ਖੰਨਾ ਤੋਂ ਵੱਡੀ ਖ਼ਬਰ, 2 ਦਰਜਨ ਤੋਂ ਵੱਧ ਅਵਾਰਾ ਕੁੱਤਿਆਂ ਨੂੰ ਅਣਪਛਾਤੇ ਵਿਅਕਤੀਆਂ ਨੇ ਦਿੱਤਾ ਜ਼ਹਿਰ

ਖੰਨਾ, – ਅੱਜ ਖੰਨਾ ਦੇ ਲਲਹੇੜੀ ਰੋਡ ਸਥਿਤ ਗੁਰਬਚਨ ਕਾਲੋਨੀ ਅਤੇ ਕੇਹਰ ਸਿੰਘ ਕਲੋਨੀ ਇਲਾਕੇ ‘ਚ ਕਿਸੇ ਅਣਪਛਾਤੇ ਵਿਅਕਤੀ ਜਾਂ ਵਿਅਕਤੀਆਂ ਵਲੋਂ 2 ਦਰਜਨ ਤੋਂ ਵਧੇਰੇ ਅਵਾਰਾ ਕੁੱਤਿਆਂ ਨੂੰ ਜ਼ਹਿਰ ਦੇ ਕੇ ਮਾਰ ਦੇਣ ਦੀ ਖ਼ਬਰ ਹੈ। ਲੁਧਿਆਣਾ ਦੇ ਇਕ ਪਸ਼ੂ ਪ੍ਰੇਮੀ ਸੁਰੇਸ਼ ਸ਼ਰਮਾ ਨੇ ਖੰਨਾ ਸਿਟੀ 1 ਦੇ ਐੱਸ.ਐੱਚ. ਓ. ਨੂੰ ਦਰਖ਼ਾਸਤ ਦੇ ਕੇ ਜ਼ਹਿਰ ਦੇਣ ਵਾਲੇ ਵਿਰੁੱਧ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ। ਉਸ ਅਨੁਸਾਰ 30-35 ਕੁੱਤਿਆਂ ਨੂੰ ਜ਼ਹਿਰ ਦੇ ਕੇ ਇਕੋ ਰਾਤ ‘ਚ ਮਾਰ ਦਿੱਤਾ ਗਿਆ। ਖੰਨਾ ਸਿਟੀ 1 ਦੀ ਐਕਟਿੰਗ ਇੰਚਾਰਜ ਪ੍ਰੋਬੇਸ਼ਨਰੀ ਡੀ.ਐੱਸ.ਪੀ. ਮਨਦੀਪ ਕੌਰ ਮੌਕੇ ‘ਤੇ ਘਟਨਾ ਦੀ ਜਾਂਚ ਕਰ ਰਹੇ ਹਨ।