GNDU ਦੇ ਵਾਈਸ ਚਾਂਸਲਰ ਦੀ RSS ਨਾਲ ਨੇੜਤਾ ‘ਤੇ ਵਿਵਾਦ, ਵਿਦਿਆਰਥੀ ਸੰਘਠਨਾਂ ਵੱਲੋਂ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਚਿੱਠੀ, ਤੁਰੰਤ ਕਾਰਵਾਈ ਦੀ ਮੰਗ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਅੰਮ੍ਰਿਤਸਰ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ (GNDU) ਦੇ ਵਾਈਸ ਚਾਂਸਲਰ ਡਾ. ਕਰਮਜੀਤ ਸਿੰਘ ਵੱਲੋਂ ਹਾਲ ਹੀ ਵਿੱਚ ਰਾਸ਼ਟਰੀ ਸਵੈਯੰਸੇਵਕ ਸੰਘ (RSS) ਦੇ ਇੱਕ ਸਮਾਗਮ ‘ਚ ਸ਼ਿਰਕਤ ਕਰਨ ‘ਤੇ ਵਿਦਿਆਰਥੀ ਸੰਘਠਨਾਂ ਵੱਲੋਂ ਸਖ਼ਤ ਰੋਸ ਪ੍ਰਗਟ ਕੀਤਾ ਗਿਆ ਹੈ। ਇਸ ਸਬੰਧ ‘ਚ ਅੱਜ ਵਿਦਿਆਰਥੀਆਂ ਨੇ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਨੂੰ ਇੱਕ ਖੁਲ੍ਹੀ ਚਿੱਠੀ ਲਿਖੀ ਹੈ ਜਿਸ ‘ਚ GNDU ਦੇ ਮੌਜੂਦਾ ਵਾਈਸ ਚਾਂਸਲਰ ਨੂੰ ਤੁਰੰਤ ਹਟਾਉਣ ਦੀ ਮੰਗ ਕੀਤੀ ਗਈ ਹੈ।

ਡਾ. ਕਰਮਜੀਤ ਸਿੰਘ ਨੇ RSS ਦੇ ‘ਗਿਆਨ ਸਮੈ ਮਿੱਲਨ’ ਸਮਾਗਮ ‘ਚ ਦਿੱਤੀ ਸੀ ਹਾਜ਼ਰੀ
ਵਿਦਿਆਰਥੀ ਆਗੂ ਜਸਕਰਨ ਸਿੰਘ ਨੇ ਮੀਡੀਆ ਨੂੰ ਦੱਸਿਆ ਕਿ ਡਾ. ਕਰਮਜੀਤ ਸਿੰਘ ਨੇ ਹਾਲ ਹੀ ਵਿੱਚ ਕਾਇਮਟੌਰ ਵਿਖੇ ਹੋਏ RSS ਦੇ ਸਮਾਗਮ ‘ਗਿਆਨ ਸਮੈ ਮਿੱਲਨ’ ਵਿੱਚ ਹਿੱਸਾ ਲਿਆ, ਜਿੱਥੇ ਉਨ੍ਹਾਂ ਨੇ GNDU ਵੱਲੋਂ ਸਿਖ ਧਰਮ ਅਤੇ ਭਾਰਤੀ ਗਿਆਨ ਪ੍ਰਣਾਲੀ ਨੂੰ ਜੋੜਨ ਵਾਲੇ ਕੋਰਸਾਂ ਦੀ ਰਿਪੋਰਟ ਪੇਸ਼ ਕੀਤੀ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਯੂਨੀਵਰਸਿਟੀ ਦੀ ਸਿੱਖ ਚੇਅਰ ਦੀ ਆੜ ਹੇਠ ਵੈਦਾਂਤ ਅਤੇ ਸਿੱਖ ਧਰਮ ਵਿਚਕਾਰ ਤਾਲਮੇਲ ਸਥਾਪਤ ਕਰਨ ਦੀ ਕੋਸ਼ਿਸ਼ ਕੀਤੀ। ਵਿਦਿਆਰਥੀਆਂ ਅਨੁਸਾਰ ਇਹ ਕੋਸ਼ਿਸ਼ਾਂ ਸਿੱਖ ਧਰਮ ਦੇ ਮੂਲ ਸਿਧਾਂਤਾਂ ਦੇ ਉਲਟ ਹਨ।

