ਜਲੰਧਰ ਵਿੱਚ ਗੰਦੀਗੀ ਖਿਲਾਫ ਨਗਰ ਨਿਗਮ ਹੋਇਆ ਸਖਤ, ਥਾਂ-ਥਾਂ ਕੂੜਾ ਸੁੱਟਣ ਵਾਲਿਆਂ ਤੇ ਹੁਣ ਲੱਗੇਗਾ ਜੁਰਮਾਨਾ ਨਿਗਮ ਨੇ ਮੰਗਵਾਈ ਚਾਲਾਨ ਮਸ਼ੀਨ”

ਜਲੰਧਰ: ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਸ਼ਹਿਰ ਵਿੱਚ ਥਾਂ-ਥਾਂ ਫੈਲ ਰਹੀ ਗੰਦੀਗੀ ਅਤੇ ਬੇਤਰਤੀਬੀ ਨਾਲ ਸੁੱਟਿਆ ਜਾ ਰਿਹਾ ਕੂੜਾ ਨਗਰ ਨਿਗਮ ਵਾਸਤੇ ਚੁਣੌਤੀ ਬਣ ਗਿਆ ਸੀ। ਹੁਣ ਨਗਰ ਨਿਗਮ ਨੇ ਇਸ ਸਮੱਸਿਆ ਖਿਲਾਫ ਸਖਤ ਰੁਖ ਅਖਤਿਆਰ ਕਰ ਲਿਆ ਹੈ। ਨਗਰ ਨਿਗਮ ਦੇ ਮੇਅਰ ਵਨੀਤ ਧੀਰ ਅਤੇ ਕਮਿਸ਼ਨਰ ਗੌਤਮ ਜੈਨ ਨੇ ਐਲਾਨ ਕੀਤਾ ਹੈ ਕਿ ਹੁਣ ਜੇਹੜਾ ਵੀ ਵਿਅਕਤੀ ਜਾਂ ਸੰਸਥਾ ਸਿੱਧਾ ਡੰਪ ਸਾਈਟ ‘ਤੇ ਜਾਂ ਸੜਕਾਂ-ਨਕਿਆਂ ‘ਤੇ ਕੂੜਾ ਸੁੱਟਦੇ ਪਾਏ ਜਾਣਗੇ, ਉਨ੍ਹਾਂ ਦਾ ਮੌਕੇ ‘ਤੇ ਹੀ ਚਾਲਾਨ ਕੱਟਿਆ ਜਾਵੇਗਾ।

ਇਸੇ ਸਬੰਧ ‘ਚ ਨਗਰ ਨਿਗਮ ਨੇ ਨਵੀਨਤਮ ਤਕਨੀਕ ਵਾਲੀਆਂ ਚਾਲਾਨ ਕੱਟਣ ਵਾਲੀਆਂ ਮਸ਼ੀਨਾਂ ਮੰਗਵਾਈਆਂ ਹਨ ਜੋ ਜਲਦ ਹੀ ਲਾਗੂ ਕੀਤੀਆਂ ਜਾਣਗੀਆਂ। ਇਹ ਮਸ਼ੀਨਾਂ ਮੌਕੇ ‘ਤੇ ਹੀ ਉਲੰਘਣਾ ਕਰਨ ਵਾਲਿਆਂ ‘ਤੇ ਜੁਰਮਾਨਾ ਲਗਾਉਣਗੀਆਂ।

