱਕ ਅੱਗ ਦੀ ਲਪੇਟ ਆਉਣ ਕਾਰਨ ਬੱਚੇ ਮੌਤ ਹੋ ਚੁੱਕੀ ਸੀ।
ਇਸ ਦੌਰਾਨ ਘਰ ’ਚ ਕਿਲ੍ਹੇ ’ਤੇ ਬੰਨ੍ਹੀ ਮੱਝ ਵੀ ਅੱਗ ਦੀ ਲਪੇਟ ’ਚ ਆ ਕੇ ਮਰ ਗਈ। ਪੱਪੂ ਮੰਡਲ ਦੀ ਪਤਨੀ ਜਦ ਉੱਚੀ ਉੱਚੀ ਰੌਣ ਲੱਗੀ ਤਾਂ ਆਸਪਾਸ ਰਹਿੰਦੇ ਲੋਕ ਇਕੱਤਰ ਹੋਏ ਜਿਨ੍ਹਾਂ ਨਹਿਰ ਤੋਂ ਪਾਣੀ ਭਰ ਕੇ ਬੜੀ ਹੀ ਮੁਸ਼ਕੱਤ ਬਾਅਦ ਅੱਗ ‘ਤੇ ਕਾਬੂ ਪਾਇਆ। ਓਧਰ ਸੂਚਨਾ ਮਿਲਣ ’ਤੇ ਜਦ ਤਕ ਫਾਇਰ ਬ੍ਰਿਗੇਡ ਦੀ ਗੱਡੀ ਪੁੱਜੀ ਤਾਂ ਉਦੋਂ ਤੱਕ ਝੁੱਗੀ ਸਮੇਤ ਅੰਦਰ ਪਿਆ ਸਾਮਾਨ ਵੀ ਸੜ ਕੇ ਸੁਆਹ ਹੋ ਗਿਆ ਸੀ। ਓਧਰ ਸੂਚਨਾ ਮਿਲਦਿਆਂ ਹੀ ਥਾਣਾ ਬਰੀਵਾਲਾ ਦੇ ਇੰਚਾਰਜ਼ ਜਸਵੀਰ ਸਿੰਘ ਪੁਲਿਸ ਪਾਰਟੀ ਸਮੇਤ ਅਤੇ ਹੋਰ ਅਧਿਕਾਰੀ ਮੌਕੇ ’ਤੇ ਪੁੱਜ ਗਏ ਅਤੇ ਪੀੜ੍ਹਤ ਪਰਿਵਾਰ ਨਾਲ ਹਮਦਰਦੀ ਪ੍ਰਗਟਾਈ ਤੇ ਜਾਂਚ ਕਰਕੇ ਕਾਰਵਾਈ ਕਰਨ ਦਾ ਭਰੋਸਾ ਦਿੱਤਾ।
