ਜਲੰਧਰ : ( ਕੰਵਲਜੀਤ ਸਿੰਘ ਮੱਕੜ )- ਜਲੰਧਰ ਕੈਂਟ ਰੇਲਵੇ ਸਟੇਸ਼ਨ ‘ਤੇ ਚੱਲ ਰਹੇ ਨਵੀਨੀਕਰਨ ਦੇ ਕੰਮ ਦੌਰਾਨ ਅੱਜ ਇੱਕ ਭਾਰੀ ਹਾਦਸਾ ਵਾਪਰ ਗਿਆ। ਮਿਲੀ ਜਾਣਕਾਰੀ ਅਨੁਸਾਰ ਨਿਰਮਾਣ ਸਥਲ ‘ਤੇ ਇੱਕ ਭਾਰੀ ਭਰਕਮ ਕ੍ਰੇਨ ਦੀ ਮਦਦ ਨਾਲ ਇੰਫ੍ਰਾਸਟ੍ਰਕਚਰ ਦੇ ਪੋਲ ਨੂੰ ਚੁੱਕਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਸੀ। ਇਸ ਦੌਰਾਨ ਕ੍ਰੇਨ ਅਚਾਨਕ ਅਸੰਤੁਲਿਤ ਹੋ ਗਈ ਤੇ ਉੱਪਰ ਚੁੱਕਿਆ ਗਿਆ ਲੋਹੇ ਦਾ ਭਾਰੀ ਹਿੱਸਾ ਸਿੱਧਾ ਪਾਰਕਿੰਗ ਵਿੱਚ ਖੜ੍ਹੇ ਵਾਹਨਾਂ ‘ਤੇ ਆ ਡਿੱਗਿਆ।
ਇਹ ਹਾਦਸਾ ਤਦ ਵਾਪਰਿਆ ਜਦੋਂ ਭਾਰੀ ਸਾਮਾਨ ਨੂੰ ਉਠਾਉਣ ਲਈ ਤਿੰਨ ਕ੍ਰੇਨਾਂ ਦੀ ਜ਼ਰੂਰਤ ਹੋਣ ਦੇ ਬਾਵਜੂਦ ਇੱਕ ਹੀ ਕ੍ਰੇਨ ਦੀ ਵਰਤੋਂ ਕੀਤੀ ਗਈ। ਇਸ ਘਟਨਾ ਦੌਰਾਨ ਪਾਰਕਿੰਗ ‘ਚ ਖੜ੍ਹੀਆਂ ਕਈ ਦੋ ਪਹੀਆ ਅਤੇ ਚਾਰ ਪਹੀਆ ਵਾਹਨਾਂ ਨੂੰ ਭਾਰੀ ਨੁਕਸਾਨ ਹੋਇਆ ਹੈ।
ਵਾਹਨ ਮਾਲਕਾਂ ਦੀ ਦਰਦ ਭਰੀ ਕਹਾਣੀ
ਹਾਦਸੇ ਸਮੇਂ ਪਾਰਕਿੰਗ ‘ਚ ਰੇਲਵੇ ਕਰਮਚਾਰੀਆਂ ਅਤੇ ਹੋਰ ਸਟਾਫ ਦੀਆਂ ਗੱਡੀਆਂ ਖੜ੍ਹੀਆਂ ਸਨ। ਵਾਹਨ ਮਾਲਕਾਂ ਦਾ ਕਹਿਣਾ ਹੈ ਕਿ ਹਾਦਸੇ ਤੋਂ ਬਾਅਦ ਜਦੋਂ ਉਨ੍ਹਾਂ ਨੇ ਅਪਣੇ ਨੁਕਸਾਨ ਬਾਰੇ ਪੁੱਛਿਆ ਤਾਂ ਠੇਕੇਦਾਰ ਦੇ ਕਰਮਚਾਰੀ ਉਲਟ ਗੁੱਸੇ ‘ਚ ਆ ਗਏ ਅਤੇ ਗਾਲਾਂ ਕੱਢਣ ਲੱਗ ਪਏ। ਲੋਕਾਂ ਨੇ ਦੋਸ਼ ਲਗਾਏ ਹਨ ਕਿ ਨਿਰਮਾਣ ਕੰਪਨੀ ਵੱਲੋਂ ਨਾ ਤਾਂ ਸੁਰੱਖਿਆ ਦੇ ਪ੍ਰੋਪਰ ਇੰਤਜ਼ਾਮ ਕੀਤੇ ਗਏ ਸਨ ਅਤੇ ਨਾ ਹੀ ਕ੍ਰੇਨ ਚਲਾਉਣ ਵਾਲਿਆਂ ਕੋਲ ਲੋੜੀਂਦਾ ਤਜਰਬਾ ਸੀ।
ਠੇਕੇਦਾਰ ਅਤੇ ਪਾਰਕਿੰਗ ਇੰਚਾਰਜ ਦੀ ਵਿਆਖਿਆ
