ਭੋਗਪੁਰ: ਮਾਂ-ਪੁੱਤਰ ਵੱਲੋਂ ਵਿਦੇਸ਼ ਭੇਜਣ ਦੇ ਨਾਂ ’ਤੇ 35 ਲੱਖ ਦੀ ਠੱਗੀ, ਐਫ.ਆਈ.ਆਰ ਦਰਜ

ਜਲੰਧਰ : ਕੰਵਲਜੀਤ ਸਿੰਘ ਮੱਕੜ – ਭੋਗਪੁਰ ਪੁਲਿਸ ਨੇ ਵਿਦੇਸ਼ ਭੇਜਣ ਦੇ ਨਾਂ ’ਤੇ 35 ਲੱਖ ਰੁਪਏ ਦੀ ਠੱਗੀ ਕਰਨ ਦੇ ਮਾਮਲੇ ਵਿੱਚ ਮਾਂ-ਪੁੱਤਰ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਹੈ। ਸ਼ਿਕਾਇਤਕਰਤਾ ਸੋਹਣ ਸਿੰਘ ਪਿੰਡ ਭੱਟਨੂਰਾ ਲੁਬਾਣਾ ਨੇ ਐਸ.ਐਸ.ਪੀ. ਜਲੰਧਰ (ਦੇਹਾਤ) ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਸਦਾ ਪੁੱਤਰ ਅਜੀਤ ਸਿੰਘ ਦੀ ਦੋਸਤੀ ਪਿੰਡ ਚਾਹੜਕੇ ਦੇ ਰਹਿਣ ਵਾਲੇ ਅਨਮੋਲ ਨਾਲ ਸੀ। ਅਗਸਤ 2022 ਵਿੱਚ ਅਨਮੋਲ ਆਪਣੀ ਮਾਂ ਬਲਵਿੰਦਰ ਕੌਰ ਦੇ ਨਾਲ ਸੋਹਣ ਸਿੰਘ ਦੇ ਘਰ ਆਇਆ ਅਤੇ ਦਾਅਵਾ ਕੀਤਾ ਕਿ ਉਹਨਾਂ ਦਾ ਜਾਣ-ਪਹਿਚਾਣ ਵਾਲਾ ਫਿਰੋਜ਼ਪੁਰ ਦਾ ਏਜੰਟ ਸਚਿਨ, ਜੋ ਉਹਨਾਂ ਦੇ ਰਿਸ਼ਤੇਦਾਰ ਹਰਭਜਨ ਸਿੰਘ ਦਾ ਵੀ ਜਾਣੂ ਹੈ, ਕੈਨੇਡਾ ਭੇਜਣ ਦਾ ਕੰਮ ਕਰਦਾ ਹੈ।

ਸੋਹਣ ਸਿੰਘ ਅਤੇ ਪਰਿਵਾਰ ਉਹਨਾਂ ਦੀਆਂ ਗੱਲਾਂ ਵਿੱਚ ਆ ਗਏ ਅਤੇ 25 ਲੱਖ ਰੁਪਏ ਵਿੱਚ ਪੁੱਤਰ ਨੂੰ ਕੈਨੇਡਾ ਭੇਜਣ ਦੀ ਡੀਲ ਤੈਅ ਹੋਈ। ਉਸੇ ਦਿਨ ਬਲਵਿੰਦਰ ਕੌਰ ਨੇ 2 ਲੱਖ ਰੁਪਏ ਨਕਦ ਲਏ। ਇਸ ਤੋਂ ਇਲਾਵਾ, ਬਲਵਿੰਦਰ ਕੌਰ ਨੇ ਆਪਣੇ ਪੁੱਤਰ ਅਨਮੋਲ ਨੂੰ ਵਿਦੇਸ਼ ਭੇਜਣ ਲਈ ਸੋਹਣ ਸਿੰਘ ਦੇ ਦੂਜੇ ਪੁੱਤਰ ਵਿਜੈ ਪ੍ਰਤਾਪ ਤੋਂ 7 ਲੱਖ ਰੁਪਏ ਵੀ ਲਏ।

ਕੁਝ ਦਿਨ ਬਾਅਦ, ਬਲਵਿੰਦਰ ਕੌਰ ਦੇ ਕਹਿਣ ‘ਤੇ ਸੋਹਣ ਸਿੰਘ ਦੇ ਪਰਿਵਾਰ ਨੇ ਏਜੰਟ ਸਚਿਨ ਨੂੰ 21 ਲੱਖ ਰੁਪਏ ਹੋਰ ਦੇ ਦਿੱਤੇ, ਜਿਸ ਦੀ ਵੀਡੀਓ ਹਰਭਜਨ ਸਿੰਘ ਨੇ ਬਣਾਈ। ਏਜੰਟ ਨੇ ਅਨਮੋਲ ਅਤੇ ਅਜੀਤ ਸਿੰਘ ਨੂੰ ਸਰਬੀਆ ਭੇਜ ਦਿੱਤਾ, ਪਰ ਅਜੀਤ ਸਿੰਘ ਨੂੰ ਉੱਥੋਂ ਡਿਪੋਰਟ ਕਰ ਦਿੱਤਾ ਗਿਆ।

ਜਾਂਚ ਵਿੱਚ ਪੁਲਿਸ ਨੇ ਬਲਵਿੰਦਰ ਕੌਰ, ਉਸਦਾ ਪੁੱਤਰ ਅਨਮੋਲ, ਹਰਭਜਨ ਸਿੰਘ ਅਤੇ ਏਜੰਟ ਸਚਿਨ ਵੱਲੋਂ ਕੁੱਲ 35 ਲੱਖ ਰੁਪਏ ਦੀ ਠੱਗੀ ਕਰਨ ਦੇ ਦੋਸ਼ ਸਹੀ ਪਾਏ। ਭੋਗਪੁਰ ਥਾਣੇ ਦੀ ਪੁਲਿਸ ਨੇ ਫਿਲਹਾਲ ਬਲਵਿੰਦਰ ਕੌਰ ਅਤੇ ਅਨਮੋਲ ਖ਼ਿਲਾਫ਼ ਐਫ.ਆਈ.ਆਰ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।