ਗੌਰਤਲਬ ਹੈ ਕਿ ਕੇਂਦਰ ਸਰਕਾਰ ਵੱਲੋਂ 2016 ਵਿੱਚ ਲਾਗੂ ਕੀਤੇ ਗਏ Solid Waste Management Rules ਨੂੰ ਜਲੰਧਰ ਵਿੱਚ ਅਜੇ ਤੱਕ ਪੂਰੀ ਤਰ੍ਹਾਂ ਲਾਗੂ ਨਹੀਂ ਕੀਤਾ ਜਾ ਸਕਿਆ। ਕਈ ਵਾਰ ਜ਼ੋਰਦਾਰ ਮੁਹਿੰਮਾਂ ਵੀ ਚਲਾਈਆਂ ਗਈਆਂ, ਪਰ ਉਹ ਲੰਮੇ ਸਮੇਂ ਤੱਕ ਜਾਰੀ ਨਹੀਂ ਰਹੀਆਂ। ਜਿਸ ਕਰਕੇ ਸ਼ਹਿਰ ਵਿੱਚ ਗੰਦੀਗੀ ਦੀ ਸਮੱਸਿਆ ਦਿਨੋਂ-ਦਿਨ ਘੰਭੀਰ ਹੋ ਰਹੀ ਹੈ।

ਮੇਅਰ ਅਤੇ ਕਮਿਸ਼ਨਰ ਨੇ ਦਿੱਤੀਆਂ ਹਦਾਇਤਾਂ:

ਜਿਹੜੇ ਵਪਾਰਕ ਪਰਿਸਰ, ਹੋਟਲ, ਸਥਾਪਨਾਵਾਂ ਜਾਂ ਰਹਾਇਸ਼ੀ ਸੋਸਾਇਟੀਆਂ ਹਰ ਰੋਜ਼ 50 ਕਿਲੋ ਜਾਂ ਵੱਧ ਕੂੜਾ ਉਤਪੰਨ ਕਰਦੀਆਂ ਹਨ, ਉਹਨਾਂ ਨੂੰ ਆਪਣਾ ਕੂੜਾ ਆਪ ਸੰਭਾਲਣਾ ਹੋਵੇਗਾ।

ਆਮ ਘਰਾਂ ਅਤੇ ਛੋਟੀਆਂ ਦੁਕਾਨਾਂ ਵਾਸਤੇ ਨਿਯੁਕਤ ਕੀਤੇ ਰੈਗ-ਪਿਕਰਾਂ ਰਾਹੀਂ ਹੀ ਕੂੜਾ ਨਿਗਮ ਨੂੰ ਦਿੱਤਾ ਜਾਵੇ।

ਕੂੜਾ ਖੁਦ ਡੰਪ ਕਰਨਾ ਜਾਂ ਗਲਤ ਢੰਗ ਨਾਲ ਸੁੱਟਣਾ ਪੂਰੀ ਤਰ੍ਹਾਂ ਰੋਕਿਆ ਜਾਵੇਗਾ। ਉਲੰਘਣਾ ਕਰਨ ਵਾਲਿਆਂ ਉੱਤੇ ਤੁਰੰਤ ਕਾਰਵਾਈ ਹੋਵੇਗੀ।

ਨਗਰ ਨਿਗਮ ਨੇ ਲੋਕਾਂ ਨੂੰ ਸੂਚਿਤ ਕਰਦੇ ਹੋਏ ਅਪੀਲ ਕੀਤੀ ਹੈ ਕਿ ਉਹ ਸ਼ਹਿਰ ਨੂੰ ਸਾਫ਼-ਸੁਥਰਾ ਰੱਖਣ ਵਿੱਚ ਆਪਣਾ ਸਹਿਯੋਗ ਦਿੰਦਿਆਂ ਨਿਯਮਾਂ ਦੀ ਪਾਲਣਾ ਕਰਨ। ਇਨ੍ਹਾਂ ਨਵੇਂ ਉਪਕਰਮਾਂ ਰਾਹੀਂ ਉਮੀਦ ਜਤਾਈ ਜਾ ਰਹੀ ਹੈ ਕਿ ਜਲੰਧਰ ਵਿਚ ਕੂੜਾ ਅਤੇ ਗੰਦੀਗੀ ਦੀ ਸਮੱਸਿਆ ਉੱਤੇ ਅੰਸ਼ਕ ਰੂਪ ਵਿੱਚ ਕਾਬੂ ਪਾਇਆ ਜਾ ਸਕੇਗਾ।