ਜਲੰਧਰ : (ਜੇ ਐਸ ਸੰਧੂ / ਕੰਵਲਜੀਤ ਸਿੰਘ ਮੱਕੜ) – ਜਲੰਧਰ/ਆਦਮਪੁਰ ਦੇਸ਼ ਭਗਤੀ, ਵਾਤਾਵਰਣ ਜਾਗਰੂਕਤਾ ਅਤੇ ਨੌਜਵਾਨਾਂ ਵਿੱਚ ਰਾਸ਼ਟਰਪ੍ਰੇਮ ਭਰਨ ਦੇ ਉਦੇਸ਼ ਨਾਲ ਨਵੀਂ ਦਿੱਲੀ ਤੋਂ ਸ਼ੁਰੂ ਹੋਈ “ਸ਼ੌਰਯ ਭਾਰਤ ਕਾਰ ਰੈਲੀ” ਅੱਜ ਆਦਮਪੁਰ ਏਅਰਬੇਸ ‘ਤੇ ਪਹੁੰਚੀ। ਇਸ ਰੈਲੀ ਨੂੰ “ਆਪਰੇਸ਼ਨ ਸਿੰਦੂਰ” ਦੀ ਸਫਲਤਾ ਨੂੰ ਸਮਰਪਿਤ ਕੀਤਾ ਗਿਆ ਹੈ ਅਤੇ ਇਹ ਰੈਲੀ ਭਾਰਤ ਦੇ ਸੁਰੱਖਿਆ ਬਲਾਂ ਦੀ ਵੀਰਤਾ ਅਤੇ ਵਾਤਾਵਰਣਿਕ ਸਥਿਰਤਾ ਵੱਲ਼ ਸਮਰਪਿਤ ਇੱਕ ਵਿਸ਼ੇਸ਼ ਯਾਤਰਾ ਹੈ।
ਨਵੀਂ ਦਿੱਲੀ ਤੋਂ ਰਵਾਨਾ ਹੋਈ ਇਹ ਕਾਰ ਰੈਲੀ ਪਹਿਲਾਂ ਅੰਬਾਲਾ ਕੈਂਟ ਦੇ ਏਅਰ ਫੋਰਸ ਸਟੇਸ਼ਨ ‘ਤੇ ਝੰਡਾ ਲਹਿਰਾ ਕੇ ਸਨਮਾਨਿਤ ਕੀਤੀ ਗਈ। ਆਦਮਪੁਰ ‘ਚ ਵੀ ਰੈਲੀ ਦਾ ਜੋਸ਼ੀਲਾ ਸਵਾਗਤ ਕੀਤਾ ਗਿਆ। ਏਅਰਫੋਰਸ ਅਧਿਕਾਰੀਆਂ ਨੇ ਕਿਹਾ ਕਿ ਇਹ ਸਾਡੀ ਖੁਸ਼ਕਿਸਮਤੀ ਹੈ ਕਿ ਆਦਮਪੁਰ ਏਅਰਬੇਸ ਨੂੰ ਇਸ ਯਾਤਰਾ ਲਈ ਚੁਣਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਇਸ ਰੈਲੀ ਰਾਹੀਂ ਭਾਰਤ ਦੇ ਹਰ ਕੋਨੇ ਤੱਕ “ਆਪਰੇਸ਼ਨ ਸਿੰਦੂਰ” ਦੀ ਮਹਾਨ ਕਾਮਯਾਬੀ ਅਤੇ ਸੈਨਾ ਦੀ ਦਲੇਰੀ ਦੀ ਜਾਣਕਾਰੀ ਪਹੁੰਚ ਰਹੀ ਹੈ।
ਏਅਰ ਆਫੀਸਰ ਨੇ ਕਿਹਾ ਕਿ ਇਹ ਰੈਲੀ ਭਾਰਤ ਦੀਆਂ ਤਿੰਨੋ ਫੌਜਾਂ—ਥਲਸੇਨਾ, ਜਲਸੇਨਾ ਤੇ ਵਾਯੂਸੇਨਾ—ਦੇ ਸਾਹਸ ਅਤੇ ਦੇਸ਼ ਵੱਲੋਂ ਵਾਤਾਵਰਣ ਸੰਭਾਲ ਲਈ ਕੀਤੀ ਜਾ ਰਹੀ ਵਚਨਬੱਧਤਾ ਦਾ ਇੱਕ ਸ਼ਕਤੀਸ਼ਾਲੀ ਪ੍ਰਤੀਕ ਹੈ। ਇਸ ਰੈਲੀ ਵਿੱਚ ਡੀਆਰਡੀਆਓ, ਤਟ ਰੱਖਿਆ ਬਲ, ਐਨ.ਸੀ.ਸੀ. ਸਮੇਤ ਰੱਖਿਆ ਮੰਤਰਾਲੇ ਦੇ ਕੁੱਲ 112 ਮੈਂਬਰ ਹਿੱਸਾ ਲੈ ਰਹੇ ਹਨ।
ਇਹ ਰੈਲੀ ਪੀ.ਐਚ.ਡੀ. ਸੀ.ਸੀ.ਆਈ. ਵੱਲੋਂ ਏਅਰ ਫੋਰਸ ਐਡਵੈਂਚਰ ਵਿੰਗ ਦੇ ਸਹਿਯੋਗ ਨਾਲ ਕਰਵਾਈ ਜਾ ਰਹੀ ਹੈ। ਰੈਲੀ ਵਿੱਚ ਟਾਟਾ ਕੰਪਨੀ ਵੱਲੋਂ ਦਿੱਤੇ ਗਏ 40 ਵਾਹਨ ਵਰਤੇ ਜਾ ਰਹੇ ਹਨ, ਜਿਨ੍ਹਾਂ ਵਿੱਚ ਜ਼ਿਆਦਾਤਰ ਇਲੈਕਟ੍ਰਿਕ ਅਤੇ ਹਾਈਬ੍ਰਿਡ ਵਾਹਨ ਹਨ। ਰੈਲੀ ਦੀ ਕੁੱਲ ਦੂਰੀ ਤਕਰੀਬਨ 800 ਕਿ.ਮੀ. ਹੈ ਜੋ ਕਿ ਦੇਸ਼ ਦੇ ਸੁਰੱਖਿਆ ਬਲਾਂ ਨੂੰ ਇੱਕ ਸ਼ਰਧਾਂਜਲੀ ਹੈ।
ਇਸ ਮੌਕੇ ‘ਤੇ ਆਦਮਪੁਰ ਏਅਰਬੇਸ ਦੇ ਅਧਿਕਾਰੀਆਂ ਨੇ ਰੈਲੀ ਚ ਭਾਗ ਲੈ ਰਹੇ ਸਾਰੇ ਮੈਂਬਰਾਂ ਦਾ ਉਤਸ਼ਾਹ ਨਾਲ ਸਵਾਗਤ ਕੀਤਾ ਅਤੇ ਇਸ ਯਾਤਰਾ ਨੂੰ ਯਾਦਗਾਰ ਅਤੇ ਪ੍ਰੇਰਣਾਦਾਇਕ ਕਰਾਰ ਦਿੱਤਾ।
