ਨਵੀਂ ਦਿੱਲੀ (ਪੀਟੀਆਈ) : ਨਰਸਿੰਗ ਆਫਿਸਰ ਭਰਤੀ ਕੌਮਨ ਐਲਿਜੀਬਿਲਟੀ ਟੈਸਟ (NORCET) ‘ਚ ਧੋਖਾਧੜੀ ਦੇ ਦੋਸ਼ ਵਿਚ ਸੀਬੀਆਈ ਨੇ ਹਰਿਆਣਾ ਦੇ ਇਕ ਉਮੀਦਵਾਰ ਤੇ ਪੰਜਾਬ ਦੇ ਇਕ ਪ੍ਰੀਖਿਆ ਕੇਂਦਰ ਖਿਲਾਫ਼ ਕੇਸ ਦਰਜ ਕੀਤਾ ਹੈ। ਨਰਸਿੰਗ ਅਧਿਕਾਰੀ ਪੋਸਟਾਂ ਦੀ ਭਰਤੀ ਲਈ ਪ੍ਰੀਖਿਆ ਸਰਬ ਭਾਰਤੀ ਆਯੁਰਵਿਗਿਆਨ ਸੰਸਥਾ (AIIMS) ਵੱਲੋਂ ਕਰਵਾਈ ਗਈ ਸੀ। ਸੀਬੀਆਈ ਨੇ ਦਿੱਲੀ ਏਮਜ਼ ਦੇ ਇਕ ਡਾਕਟਰ ਦੀ ਸ਼ਿਕਾਇਤ ‘ਤੇ ਮਾਮਲਾ ਦਰਜ ਕੀਤਾ ਹੈ। ਅਧਿਕਾਰੀਆਂ ਮੁਤਾਬਕ ਉਮੀਦਵਾਰ ਰਿਤੂ ਹਰਿਆਣਾ ਦੀ ਰਹਿਣ ਵਾਲੀ ਹੈ ਜਦਕਿ ਸੈਂਟਰ ਪੰਜਾਬ ‘ਚ ਗਿਆਨ ਜੋਤੀ ਇੰਸਟੀਚਿਊਟ ਆਫ ਮੈਨੇਜਮੈਂਟ ਐਂਡ ਟੈਕਨਾਲੌਜੀ ਹੈ।
ਜ਼ਿਕਰਯੋਗ ਹੈ ਕਿ ਪ੍ਰੀਖਿਆ ਏਮਜ਼ ਨਵੀਂ ਦਿੱਲੀ ਸਮੇਤ ਸਾਰੇ ਏਮਜ਼ ਤੇ ਦਿੱਲੀ ‘ਚ ਚਾਰ ਕੇਂਦਰ ਸਰਕਾਰ ਦੇ ਹਸਪਤਾਲਾਂ ਤੇ ਦਸ਼ ਭਰ ਦੇ ਐੱਨਆਈਟੀਆਰਡੀ ਲਈ ਲਈ ਕਰਵਾਈ ਗਈ ਸੀ। ਸ਼ਿਕਾਇਤਕਰਤਾ ਅਨੁਸਾਰ 5 ਜੂਨ ਦੀ ਦੇਰ ਸ਼ਾਮ ਸ਼ਿਕਾਇਤ ‘ਚ ਨੱਥੀ ਕੁਝ ਟਵੀਟਸ ‘ਚ NORCET-4 ਦੀ ਪ੍ਰਸ਼ਨੋੱਤਰੀ ਦੇ ਲੀਕ ਹੋਣ ਦਾ ਦਾਅਵਾ ਕੀਤਾ ਗਿਆ, ਜੋ 3 ਜੂਨ ਨੂੰ ਸਵੇਰੇ ਦੀ ਸ਼ਿਫਟ ਵਿਚ ਲਈ ਗਈ ਸੀ। ਅਧਿਕਾਰੀਆਂ ਨੇ ਕਿਹਾ ਕਿ ਆਈਪੀਸੀ ਦੀ ਧਾਰਾ 420 (ਤੇ ਆਈਟੀ ਐਕਟ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