ਮਾਮਲੇ ਉੱਤੇ ਪਾਰਕਿੰਗ ਠੇਕੇਦਾਰ ਨੇ ਵੀ ਪੱਖ ਰੱਖਦੇ ਹੋਏ ਕਿਹਾ ਕਿ ਇਹ ਨਵੀਨੀਕਰਨ ਕੰਮ ਰੇਲਵੇ ਵਿਭਾਗ ਦੇ ਆਦੇਸ਼ ਤੇ ਹੋ ਰਿਹਾ ਸੀ। ਪੋਲ ਨੂੰ 5 ਹਿੱਸਿਆਂ ‘ਚ ਚੁੱਕਣ ਦੀ ਯੋਜਨਾ ਸੀ, ਪਰ ਮੌਕੇ ‘ਤੇ ਇੱਕ ਹੀ ਵਾਰੀ ਪੂਰਾ ਹਿੱਸਾ ਚੁੱਕਣ ਦੀ ਕੋਸ਼ਿਸ਼ ਕੀਤੀ ਗਈ। ਇਸ ਦੌਰਾਨ ਕ੍ਰੇਨ ਦਾ ਹਿੱਸਾ ਡਿੱਗ ਗਿਆ ਅਤੇ ਭਾਰੀ ਸਾਮਾਨ ਪਾਰਕਿੰਗ ਵਿੱਚ ਖੜ੍ਹੇ ਵਾਹਨਾਂ ‘ਤੇ ਆ ਡਿੱਗਿਆ। ਹਾਦਸੇ ਵਿੱਚ ਮੁੱਖ ਤੌਰ ‘ਤੇ ਦੋ ਪਹੀਆ ਵਾਹਨਾਂ ਦਾ ਨੁਕਸਾਨ ਹੋਇਆ ਹੈ।
ਜਾਨੀ ਨੁਕਸਾਨ ਤੋਂ ਬਚਾਵ, ਪਰ ਵੱਡੀ ਲਾਪਰਵਾਹੀ
ਸਭ ਤੋਂ ਵੱਡੀ ਗਣੀਮਤ ਇਹ ਰਹੀ ਕਿ ਹਾਦਸੇ ਦੇ ਸਮੇਂ ਪਾਰਕਿੰਗ ‘ਚ ਕੋਈ ਵਿਅਕਤੀ ਮੌਜੂਦ ਨਹੀਂ ਸੀ, ਨਹੀਂ ਤਾਂ ਇਹ ਹਾਦਸਾ ਜਾਨੀ ਨੁਕਸਾਨ ‘ਚ ਵੀ ਬਦਲ ਸਕਦਾ ਸੀ। ਹਾਲਾਂਕਿ, ਘਟਨਾ ਨੇ ਰੇਲਵੇ ਪ੍ਰਸ਼ਾਸਨ ਅਤੇ ਠੇਕੇਦਾਰਾਂ ਵੱਲੋਂ ਨਿਰਮਾਣ ਸਥਲ ‘ਤੇ ਸੁਰੱਖਿਆ ਪ੍ਰਬੰਧਾਂ ਬਾਰੇ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਲੋਕਾਂ ਦੀ ਮੰਗ – ਨੁਕਸਾਨ ਦੀ ਭਰਪਾਈ ਅਤੇ ਸਖ਼ਤ ਕਾਰਵਾਈ ,ਵਾਹਨ ਮਾਲਕਾਂ ਨੇ ਮੰਗ ਕੀਤੀ ਹੈ ਕਿ ਉਨ੍ਹਾਂ ਦੇ ਨੁਕਸਾਨ ਦੀ ਤੁਰੰਤ ਭਰਪਾਈ ਕੀਤੀ ਜਾਵੇ ਅਤੇ ਨਿਰਮਾਣ ਕੰਮ ਦੌਰਾਨ ਹੋ ਰਹੀਆਂ ਲਾਪਰਵਾਹੀਆਂ ਲਈ ਜ਼ਿੰਮੇਵਾਰ ਕੰਪਨੀ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ। ਇਸ ਦੇ ਨਾਲ ਹੀ, ਰੇਲਵੇ ਪ੍ਰਸ਼ਾਸਨ ਤੋਂ ਵੀ ਮੰਗ ਕੀਤੀ ਜਾ ਰਹੀ ਹੈ ਕਿ ਆਉਣ ਵਾਲੇ ਸਮੇਂ ‘ਚ ਇਸ ਤਰ੍ਹਾਂ ਦੇ ਕੰਮ ਦੌਰਾਨ ਸਖ਼ਤ ਸੁਰੱਖਿਆ ਮਿਆਰਾਂ ਦੀ ਪਾਲਣਾ ਕਰਵਾਈ ਜਾਵੇ।
ਸਥਾਨਕ ਪ੍ਰਸ਼ਾਸਨ ਦੀ ਚੁੱਪੀ ਉਤੇ ਵੀ ਸਵਾਲ
ਘਟਨਾ ਤੋਂ ਬਾਅਦ ਸਥਾਨਕ ਪ੍ਰਸ਼ਾਸਨ ਵੱਲੋਂ ਹਾਲੇ ਤਕ ਕੋਈ ਵੱਡਾ ਬਿਆਨ ਜਾਰੀ ਨਹੀਂ ਕੀਤਾ ਗਿਆ, ਜਿਸ ਕਾਰਨ ਲੋਕਾਂ ਵਿੱਚ ਨਾਰਾਜ਼ਗੀ ਵਧ ਰਹੀ ਹੈ। ਮੰਗ ਕੀਤੀ ਜਾ ਰਹੀ ਹੈ ਕਿ ਜਿੰਨੇ ਵੀ ਵਾਹਨ ਨੁਕਸਾਨੀਗ੍ਰਸਤ ਹੋਏ ਹਨ, ਉਨ੍ਹਾਂ ਦੀ ਸੂਚੀ ਬਣਾਕੇ ਮੁਆਵਜ਼ਾ ਦਿੱਤਾ ਜਾਵੇ।
