ਜਲੰਧਰ, – ਜਲੰਧਰ ਨਗਰ ਨਿਗਮ ਦੀਆਂ ਚੋਣਾਂ ਆਉਣ ਵਾਲੇ ਦੋ ਮਹੀਨਿਆਂ ਵਿਚ ਹੋਣ ਦੀ ਸੰਭਾਵਨਾ ਹੈ, ਕਿਉਂਕਿ ਜਲੰਧਰ ਨਗਰ ਨਿਗਮ ਵਿਚ ਵਾਰਡਬੰਦੀ ਦੇ ਨਕਸ਼ੇ ਪ੍ਰਦਰਸ਼ਿਤ ਕੀਤੇ ਜਾ ਚੁੱਕੇ ਹਨ। ਇਸ ਨਾਲ ਇਤਰਾਜ਼ ਮੰਗਣ ਦਾ ਸਿਲਸਿਲਾ ਸ਼ੁਰੂ ਹੋ ਗਿਆ ਹੈ ਅਤੇ ਹੁਣ ਆਮ ਲੋਕ ਨਵੀਂ ਵਾਰਡਬੰਦੀ ਨੂੰ ਲੈ ਕੇ ਆਪਣੇ ਇਤਰਾਜ਼ ਪ੍ਰਗਟ ਕਰ ਸਕਦੇ ਹਨ। ਪਤਾ ਲੱਗਾ ਹੈ ਕਿ ਵਿਧਾਨ ਸਭਾ ਹਲਕਾ ਕਰਤਾਰਪੁਰ ਅਧੀਨ ਪੈਂਦੀ ਕਲੋਨੀ ਵਿਰਕ ਐਨਕਲੇਵ (ਜੋ ਵਡਾਲਾ ਚੌਕ ਦੇ ਨੇੜੇ ਪੈਂਦੀ ਹੈ) ਨੂੰ ਇਸ ਵਾਰ ਵਾਰਡਬੰਦੀ ਦੇ ਦਾਇਰੇ ਤੋਂ ਬਾਹਰ ਰੱਖਿਆ ਗਿਆ ਸੀ ਪਰ ਵਿਰਕ ਐਨਕਲੇਵ ਵਾਸੀਆਂ ਵਲੋਂ ਮੰਤਰੀ ਬਲਕਾਰ ਸਿੰਘ ਨੂੰ ਇਕ ਮੰਗ ਪੱਤਰ ਦੇ ਕੇ ਮੰਗ ਕੀਤੀ ਗਈ ਹੈ ਕਿ ਵਿਰਕ ਨਿਗਮ ਦੇ ਵਾਰਡ ਵਿਚ ਸ਼ਾਮਿਲ ਜਾਵੇ। ਇਹ ਕਲੋਨੀ ਪਹਿਲਾਂ 2012 ਤੋਂ 2017 ਤੱਕ ਨਿਗਮ ਦੇ ਵਾਰਡ 58 ਵਿਚ ਰਹਿੰਦੀ ਸੀ ਪਰ ਬਾਅਦ ਵਿਚ ਇਸ ਨੂੰ ਨਿਗਮ ਦੇ ਵਾਰਡ ਵਿਚੋਂ ਕੱਢ ਦਿੱਤਾ ਗਿਆ ਸੀ। ਇਤਰਾਜ਼ ਮੰਗਣ ਦੀ ਪ੍ਰਕਿਰਿਆ ਦੌਰਾਨ ਵਿਰਕ ਐਨਕਲੇਵ ਨਾਲ ਸੰਬੰਧਿਤ ਸੋਧ ਹੋਣ ਜਾ ਰਹੀ ਹੈ। ਇਸ ਤੋਂ ਇਲਾਵਾ ਹੋਰ ਵੀ ਕਈ ਵਾਰਡਾਂ ਵਿਚ ਤਬਦੀਲੀਆਂ ਸੰਭਵ ਹਨ। ਨਵੀਂ ਵਾਰਡਬੰਦੀ ਤਹਿਤ ਜਲੰਧਰ ਨਿਗਮ ਦੇ 85 ਵਾਰਡ ਬਣਾਏ ਗਏ ਹਨ। ਨਕਸ਼ੇ ਦੇਖਣ ਲਈ ਆਮ ਲੋਕ ਤੇ ਆਗੂ ਨਿਗਮ ਪੁੱਜਣ ਲੱਗੇ ਹਨ।
