ਵੱਡੀ ਲਾਪਰਵਾਹੀ ! ਚੰਡੀਗੜ੍ਹ ਏਅਰਪੋਰਟ ਦੀ ਦੁਕਾਨ ਤੋਂ ਖ਼ਰੀਦੇ ਸਮੋਸੇ ‘ਚੋਂ ਨਿਕਲਿਆ ਕਾਕਰੋਚ, ਵੈਂਡਰ ਨੂੰ ਸ਼ੋਅਕਾਜ਼ ਨੋਟਿਸ

ਮੁਹਾਲੀ : ਚੰਡੀਗੜ੍ਹ ਇੰਟਰਨੈਸ਼ਨਲ ਏਅਰਪੋਰਟ (Chandigarh International Airport) ‘ਤੇ ਇਕ ਖਾਣ-ਪੀਣ ਵਾਲੇ ਦੁਕਾਨ ਤੋਂ ਲਏ ਸਮੋਸੇ ‘ਚੋਂ ਕਾਕਰੋਚ (Cockroach) ਮਿਲਿਆ ਹੈ। ਇਹ ਸ਼ਿਕਾਇਤ ਏਅਰਪੋਰਟ ਅਥਾਰਟੀ ਦੇ ਸੀਨੀਅਰ ਅਧਿਕਾਰੀਆਂ ਨੂੰ ਕੀਤੀ ਗਈ ਹੈ ਜਿਸ ਵਿਚ ਅਥਾਰਟੀ ਨੇ ਵੈਂਡਰ ਦੇ ਖਿਲਾਫ਼ ਸਖ਼ਤ ਕਾਰਵਾਈ ਦੇ ਆਦੇਸ਼ ਜਾਰੀ ਕਰ ਦਿੱਤੇ ਹਨ। ਵੇਰਵਿਆਂ ਅਨੁਸਾਰ ਲੀਜ਼ਾ ਗਰਗ ਨਾਂ ਦੀ ਇਕ ਯਾਤਰੀ ਨੇ 14 ਅਕਤੂਬਰ ਨੂੰ ਚੰਡੀਗੜ੍ਹ ਤੋਂ ਅਹਿਮਦਾਬਾਦ ਦੀ ਫਲਾਈਟ ਲੈਣੀ ਸੀ। ਇਸ ਦੌਰਾਨ ਉਸ ਨੇ ਇਕ ਦੁਕਾਨ ਤੋਂ 2 ਸਮੋਸੇ 190 ਰੁਪਏ 48 ਪੈਸੇ ‘ਚ ਖਰੀਦੇ। ਜਦੋਂ ਉਹ ਖਾਣ ਲੱਗੀ ਤਾਂ ਇਨ੍ਹਾਂ ਵਿਚੋਂ ਇਕ ਕਾਕਰੋਚ ਮਿਲਿਆ। ਉਸ ਨੇ ਵੈਂਡਰ ਨੂੰ ਇਸ ਦੀ ਸ਼ਿਕਾਇਤ ਕੀਤੀ ਪਰ ਉਸ ਨੇ ਕੋਈ ਪ੍ਰਤੀਕਿਰਿਆ ਨਹੀਂ ਦਿਖਾਈ। ਹਾਰ ਕੇ ਉਸ ਨੇ ਏਅਰਪੋਰਟ ਅਥਾਰਟੀ ਦੇ ਸੀਈਓ ਰਾਕੇਸ਼ ਰੰਜਨ ਸਹੇ ਨੂੰ ਈ-ਮੇਲ ਰਾਹੀਂ ਸੂਚਿਤ ਕੀਤਾ। ਰੰਜਨ ਨੇ ਪੰਜਾਬੀ ਜਾਗਰਣ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਵੈਂਡਰ ਨੂੰ ਇਸ ਮਾਮਲੇ ‘ਚ ਸ਼ੋਅਕਾਜ਼ ਨੋਟਿਸ ਜਾਰੀ ਕੀਤਾ ਗਿਆ ਹੈ ਅਤੇ ਠੇਕਾ ਪ੍ਰਣਾਲੀ ‘ਚ ਤੈਅਸ਼ੁਦਾ ਮਾਪਦੰਡਾਂ ਦੇ ਆਧਾਰ ‘ਤੇ ਇਸ ਵੈਂਡਰ ਉੱਤੇ ਕਾਰਵਾਈ ਕੀਤੀ ਜਾਵੇਗੀ।