ਯੂਨੀਵਰਸਿਟੀ ਨੂੰ RSS ਦੇ ਵਿਚਾਰਧਾਰਾ ਵਾਲਾ ਕੇਂਦਰ ਬਣਾਇਆ ਜਾ ਰਿਹਾ: ਵਿਦਿਆਰਥੀ, ਵਿਦਿਆਰਥੀਆਂ ਨੇ ਦੱਸਿਆ ਕਿ GNDU ਦੀ ਸਥਾਪਨਾ 1969 ਵਿੱਚ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਨਾਮ ‘ਤੇ ਸਿੱਖ ਧਰਮ ਦੇ ਉਤਥਾਨ ਲਈ ਹੋਈ ਸੀ, ਪਰ ਹੁਣ ਇਹ RSS ਦੀ ਸੋਚ ਨੂੰ ਵਧਾਵਾ ਦੇਣ ਵਾਲਾ ਕੇਂਦਰ ਬਣਦਾ ਜਾ ਰਿਹਾ ਹੈ। ਉਨ੍ਹਾਂ ਨੇ ਆਖਿਆ ਕਿ ਇਹ ਸਿੱਖ ਧਰਮ ਲਈ ਆਤਮਕ ਗੁਲਾਮੀ ਵਰਗੀ ਸਥਿਤੀ ਹੈ।
ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਪਹਿਲਾਂ ਵੀ ਆ ਚੁਕੇ ਹਨ RSS ਵਿਰੁੱਧ ਹੁਕਮਨਾਮੇ
ਚਿੱਠੀ ਵਿੱਚ ਇਹ ਵੀ ਉਲੇਖ ਕੀਤਾ ਗਿਆ ਕਿ 2001, 2002 ਅਤੇ 2004 ਵਿੱਚ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ RSS ਦੇ ਖਿਲਾਫ ਕਈ ਵਾਰ ਸਿੱਖ ਕੌਮ ਨੂੰ ਚੇਤਾਵਨੀ ਦਿੱਤੀ ਗਈ ਸੀ, ਜਿਸ ‘ਚ RSS ਨੂੰ ਸਿੱਖ ਧਰਮ ਦੀਆਂ ਜੜ੍ਹਾਂ ‘ਤੇ ਹਮਲਾ ਕਰਨ ਵਾਲੀ ਸੰਸਥਾ ਦੱਸਿਆ ਗਿਆ ਸੀ। ਹੁਣ ਵਿਦਿਆਰਥੀ ਸੰਘਠਨਾਂ ਨੇ ਮੰਗ ਕੀਤੀ ਹੈ ਕਿ ਚੌਥਾ ਅਤੇ ਸਾਫ-ਸੁਥਰਾ ਹੁਕਮਨਾਮਾ ਜਾਰੀ ਕਰਕੇ ਸਿੱਖ ਕੌਮ ਨੂੰ ਦਿਸ਼ਾ ਦਿੱਤੀ ਜਾਵੇ।

RSS ਪਿਛੋਕੜ ਵਾਲਿਆਂ ਦੀਆਂ ਭਰਤੀਆਂ ‘ਤੇ ਵੀ ਸਵਾਲ, ਚਿੱਠੀ ਵਿੱਚ ਇਹ ਵੀ ਦੱਸਿਆ ਗਿਆ ਕਿ GNDU ਵਿੱਚ ਕੀਤੀਆਂ ਨਵੀਆਂ ਭਰਤੀਆਂ ਵਿਚਲੇ ਬਹੁਤ ਸਾਰੇ ਵਿਅਕਤੀ RSS ਨਾਲ ਜੁੜੇ ਹੋਏ ਹਨ ਜਾਂ ਫਿਰ ਬਾਹਰੀ ਰਾਜਾਂ ਤੋਂ ਆਏ ਹਨ, ਜਦਕਿ ਪੰਜਾਬ ਦੇ ਯੋਗ ਅਕਾਦਮਿਕ ਪ੍ਰੋਫੈਸਰਾਂ ਨੂੰ ਨਜ਼ਰਅੰਦਾਜ਼ ਕੀਤਾ ਗਿਆ ਹੈ। ਇਹ ਸਥਿਤੀ ਗੰਭੀਰ ਚਿੰਤਾ ਦਾ ਵਿਸ਼ਾ ਬਣੀ ਹੋਈ ਹੈ।

ਮੁੱਖ ਮੰਗਾਂ:
GNDU ਦੇ ਮੌਜੂਦਾ VC ਡਾ. ਕਰਮਜੀਤ ਸਿੰਘ ਨੂੰ ਤੁਰੰਤ ਹਟਾਇਆ ਜਾਵੇ।
ਕਿਸੇ ਵੀ ਸਿੱਖ ਸੰਸਥਾ ਵਿਚ RSS ਨਾਲ ਜੁੜੇ ਵਿਅਕਤੀਆਂ ਦੀ ਨਿਯੁਕਤੀ ਉੱਤੇ ਪੂਰੀ ਤਰ੍ਹਾਂ ਰੋਕ ਲਾਈ ਜਾਵੇ।
ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ RSS ਖਿਲਾਫ ਤੁਰੰਤ ਅਤੇ ਸਖ਼ਤ ਹੁਕਮਨਾਮਾ ਜਾਰੀ ਕੀਤਾ ਜਾਵੇ।

ਅੰਤ ਵਿੱਚ ਜਸਕਰਨ ਸਿੰਘ ਨੇ ਆਖਿਆ:
“ਜੇ ਸਿੱਖ ਸੰਸਥਾਵਾਂ ਨੂੰ ਚਲਾਉਣ ਲਈ RSS ਦੇ ਅਧੀਨ ਜਾਣਾ ਪਿਆ, ਤਾਂ ਇਹ ਸਾਡੀ ਆਤਮਕ ਗੁਲਾਮੀ ਹੋਵੇਗੀ। ਅਸੀਂ ਇਹ ਕਦੇ ਵੀ ਬਰਦਾਸ਼ਤ ਨਹੀਂ ਕਰਾਂਗੇ।”