ਅੰਮ੍ਰਿਤਸਰ : ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧਾਂ ਅਧੀਨ ਅਪ੍ਰੈਲ 2017 ਤੋਂ ਚੱਲ ਰਹੀਂ ਸਾਰਾਗੜ੍ਹੀ ਸਰਾਂ ਦੇ ਬਾਹਰ ਰਹਿੰਦੀਆਂ ਖਾਲੀ ਤਿੰਨ ਦੁਕਾਨਾਂ ਨੂੰ ਕਿਰਾਏ ’ਤੇ ਚੜ੍ਹਾਉਣ ਲਈ ਖੁੱਲ੍ਹੀ ਬੋਲੀ ਰੱਖ ਦਿੱਤੀ ਹੈ। ਸ਼੍ਰੋਮਣੀ ਕਮੇਟੀ ਵੱਲੋਂ 238 ਕਮਰਿਆਂ ਵਾਲੀ ਬਹੁ-ਮੰਜ਼ਿਲਾਂ ਸਾਰਾਗੜ੍ਹੀ ਸਰਾਂ ਨੂੰ ਤਿਆਰ ਕੀਤਾ ਸੀ, ਜਿਸ ਦਾ ਉਦਘਾਟਨ ਤਤਕਾਲੀ ਪ੍ਰਧਾਨ ਪ੍ਰੋ. ਕਿਰਪਾਲ ਸਿੰਘ ਬਡੂੰਗਰ ਵੱਲੋਂ 18 ਅਪ੍ਰੈਲ 2017 ’ਚ ਕੀਤਾ ਸੀ। ਇਸ ਸਰਾਂ ਦੇ ਬਾਹਰ 6 ਦੁਕਾਨਾਂ ਤੇ ਅੰਦਰ ਇਕ ਕੰਟੀਨ ਵੀ ਬਣਾਈ ਸੀ। ਇਸ ਦੀ ਕੰਟੀਨ 56 ਲੱਖ 40 ਹਜ਼ਾਰ ਰੁਪਏ ਸਾਲਾਨਾ ਤੇ ਬਾਹਰ ਵਾਲੀਆਂ 3 ਦੁਕਾਨਾਂ ਤਕਰੀਬਨ ਇਕ ਲੱਖ ਰੁਪਏ ਮਹੀਨੇ ਕਿਰਾਏ ’ਤੇ ਬੈਂਕਾਂ ਨੂੰ ਏਟੀਐੱਮ ਲਈ ਦੇ ਦਿੱਤੀਆਂ ਸਨ। 75 ਮਹੀਨਿਆਂ ਬਾਅਦ 75 ਲੱਖ ਕਿਰਾਏ ਦਾ ਨੁਕਸਾਨ ਝੱਲਣ ਤੋਂ ਬਾਅਦ ਸ਼੍ਰੋਮਣੀ ਕਮੇਟੀ ਨੇ ਹੁਣ ਰਹਿੰਦੀਆਂ ਇਹ ਤਿੰਨ ਦੁਕਾਨਾਂ ਨੂੰ ਖੁੱਲ੍ਹੀ ਬੋਲੀ ਰਾਹੀਂ ਕਿਰਾਏ ’ਤੇ ਦੇਣ ਦਾ ਫੈਸਲਾ ਕੀਤਾ ਹੈ। ਇਸ ਸਬੰਧੀ ਸ੍ਰੀ ਦਰਬਾਰ ਸਾਹਿਬ ਦੇ ਮੈਨੇਜਰ ਜਾਇਦਾਦ ਸਤਨਾਮ ਸਿੰਘ ਰਿਆੜ ਨੇ ਦੱਸਿਆ ਕਿ 26 ਜੁਲਾਈ ਨੂੰ ਇਸ ਸਬੰਧੀ ਬੋਲੀ ਰੱਖੀ ਹੈ।
