ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਜਲੰਧਰ ਸ਼ਹਿਰ ਦੇ ਗਾਜੀ ਗੁੱਲਾ ਇਲਾਕੇ ‘ਚ ਕੱਲ੍ਹ ਦੇਰ ਰਾਤ ਇੱਕ ਭਿਆਨਕ ਹਾਦਸਾ ਵਾਪਰਿਆ ਜਦੋਂ ਅਮਰਨਾਥ ਯਾਤਰਾ ਲਈ ਲੰਗਰ ਸਮਾਨ ਲਿਜਾ ਰਿਹਾ ਇੱਕ ਟਰੱਕ ਥੱਲ੍ਹੇ ਅੰਡਰਬ੍ਰਿਜ਼ ‘ਚ ਫੱਸ ਗਿਆ। ਟਰੱਕ ਦੀ ਛਤ ‘ਤੇ ਬੈਠੇ 2 ਤੋਂ 3 ਯਾਤਰੀ ਬ੍ਰਿਜ਼ ਅਤੇ ਟਰੱਕ ਦੀ ਛਤ ਵਿਚਕਾਰ ਫਸ ਗਏ। ਇਸ ਦੌਰਾਨ ਇੱਕ ਵਿਅਕਤੀ ਨੂੰ ਗੰਭੀਰ ਜ਼ਖਮ ਆਏ ਹਨ।
ਮਿਲੀ ਜਾਣਕਾਰੀ ਮੁਤਾਬਕ ਟਰੱਕ ਅਮਰਨਾਥ ਯਾਤਰਾ ਲਈ ਲੰਗਰ ਸੇਵਾ ਦੇ ਤਹਿਤ ਸਮਾਨ ਲਿਜਾ ਰਿਹਾ ਸੀ। ਗਾਜੀ ਗੁੱਲਾ ਇਲਾਕੇ ‘ਚ ਬਣੇ ਅੰਡਰਬ੍ਰਿਜ਼ ਦੇ ਨੀਵਾਂ ਹੋਣ ਕਾਰਨ ਅਤੇ ਉਥੇ ਕੋਈ ਚੇਤਾਵਨੀ ਜਾਂ ਗਾਰਡਰ ਨਾ ਹੋਣ ਦੇ ਕਾਰਨ ਟਰੱਕ ਡਰਾਈਵਰ ਨੇ ਟਰੱਕ ਨੂੰ ਬਿਨਾ ਰੁਕਾਵਟ ਅੰਦਰ ਚਲਾ ਦਿੱਤਾ। ਇਸ ਕਾਰਨ ਟਰੱਕ ਦੀ ਛਤ ਬ੍ਰਿਜ਼ ਵਿਚ ਫੱਸ ਗਈ ਅਤੇ ਛਤ ਉੱਤੇ ਬੈਠੇ ਯਾਤਰੀ ਫਸ ਗਏ।
ਮੌਕੇ ‘ਤੇ ਮੌਜੂਦ ਲੋਕਾਂ ਅਤੇ ਰਾਹਗੀਰਾਂ ਨੇ ਬੜੀ ਮੁਸ਼ਕਲ ਨਾਲ ਟਰੱਕ ‘ਚੋਂ ਫਸੇ ਲੋਕਾਂ ਨੂੰ ਟਰੱਕ ਦੀ ਹਵਾ ਕੱਢ ਕੇ ਬਾਹਰ ਕੱਢਿਆ। ਤੁਰੰਤ ਉਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਭੇਜਿਆ ਗਿਆ। ਹਾਲਾਂਕਿ 3 ਲੋਕਾਂ ‘ਚੋਂ ਇਕ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ।
ਇਸ ਹਾਦਸੇ ਨੂੰ ਲੈ ਕੇ ਸਥਾਨਕ ਲੋਕਾਂ ਵਿਚ ਰੋਸ ਵੇਖਣ ਨੂੰ ਮਿਲਿਆ। ਉਨ੍ਹਾਂ ਨੇ ਦੋਸ਼ ਲਾਇਆ ਕਿ ਇਥੇ ਪ੍ਰਸ਼ਾਸਨ ਵੱਲੋਂ ਕਿਸੇ ਵੀ ਪ੍ਰਕਾਰ ਦੀ ਚੇਤਾਵਨੀ ਜਾਂ ‘ਬੜੇ ਵਾਹਨਾਂ ਪ੍ਰਤੀ ਰੋਕ’ ਵਾਲਾ ਬੋਰਡ ਨਹੀਂ ਲਾਇਆ ਗਿਆ। ਲੋਕਾਂ ਨੇ ਇਹ ਵੀ ਦੱਸਿਆ ਕਿ ਹਾਦਸੇ ਦੀ ਸੂਚਨਾ ਤੁਰੰਤ ਪੁਲਿਸ ਅਤੇ ਐਂਬੂਲੈਂਸ ਨੂੰ ਦੇ ਦਿੱਤੀ ਗਈ ਸੀ, ਪਰ ਨਾ ਤਾਂ ਪੁਲਿਸ ਸਮੇਂ ਤੇ ਪਹੁੰਚੀ ਅਤੇ ਨਾ ਹੀ ਐਂਬੂਲੈਂਸ।
ਸਥਾਨਕ ਮੰਗ:
ਲੋਕਾਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਉਕਤ ਅੰਡਰਬ੍ਰਿਜ਼ ‘ਤੇ ਤੁਰੰਤ ‘ਚੇਤਾਵਨੀ ਬੋਰਡ’ ਲਾਇਆ ਜਾਵੇ ਅਤੇ ਇਲਾਕੇ ਦੀ ਜਾਂਚ ਕਰਕੇ ਅਜਿਹੇ ਹਾਦਸਿਆਂ ਤੋਂ ਬਚਾਅ ਲਈ ਲੋੜੀਂਦੇ ਕਦਮ ਚੁੱਕੇ ਜਾਣ ।
