ਲੁਧਿਆਣਾ: ਕੰਵਲਜੀਤ ਸਿੰਘ ਮੱਕੜ – ਲੁਧਿਆਣਾ ਦੇ ਸ਼੍ਰਿੰਗਾਰ ਸਿਨੇਮਾ ਸਾਹਮਣੇ ਇੱਕ ਨਵੀਂ ਨਿਰਮਾਣਧੀਨ ਇਮਾਰਤ ਦਾ ਕੰਮ ਜਾਰੀ ਹੈ, ਜਿਸ ਦੀ ਬੇਸਮੈਂਟ ਲਈ ਕੀਤੀ ਜਾ ਰਹੀ ਗਹਿਰੀ ਖੁਦਾਈ ਨੇ ਹੁਣ ਸਥਾਨਕ ਵਾਸੀਆਂ ਲਈ ਮੁਸੀਬਤ ਖੜੀ ਕਰ ਦਿੱਤੀ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਰਾਤੀਂ ਹੋਈ ਭਾਰੀ ਵਰਖਾ ਦੇ ਕਾਰਨ ਇਮਾਰਤ ਨੇੜੇ ਵਾਲੀ ਗਲੀ ਧੰਸ ਗਈ, ਜਿਸ ਕਾਰਨ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਹੈ।
ਇਲਾਕੇ ਦੀ ਰਹਿਣ ਵਾਲੀ ਰਿੰਪੀ ਰਾਣੀ ਨੇ ਦੱਸਿਆ ਕਿ ਧਰਮਪੁਰਾ ਦੀ ਗਲੀ ਨੰਬਰ 1 ਵਿੱਚ ਉਹ ਰਹਿੰਦੀ ਹੈ ਅਤੇ ਉਥੇ ਇਮਾਰਤ ਦੀ ਬੇਸਮੈਂਟ ਲਈ ਕੀਤੀ ਗਈ ਖੁਦਾਈ ਨੇ ਪੂਰੀ ਗਲੀ ਨੂੰ ਅਸੁਰੱਖਿਅਤ ਕਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਰਾਤ ਦਿਨ ਇਮਾਰਤ ‘ਚ ਕੰਮ ਚਲ ਰਿਹਾ ਹੈ ਅਤੇ ਰਾਤ ਦੀ ਵਰਖਾ ਕਾਰਨ ਖੁਦਾਈ ਵਾਲੇ ਖੱਡ ਵਿੱਚ ਪਾਣੀ ਭਰਨ ਨਾਲ ਗਲੀ ਧੰਸ ਗਈ।
ਇਸ ਸਾਹਮਣੇ ਆਇਆ ਹੈ ਕਿ ਕਿਵੇਂ ਗਹਿਰੀ ਖੁਦਾਈ ਅਤੇ ਪਾਣੀ ਭਰਨ ਕਾਰਨ ਗਲੀ ਦਾ ਹਿੱਸਾ ਡਿੱਗ ਗਿਆ। ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਇਮਾਰਤ ਦੇ ਮਾਲਕ ਦਾ ਸਿਆਸੀ ਆਸਰਾ ਹੋ ਸਕਦਾ ਹੈ, ਜਿਸ ਕਰਕੇ ਬੇਪਰਵਾਹੀ ਨਾਲ ਕੰਮ ਜਾਰੀ ਰੱਖਿਆ ਜਾ ਰਿਹਾ ਹੈ।
ਇਲਾਕਾ ਵਾਸੀਆਂ ਨੇ ਪ੍ਰਸ਼ਾਸਨ ਕੋਲ ਮੰਗ ਰੱਖੀ ਹੈ ਕਿ ਤੁਰੰਤ ਪ੍ਰਭਾਵ ਨਾਲ ਧੰਸੀ ਹੋਈ ਸੜਕ ਦੀ ਮੁਰੰਮਤ ਕਰਵਾਈ ਜਾਵੇ ਅਤੇ ਇਮਾਰਤ ਦੀ ਬੇਸਮੈਂਟ ਬਣਾਉਣ ‘ਤੇ ਤੁਰੰਤ ਰੋਕ ਲਾਈ ਜਾਵੇ। ਉਨ੍ਹਾਂ ਕਿਹਾ ਕਿ ਜੇਕਰ ਵਰਖਾ ਮੁੜ ਹੋਈ ਤਾਂ ਵੱਡਾ ਹਾਦਸਾ ਹੋ ਸਕਦਾ ਹੈ ਜੋ ਕਿਸੇ ਵੀ ਸਮੇਂ ਕਿਸੇ ਦੀ ਜਾਨ ਲੈ ਸਕਦਾ ਹੈ।
