ਖੰਭੇ ‘ਤੇ ਜੈਂਪਰ ਠੀਕ ਕਰ ਰਹੇ ਬਿਜਲੀ ਮੁਲਾਜ਼ਮ ਦੀ ਕਰੰਟ ਲੱਗਣ ਨਾਲ ਮੌਤ

ਭੋਗਪੁਰ : ਪਿੰਡ ਲੜੋਈ ਵਿੱਚ ਬਿਜਲੀ ਮੁਲਾਜ਼ਮ ਦੀ ਬਿਜਲੀ ਦੀ ਸਪਲਾਈ ਚਾਲੂ ਕਰਨ ਲਈ ਖੰਭੇ ‘ਤੇ ਚੜ੍ਹ ਕੇ ਜੈਂਪਰ ਠੀਕ ਕਰਦੇ ਸਮੇਂ ਤਾਰਾਂ ਵਿੱਚ ਕਰੰਟ ਆਉਣ ਕਰਕੇ ਮੌਕੇ ‘ਤੇ ਮੌਤ ਹੋ ਗਈ। ਪ੍ਰਾਪਤ ਜਾਣਕਾਰੀ ਅਨੁਸਾਰ, ਬਿਜਲੀ ਮੁਲਾਜ਼ਮਾਂ ਨੂੰ ਸ਼ਿਕਾਇਤ ਦਰਜ ਹੋਈ ਸੀ ਕਿ ਪਿੰਡ ਲੜੋਈ ਵਿਚ ਬਿਜਲੀ ਦੀ ਸਪਲਾਈ ਬੰਦ ਹੋਈ ਹੈ। ਬਿਜਲੀ ਮੁਲਾਜ਼ਮਾਂ ਸਬ ਸਟੇਸ਼ਨ ਤੋਂ ਬਿਜਲੀ ਦੀ ਸਪਲਾਈ ਬੰਦ ਕਰਕੇ ਪਿੰਡ ਲੜੋਈ ਵਿੱਚ ਬਿਜਲੀ ਠੀਕ ਕਰਨ ਚਲੇ ਗਏ। ਜਦੋਂ ਪਿੰਡ ਭਟਨੂਰਾ ਲੁਬਾਣਾ ਦਾ ਵਾਸੀ ਬਿਜਲੀ ਮੁਲਾਜ਼ਮ ਪਵਿੱਤਰ ਸਿੰਘ ਬਿਜਲੀ ਠੀਕ ਕਰਨ ਲਈ ਖੰਭੇ ਉੱਤੇ ਚੜ੍ਹਿਆ ਤਾਂ ਉਸ ਨੂੰ ਕਰੰਟ ਲੱਗ ਗਿਆ ਅਤੇ ਅੱਗ ਲੱਗਣ ਨਾਲ ਝੁਲਸ ਗਿਆ ਅਤੇ ਨਾਲ ਹੀ ਤਾਰਾਂ ਵਿਚ ਟੰਗਿਆ ਗਿਆ।

ਇਸ ਦੁਰਘਟਨਾ ਦੀ ਸੂਚਨਾ ਮਿਲਦਿਆਂ ਸਾਰ ਹੀ ਬਿਜਲੀ ਮੁਲਾਜ਼ਮ ਅਤੇ ਪੁਲਿਸ ਮੁਲਾਜ਼ਮ ਮੌਕੇ ‘ਤੇ ਹੀ ਪਹੁੰਚ ਗਏ ਅਤੇ ਤਾਰਾਂ ਨਾਲ ਟੰਗੇ ਪਵਿੱਤਰ ਸਿੰਘ ਦੀ ਲਾਸ਼ ਹੇਠਾਂ ਲਾਹ ਕੇ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਜਲੰਧਰ ਭੇਜ ਦਿੱਤੀ ਗਈ। ਥਾਣਾ ਭੋਗਪੁਰ ਪੁਲਿਸ ਨੇ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਬਿਜਲੀ ਅਧਿਕਾਰੀਆਂ ਨੇ ਹੈਰਾਨੀ ਪ੍ਰਗਟ ਕਰਦਿਆਂ ਕਿਹਾ ਕਿ ਜਦੋਂ ਸਭ ਸਟੇਸ਼ਨ ਤੋਂ ਬਿਜਲੀ ਦੀ ਸਪਲਾਈ ਬੰਦ ਕਰ ਦਿੱਤੀ ਸੀ ਫਿਰ ਵਿਗਨ ਪਈ ਬਿਜਲੀ ਦੀ ਲਾਈਨ ਵਿੱਚ ਕਰੰਟ ਕਿਵੇਂ ਆਇਆ ਇਸ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।