ਦੋਰਾਹਾ : ਅੱਜ ਸਵੇਰੇ ਗੋਤਾਖੋਰ ਗੁਰਥਲੀ ਪੁਲ ਨੇੜੇ ਨਹਿਰ ‘ਚ ਸਾਮਾਨ ਦੀ ਤਲਾਸ਼ੀ ਲਈ ਨਹਿਰ ‘ਚ ਉਤਰੇ, ਜਿੱਥੇ ਗੋਤਾਖੋਰਾਂ ਨੂੰ ਕਾਰਤੂਸਾਂ ਨਾਲ ਭਰਿਆ ਹੋਇਆ ਇਕ ਬੈਗ ਮਿਲਿਆ। ਜਿਸ ਦੀ ਗੋਤਾਖੋਰਾਂ ਨੇ ਪਿੰਡ ਗ਼ੁਰਥਲੀ ਦੇ ਸਰਪੰਚ ਨੂੰ ਸੂਚਨਾ ਦਿੱਤੀ ਅਤੇ ਸਰਪੰਚ ਨੇ ਇਸ ਮਾਮਲੇ ਨੂੰ ਪੁਲਿਸ ਅਧਿਕਾਰੀਆਂ ਦੇ ਧਿਆਨ ਵਿੱਚ ਲਿਆਂਦਾ। ਇਸ ਤੋਂ ਬਾਅਦ ਖੰਨਾ ਪੁਲਿਸ ਦੇ ਉੱਚ ਅਧਿਕਾਰੀ ਐੱਸਪੀਡੀ ਪ੍ਰਗਿਆ ਜੈਨ, ਡੀਐੱਸਪੀ ਪਾਇਲ ਹਰਸਿਮਰਤ ਸਿੰਘ ਤੇ ਐੱਸਐੱਚਓ ਦੋਰਾਹਾ ਵਿਜੇ ਕੁਮਾਰ ਪੁੱਜੇ ਮੌਕੇ ‘ਤੇ ਪੁੱਜੇ।
ਇਸ ਮੌਕੇ ਗੱਲਬਾਤ ਕਰਦਿਆਂ ਡੀਐੱਸਪੀ ਪਾਇਲ ਹਰਸਿਮਰਤ ਸਿੰਘ ਨੇ ਦੱਸਿਆ ਕਿ ਨਹਿਰ ਵਿੱਚੋਂ ਮਿਲੇ ਬੈਗ ਵਿੱਚੋਂ 1000 ਦੇ ਕਰੀਬ ਕਾਰਤੂਸ ਮਿਲੇ ਹਨ।ਕਾਰਤੂਸਾਂ ਬਾਰੇ ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਇਹ ਕਾਰਤੂਸ 3 ਨਟ 3 ਤੇ ਐਸਐਲਆਰ ਰਾਈਫਲ ਦੇ ਹਨ ਜੋ ਕਿ ਬਹੁਤ ਪੁਰਾਣੇ ਲੱਗਦੇ ਹਨ। ਦੂਜੇ ਪਾਸੇ ਪੁਲੀਸ ਵੱਲੋਂ ਜਿਸ ਥਾਂ ਤੋਂ ਕਾਰਤੂਸ ਮਿਲੇ ਹਨ, ਉਸ ਦੇ ਆਸ-ਪਾਸ ਦੇ ਇਲਾਕੇ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ, ਜਦਕਿ ਡੀਐਸਪੀ ਹਰਸਿਮਰਤ ਸਿੰਘ ਨੇ ਦੱਸਿਆ ਕਿ ਸਰਕਾਰੀ ਨਿਯਮਾਂ ਦੀ ਪਾਲਣਾ ਕਰਦਿਆਂ ਇਨ੍ਹਾਂ ਕਾਰਤੂਸਾਂ ਨੂੰ ਨਸ਼ਟ ਕੀਤਾ ਜਾਵੇਗਾ।
